Vanden geschille dat voe(r) den raide vander stadt op heden comen es/ tusschen ro(m)boute willemair amelrijke vander coevoirt pete(re)n de/ naen en(de) hubrechte h(er)tshals als geswoiren(en) vand(en) vleeschuyse ter/ eender die aldair ontboden wa(r)en bij katlijne(n) machiels weerdy(n)ne/ henr(icx) machiels ter ande(r) zijden aldair de geswoiren(en) voirs(creven) begheerden/ te weten(e) vand(er) selver katlijne(n) wair o(m)me zij hen ontboden hadde/ aldair zij te ky(n)nen gaf hoe dat de geswoiren(en) voirs(creven) huer pensen/ die zij tegen e(n)nige vleeschouwe(re)n va(n) buten der stadt int a(m)bacht/ niet wesen(de) die alhier opten vrien mae(n)dach metten vleesche/ comen wa(r)en gecocht hadde die zij te hue(re)nt thuys insdeels/ hadde laten staen gecale(n)geert hadden tegen reden(en) en(de) recht/ soe zij seyde En(de) ten ande(re)n male soe hadden zij huer oic v(er)boden/ te vercoepen(e) vanden selven pensen tegen de buten vleeschouwe(re)n/ gecocht en(de) tgoet doen calenge(re)n dwelck zij ter plaetsen vand(en)/ buyten vleesche huer hadde pijnen te v(er)coepen(e) hopen(de) dat/ zij dat tonrechte gedaen hadde en(de) alsoe niet en behoirde nae/ der ordina(n)cien d(air)van gemaect vanden bute(n) vleesche en(de) oic wa(n)t/ zij huer dagelijcx metten pensen geneerde en(de) alsoe vercoepen/ mochte dairt huer geliefde dair tegen de geswoiren(en) voirs(creven)/ hielden de co(n)trarie sustine(re)nde nae de selve ordina(n)cie dat/ zij dat niet doen en mochte ter plaetsen vand(en) bute(n) vleesche/ want zij een ingeseten(e) was en(de) alsoe niet en betaemde nae/ der selver ordinan(cie) noch oic e(n)nige buten pensen bij huers/ selfs pensen te setten(e) inde penstrate die zij in meyni(n)gen was
//
soe zij selve kinde ter plaetsen vanden buten vleesche te/ vercoepen(e) gemerct gelijc voirs(creven) steet dat dat den ingeseten(e)/ niet geoirlooft en wa(r)e te dier plaetsen neringe te doen(e)/ dwelck oick grootelijc gedragen soude tegen de vriheyt/ vanden selven a(m)bachte en(de) souden alle ingeseten(en) vanden/ geliken moegen doen dwelck alsoe niet en behoirde hopen(de)/ dat zij tgoet met goeder reden(en) gecalengeert hadden nae der/ ordina(n)cien voirs(creven) en(de) dat tselve verbuert soude wesen ten/ exemple va(n) ande(re)n En(de) soe is nae dien dat p(ar)tien int/ lange gehoirt zijn geweest en(de) de voirs(creven) ordina(n)cie oic voir/ ooghen geleet den selven uutgesproken en(de) get(er)mineert bijden/ raide vander stadt dat tvoirs(creven) goet der voirs(creven) katlijnen/ toebehoiren(de) met goeder reden(en) es gecalengeert en(de) tselve voir/ verbuert gewesen in co(n)silio opidi aug(usti) xxvi