Vand(er) aenspraken die jan willems als meye(r) van loven(e)/ inden name des roomsche(n) coni(n)cx gedaen heeft op janne luyte(n)/ poirte(re) van loven(e) hem opseggen(de) dat hij met meer ande(re)n sijne(n)/ adhe(re)nten hadde sitten drincken ten huyse henricx callen ende/ dat zij van dair gegaen wa(r)en bij nachte en(de) ontijde/ ten huyse va(n) janne ghijsbrechts en(de) hadden ald(aer) den selven/ gesocht om doot te slane oft te evelen van sijne(n) live/ en(de) die doren en(de) vinste(re)n opgeslagen roepen(de) hoeresone/ compt [nu] uute en(de) helpse begraven die ghij v(er)moert hebt/ En(de) als sijten niet thuys en vonden dat zij doen sijn haeflijke/ goede ontstucken sloegen roepen(de) altijt hoeresone comt/ uut en(de) helpse begrave(n) die ghij v(er)moert hebt En(de) dat/ de selve jan oft e(n)nich van sijne(n) medeplege(re)n hadden eene(n)/ stelen(en) boege gespanne(n) en(de) eene bijle d(aer)op geleecht ende/ hadden eene(n) van sijns selfs gesellen in sijn been gescote(n)/ en(de) alsoe gequetst Ende dat de selve jan luyten hadde
//
moeten die voirs(creven) quetsue(re) bete(re)n en(de) d(aer) voe(r) geve(n) vii(½) r(inssche) gulden(en)/ om dat hij de voirs(creven) sijn medeplege(re)n geleyt hadde tot des/ selfs jans ghijsbrechts huys om hem te evelen van sijne(n) live/ en(de) dat dit al aldus was geschiet namelijck dat d(aer)aff/ was openbaire fame geweest voir en(de) eer de voirs(creven) jan/ luyten h(ier) voe(r) aengetast was en(de) noch was Dat p(rese)nteerde/ de voirs(creven) meye(r) te thoenen(e) oft hem ontkint wordd(e) ende/ oic dat fame liep dat de selve jan luyten sijne(n) eygen(en) vad(er)/ te meer stonden geslagen hadde en(de) meshandelt en(de) hem dic/ wijle en(de) menichwerven ongebruyck gedaen heeft aen [sijn] vleesch/ cuypen en(de) aen ande(re) haeflijcke goeden bynne(n) sijnen huyse wesen(de)/ buyten consente en(de) wille van sijnen vader P(rese)nte(re)nde oick/ te thoenen dat willem laureys gesproken hadde den cyrurgijn/ die gecureert hadde den cyrurgijn arnde busscop voir die/ cuere vand(er) q(ue)tsue(re)n die hij ontfange(n) hadde ind(er) voirs(creven)/ handelingen als een vanden ghenen die metten voirs(creven)/ janne luyten hadde geweest ten huyse des voirs(creven) jans/ ghijsbrechts en(de) dat dese gequetste gebracht wart ten huyse/ henr(icx) tsuys te he(re)ntals bijden voirs(creven) willem(me) laureys ende/ dat de selve willem seyde doet hem wel het sal/ betailt wordden Hopen(de) wair hij dese fame en(de) pointe(n) ald(us)/ gethoene(n) conste den rechte genoech sijnde en(de) dat des/ voirs(creven) jans luyten medeplegers dair toe bij hem gehuert/ wa(r)en want dingen wa(r)en mett(er) nacht geschiet die/ niet soe volcomelijck en wa(r)en te thoenen(e) want dair/ men sulcken stucken doen woude dair en haelde noch/ en riep men nyemande bij dat de voirs(creven) jan luyten hem/ volgen soude tot scharp(er) exami(n)acien om naird(er) van hem/ te weten(e) de wairh(eyt) in dien en(de) soe dat nae recht/ vand(er) stadt behoirt te gescieden Dair tegen de voirs(creven)/ jan luyten ontkynnen(de) dbijleggen vanden meye(re) dede/ seggen dat fame ov(er) yemande te goeden name staen(de)/ te thoenen zijne(n) live