Alsoe als onlanx leden huyghe van udekem meye(r) te loeven(en) in absencien he(re)n/ lodewijcx pynnoc ridders die es inder reysen ons gened(ichs) he(re)n tshertoghen/ beticht heeft voer den raide vander stat eene(n) ingeseten(en) poirte(r) vander/ selver stat met namen goird van kessele henrix sone pelsmake(r) die in/ hachten was te marcks crauwels vorste(r) om deswille alsoe de selve huyge/ seide dat de selve goird binne(n) cortten tiden herw(er)t op eene(n) avont als/ zijn wijf vander hant was binnen sijns selfs huyse met fortchen ghe/ violeert soude hebben een meysken van zijnen gebue(re)n kinde(re)n geheete(n)/ mariken vand(en) damoresen en(de) tegen hue(re)n danc die tsijne(n) huys was come(n)/ om bij sijn wijf te slapen als hij soude gaen ter waken Van welken poi(n)te/ en(de) alle gelegenth(eiden) die dair inne gebuert was hij begheerde dat de/ raid vander stat tselve meysken woude hoe(re)n spreken het wae(re) inden/ raide oft appart zij soude clae(re)n alsoe wael in zijnre absencien als/ p(rese)ntien tghene des hue(r) wedervaren wae(r) Seyde dat dat wae(r) een/ horribel fait ende van quaden exemple alsulc dat nyet en wae(re) te/ sustine(re)n ende meynde dair o(m)me voort want hij boot te bewijsen dat/ hier af fame wae(re) ende geruchte inder gebuerten des voirs(creven) goirts/ ende elde(r) en(de) oic mede dat eenige des voirs(creven) goirts vriende(n) gesonden/ wae(re)n comen aenden stief vader en(de) moeder des vors(creven) meyskens om dese/ sake afteleggen(e) ende voir en(de) eer de selve goird gehouden was geweest/ Zoe hoopte hij dat nae gelegenth(eit) vanden fayte van des tvoirscr(even)/ meysken seggen soude ende der famen die hij bijleyt hij den selven/ goirde soude hebben ende crijgen niet tegenstaen(de) zijnder porterien/ tot scharper examinacien want nyet wel mogelic en wae(re) sulke/ feyte te thoenen hem des getroesten(de) totten rechte en(de) t(er)minacien vand(er)/ stat Dair op de selve goird hem v(er)antweerdende ontkinde geheel ende/ al tvoirs(creven) feyt Seide oic dat de meye(r) voirs(creven) sijn v(er)met ne(m)mermeer thoene(n)/ en soude en(de) oic dat dbijleggen vand(en) voirs(creven) meye(r) ten fine dair hij toe/ tendeerde hem ne(m)mermeer ontstade en soude comen gedoen aengesien
//
datmen ter waerheit bevinden soude dat noch tvoirs(creven) meysken noch/ hue(r) vrinde noit geclaecht en hadden dan wel acht oft meer daigen/ nae dat tfeyt soude zijn gebuert noch oec dat gheen fame en was/ voer de selve acht daige oft dair omtri(n)t mochten sijn overleden dat hij/ te weten de selve goird [of] zijn wijf der stiemoeder vanden voirscrev(en)/ meysken geeyscht hadden zeke(r) gelt oft scult die de selve stiemoeder/ ende moeder vanden voirs(creven) meysken den voirs(creven) goirde sculdich wae(re)n/ Hier op warden aengehoort tvoirs(creven) meysken en(de) de getuygen die de/ vors(creven) meye(r) inder saken leydde die zijns v(er)meets niet en volquam/ met alle tsgheens des biden voirs(creven) meye(r) ende goirde met zijnen/ vrinden wart voirtgestelt Ende op al rijpelic geledt sijnde was/ biden vollen raide vander stat ze(re) notabelic vergadert overdragen/ ende get(er)mineert voer recht dat de meye(r) van ons gened(ichs) he(re)n/ wegen met sijnen voirststelle om den vors(creven) goirde hier af ter/ scharper examinacien te crijgen verdoelt wae(r) maer geliefde/ den meye(r) inden name vand(er) heerl(icheit) oft p(ar)tie den voirs(creven) goirde/ vand(en) voirs(creven) fayte aentespreken dat zij ende elc van hen dat mochte(n)/ doen met rechte inde banc voir meye(r) den selven meye(r) en(de) scepen(en)/ van loeven(en) act(um) in pleno (con)silio m(ar)tii xxiii