It(em) jan vand(en) steenweghe sone wilen jans ter eender ende/ jan vand(en) steenweghe sone wilen joes brueders des voirs(creven)/ jans ter ande(r) zijden sijn bij toedoene van hue(re)n vrienden/ en(de) mynlijke yffene(re)n eensworden en(de) veraccordeert vand(en)/ onberuerliken ende erfgoeden die hen gebleven en(de) verstorven/ sijn bij ende nae de doot jans vand(en) heetvelde ende/ jouffr(ouwe) lijsbette(n) vand(en) heetvelde zijnder suster oems ende/ moeder des voirs(creven) jans janssone ende des voirs(creven) wilen joes/ / geheete(n) tgoet van otinge(n) ende van essche(re)n ende meer ande(re)n/ gelege(n) in div(er)sen plaetsen te bruessele en(de) dair omtrent der/ pointe(n) ende condicie(n) hier nae bescreve(n) die zij malcande(re)n/ tot ewige(n) dagen goet vast en(de) gestentich gelooft hebben/ voir hen hue(re)n erve(n) ende nacomelinge(n) Inden yerste(n) dat/ de voirs(creven) jan vand(en) steenwege joessone ter stont ae(n)veerden/ hantplichte(n) en(de) gebruyken sal voir hem sijne(n) erven ende/ nacomelinge(n) alle de voirg(eruerde) goede hen gebleve(n) en(de) verstorve(n)/ gelijc die voe(r) gescreve(n) en(de) genoemt staen Behalve(n)/ dat de selve jan den voirs(creven) janne vand(en) steenweghe sijne(n)/ oom bewijsen sal seke(re) p(ar)cheelen vanden selve(n) nameliken/ goeden alsoe die ter huere(n) jaerlijcx ghelde(n) jaerlijcx uutbringen(de)/ viertich ryns gulden(en) tstuck te tsestich pl(a)c(ken) brabants/ gelts om die bijden voirs(creven) janne vand(en) steenwege janss(one)/ gehave(n) te werde(n) jaerlijcx alsoe lange hij leven sal/ en(de) niet lange(r) Ende des sal de voirs(creven) jan jannss(one) zijn oem/ sculdich zijn jaerlijcx te betalen(e) he(n)neken zijne(n) natuerlike(n)/ sone alsulcke vijf rijd(er)s lijfpen(sien) als de voirs(creven) jan joessone/ den selve(n) henneken tsijne(n) live sculdich en(de) belanck is/ met scep(enen) br(ieve) van loeven(e) en(de) den voirs(creven) ja(n)ne vand(en) steenwege/ joess(one) en(de) sijn goede d(air) af geheelijc ontlasten en(de) schadeloos/ houden Bij alsoe nochtan oft gebuerde dat de voirs(creven)/ jan vand(en) steenwege janss(one) aflivich worde voe(r) den voirs(creven)/ he(n)neken sijne(n) bastaert sone dat dan in dien gevalle/ de voirs(creven) jan vand(en) steenwege joessone van dan voirtane/ sculdich sal zijn die vijf rijders jaerlijcx te betalen(e) den/ selve(n) he(n)neken alsoe lange hij leven sal ende niet/ lang(er) It(em) is voirt ondersproken tusschen de voirs(creven) p(ar)tien/ soe verre de voirs(creven) janne vand(en) steenwege joess(one) e(n)nige/ vand(en) voirscr(even) goeden afgewonne(n) worden oft dat hem/ die niet volgen en mochten Soe heeft gelooft en(de)/ gelooft met desen de voirs(creven) jan vanden steenwege janss(one)/ den voirs(creven) sijne(n) neve dair af inne te staen(e) tot ewighen/ dage(n) It(em) is ondersproke(n) dat de voirs(creven) jan vand(en) steenweghe/ ter eend(er) en(de) jan sijn neve ter ande(r) zijden alle en(de) yeg(ewelke)/ sculd(en) en(de) lasten als de voirs(creven) jan vand(en) heetvelde en(de) jouffr(ouwe)/ lijsbeth sijn suster sculdich wae(re)n sullen gelijclijck en(de) half/ en(de) half drage(n) cuelen en(de) betalen It(em) is voirt vorweerde/ / soe verre in tide(n) naecomen(de) e(n)nige lijftochtrinte(n) staen(de)/ opde voirg(eruerde) goede versterve(n) dat die proffijte(n) d(air)af toecome(n)/ en(de) vallen sullen gelijckelijc en(de) half en(de) half te weten(e)/ deen helicht den voirs(creven) janne vand(en) steenweghe janssone/ tsijne(n) live en(de) niet lange(r) en(de) dand(er) helicht den voirs(creven)/ janne vand(en) steenwege joessone voir hem en(de) zijne(n) erven/ en(de) nacomelinge(n) tot ewigen dage(n) cor(am) roelofs willemaer/ septembr(is) xv