en(de) ee(re)n aengaen(de) soe hij hoopte niet/ lichtelijck te thoene(n) en es een quade tonghe viantscap/ oft haet en(de) nijt dragen(de) op yemande te goeden name/ staen(de) maict lichtelijcken en(de) eer een quade fame eer xxv/ goede lude die zouden connen gerestitue(re)n End(e) nae dien/ hij p(rese)nteerde te bewijsen met goede(n) ma(n)nen beyde meye(re)/ laten kercmeest(er)s van morchove(n) en(de) ande(re)n goeden ma(n)nen/ die van tijden huer(er) kynnissen gewoent en(de) verkeert hebbe(n)
//
omtri(n)t nord(er)wijck morchoven en(de) wickevorst en(de) kynnisse/ gehadt hebben vanden voirs(creven) janne luyten en(de) oic sijne(n)/ ouders en(de) voirseten dat hij altijt van sijnen jongen tijden/ gestaen heeft tot goed(er) name en(de) fame(n) v(er)keeren(de) huessche/ lijck inden voirs(creven) dorpen sijn broot ald(aer) met arbeyde wyn/ nen(de) voir donderhouden van sijne(n) wive en(de) kinde(re)n Ende/ dat de selve jan d(aer) voe(r) alnoch opden dach van heden/ van hen gehoude(n) wordt en(de) dat hij met sijne(n) gebue(re)n/ ten gewoenlijcken tijden de kercke en(de) ande(re) gods dienste(n) gefrequenteert en(de) besocht heeft en(de) dat hij nyet en hult/ dat de voirs(creven) goede ma(n)nen sijn getuygen oeyt wisten/ dat hij yemande bynne(n) sijne(n) tijde gequetst heeft oft mes/ handelt Hoopte oic dat men niet bevi(n)den en soude dat/ hij sijne(n) vader voirs(creven) oic gesmeten oft meshandelt hadde/ en(de) hem verwonderde zie(re) van des(er) c(ri)mineeld(er) belastinge(n)/ op hem nu geschiet nae dien dat hij ten scriven(e) vand(er)/ stadt civilic ontslagen was en(de) alhier dien acht(er)vol/ gen(de) ongehacht te rechte come(n) was en(de) hem wel/ srechts hadde dorren getroesten en(de) nae dien oic dat/ de ghene die hem hier mede hadde doen belasten/ te vreden soude hebben geweest met vijff r(inssche) gul(den)/ eens des hij hem gedroech totten he(re)n scepen(en) van loven(e)/ Soe sustin(eer)de hij eve(n)verre hij dat gethoene(n) conste/ dat hij d(er) voirs(creven) aenspraken ongehoude(n) soude sijn en(de)/ geliefde he(m) de hee(re) int p(ri)ncipael aen te spreken(e) dat/ hij dat doen mochte Wair op de meye(r) replice(re)nde/ en(de) de poirte(r) duplice(re)nde met div(er)sen reden(en) soe v(er)re/ dat p(ar)tien tot hue(re)n thoene gewijst sijnde de meye(r)/ voirs(creven) niet soe claer en thoende de pointe(n) bij hem/ bijgeleecht noch oic volcomen eendrechtige fame/ van dien noch met sulker eendrechtige(n) getuygenisse(n)/ in dien als dat den rechte genoech was om eene(n)/ man te goede(n) name staende t(er) scarp(er) exami(n)acien/ te bringe(n) en(de) hij he(m) oic afdroech des points vande(n)/ vad(er) geslagen te hebben en(de) de voirs(creven) poirte(r) thoende/ volcomelic sijn v(er)met voirs(creven) Soe v(er)re dat scepen(en)
//
van loven(e) uut(er)lic ind(er) saken gemaent gewijst hebbe(n)/ met vo(n)nisse dat de meye(r) inden name van onse(n)/ roomsche(n) coni(n)ck met sijnd(er) (con)clusien opden poirte(re) v(er)doolt/ es en(de) gelieft hem den selven poirte(re) int p(ri)ncipael aen/ te spreken dat hij dat doen mach cor(am) om(n)ib(us) scab(inis)/ in sca(m)pno dempt(is) boxhoren pynnock nove(m)br(is) xxviii