Vand(er) aenspraken die jan huycxken gedaen heeft op/ ja(n)ne cruypla(n)t cleermake(re) seggen(de) hoe hij tegen den selve(n)/ cruyplande in rechte gestaen hadde voir de manne(n) van/ cumptich van seke(re)n vruchte(n) vanden vie(re)endeele van vii/ dach(mael) weyen en(de) dat hij vand(er) ticht die de selve cruyp/ lant te hemweert gedaen hadde met eene(n) hootvo(n)nisse/ he(m) geleert bij scepen(en) van thiene(n) hue(re)n hoofde quijt gewesen/ was aengaen(de) den selven vruchte(n) En(de) dat de selve/ cruyplant nae dat tvoirscr(even) hootvo(n)nisse geluyt was/ gecome(n) was voir de voirs(creven) mannen seggen(de) en(de) clagen(de)/ in gramscape(n) en(de) erren moede en(de) mynd(er)nissen d(er) ee(re)n des/ voirs(creven) jans huycxken dat de selve jan huycxken was/ een hootdief en(de) dat hij sijnd(er) sust(er) goet gestolen hadde over/ xx ja(r)en en(de) dat hij dat goet doen woude en(de) sijne(n) voet/ bij stecke sette(n) En(de) dat die woirden geseecht wa(r)en om/ srechts wille en(de) om dat hij tvo(n)nisse verloren hadde ende/ dat dit al geschiet was boven dat de selve hoycxken/ altijt gestaen hadde en(de) alnoch stont tot goeden name/ en(de) fame(n) en(de) dat hij gehoude(n) was soe hij hielt voir eene(n)/ goeden rechtveerdige(n) man Dese pointe(n) oftse hem ontkint/ wordde(n) p(rese)nteerde hij te bewijsen hopen(de) wair hij dat/ conste gedoen dat de voirs(creven) cruyplant te voirde(r) want/ om srechts wille wa(r)e geschiet gehouden soude sijn hem/ dair voe(r) t(er) bet(er)nissen te doen(e) eene(n) wech te roome(n) eene(n)/ tsint jacops oft sulken bet(er)nisse alse de he(re)n scepen(en) wijsen/ souden hen des gedragen(de) totten rechte Dair tege(n) de/ voirs(creven) cruyplant hem v(er)antweerden(de) ontkinde de voirs(creven)/ woirde alsoe geseecht te hebben(e) en(de) tgene des hij geseecht/ mocht hebben mocht sijn alleene in manie(re)n van clachte(n)
//
oogen(de) en(de) clagen(de) aldair dongelijck dat de voirs(creven) hoycxken/ in dien gedaen hadde en(de) anders niet oic soe en hadde hij dat/ in p(rese)ntien vanden selve(n) janne huycxken niet geseecht met/ meer woirde(n) en(de) wed(er)woirden Tende(re)nde alsoe d(er) aenspra/ ken ongehoude(n) te sijne e(m)mer dat de voirs(creven) jan huycxken/ te vroech op wa(r)e want hij alnoch niet geabsolveert/ en was noch quijtgewesen van tgene des de voirs(creven)/ cruypla(n)t hem ov(er)geseecht mocht hebben hebben de scepen(en)/ van loven(e) den voirs(creven) hoycxken tot sijne(n) thoene ge/ wesen die welke volcomelic thoende sijn ver/ meten vande(n) voirs(creven) rechtvorderingen voir de manne(n)/ geschiet en(de) den hootvo(n)nissen dair mede hij quijt gewe/ sen wert En(de) voirt hoe jan cruypla(n)t nae den vo(n)nisse/ quam aenden meye(re) en(de) seyde in p(rese)ntien van twee/ ma(n)nen dat jan hoycxken sijnder suster goet dieflic/ gestolen hadde en(de) dat die ma(n)nen seyden dat hen/ dat te lastich wa(r)e tonthoude(n) en(de) dat hij dat q(ua)me/ seggen voir de mannen en(de) dat hij dat dairnae ghinc/ seggen voir de mannen en(de) dat hij dat woude goet/ doen en(de) voet bij stecke setten zij weten oic wel dat/ het in erren moede gesciede en(de) om dat hij tvo(n)nisse/ verloren hadde Thoende voirt mette(n) selve(n) getuygen/ dat zij wynners noch verliesers en wa(r)en ind(er) voirs(creven)/ saken ende dat zij noeyt meer en hoirden dan te/ dien tijde de voirs(creven) jan hoycxken en hadde altijt/ gestaen en(de) noch stont tot goed(er) namen en(de) famen en(de)/ dat zij hem hielden voir eenen goeden rechtveerdigen/ man Ende desen thoen aldus volleyt en(de) partien/ ind(er) saken gesloten hebbende de scepen(en) gemaent/ wijsden met vonnisse dat de voirs(creven) cruyplant ge/ houden soude sijn den voirs(creven) janne hoycxken t(er) bet(er)/ nissen te doene eene(n) wech te melanen darweert te/ porren bynnen xl daigen naistcomen(de) ende goede/ wairheyt dair aff te bringen nae der stadt recht/ oft dair aff sijnen goede(n) moet te gecrijgen in scampno/ cor(am) eisd(em)