Van alsulken questien en(de) geschillen als gielijs de roide ter eender en(de)/ henr(ic) du(n)nemelck ter ande(re) uutstaen(de) hebben tegen malcande(re)n van/ alsulken vo(n)nisse als bij scepen(en) inde banck alhier ter manissen/ smeyers gewesen es nove(m)br(is) xxviii lestleden dairaf men claernisse/ behoeven(de) es van goeden ma(n)nen inder maten tselve vo(n)nisse dat/ begrijpt hebben hen de selve p(ar)tien gesubmitteert en(de) verbonden/ inde seggers nae bescr(iven) te weten(e) de voirs(creven) gielijs in joese va(n) oerbeke/ en(de) joh(ann)ese danielis en(de) de voirs(creven) henr(ic) du(n)nemelc in willem(me) van/ leefdale en(de) henr(icke) int hof als seggers en(de) arbiters der selver geschillen/ en(de) sullen de selve p(ar)tien in wederzijde op in donderdage naest/ comen(de) in p(rese)ncien vanden segge(re)n voirs(creven) huer saken en(de) geschillen/ open(en) met monde en(de) de selve d(air)af informe(re)n en(de) oic bringen in/ wederzijde de ghene dair zij hen sullen willen mede behulpen die/ de selve segge(re)n op hue(re)n eedt die zij doen sullen aenhoe(re)n sullen/ van sgheens dair hen p(ar)tien toe gedragen totten selven en(de) sullen/ de selve seggers same(n)tlijc oft den meesten deel van hen huer/ uutsprake doen moeten by(n)nen viii dagen d(air)nae en(de) oft zij inde/ uutsprake niet en accordeerden dat zij dan de sake en(de) informacie/ bij hen genomen in gescrifte overbringen sullen inder stad handen/ by(n)nen drie daghen d(air)nae om bijder stad get(er)mineert te worden(e)/ des men bevi(n)den sal nae gelegenth(eit) der saken behoe(re)nde en(de) sullen
//
geloven van weerden te houden in wederzijde o(n)verbrekelijc/ tghene des bijden arbiters voirs(creven) oft bijder stadt uutgesproken sal/ wordden sonder argelist en(de) oft e(n)nige vand(en) seggers gebraken dat/ men in diens stadt eene(n) ande(re)n sal stellen cor(am) buetsele hoel(air) oct(obris) ix