Nae dien dat bijden raide vand(er) stat come(n) sijn vranck/ carbeel machiel boeg(ar)t jan van thuydekem en(de) meer ande(re)/ van wegen des dorps en(de) d(er) ingeseten(en) van wincsele/ t(er) eende(r) die ald(air) bescreve(n) hadden doen bescrive(n) met des(er)/ stadt brieve(n) ja(n)ne boeg(ar)t ja(n)ne boeg(ar)t vorste(r) ald(air) en(de)/ dat te dien ynde dat de selve jan met hen contribue(re)n/ soude in alle lasten van beden en(de) ande(re) gebuerlijcke lasten/ gelijck ande(re) bove(n) en(de) beneden en(de) den selve(n) ja(n)ne t(er) and(er)/ sijden Ald(air) de selve vanden dorpe aensochte(n) den selve(n)/ ja(n)ne te doen(e) des voirscr(even) steet D(air) inne hij hem weyg(er)lijc/ gemaict hadde ov(er) langhe(n) tijt sond(er) yet te willen geve(n)/ hopen(de) dat hij niet exempt sijn en soude bove(n) ande(re)/ mair soude (con)t(ri)bue(re)n gelijc de ande(re) ingeseten(en) bove(n) en(de)/ beneden daden nae advena(n)t va(n) sijne(n) goede(n) en(de) bewinde/ en(de) plegen sdorps recht gelijc ande(re) en(de) d(air)toe oplegge(n)/ en(de) betalen alsulken resten als hij tacht(er) mocht wesen/ van vii oft viii ja(r)en voirlede(n) als van beden en(de) ande(re)/ lasten bijden voirs(creven) dorpe d(air)enbynne(n) gegeve(n) en(de) betailt/ d(air)aff hij gheen uutreyckinge gedaen en hadde D(air)tege(n)/ de voirs(creven) jan hem v(er)antweerden(de) heeft geseecht hoe dat/ hij en(de) sijn voirsete(n) als vorsters en(de) dieneers vanden selve(n)/ dorpe gheen bede in voirleden(en) tijden betailt en hadden/ noch gewoenlijck en wa(r)en te betalen(e) mits div(er)sen/ dienste(n) en(de) carweyde(n) die hij en(de) sijn voirsete(n) mochten/ gedaen hebben en(de) dagelijcx dede den voirs(creven) dorpe/ hopen(de) alsoe dat hij d(air)aff als vorste(r) nu t(er)tijt van/ gheenre mynde(re) (con)dicien sijn en soude dan sijn voirsete(n)/ geweest hadde(n) en(de) hij in sijne(n) voirleden(en) tijde geweest/ wa(r)e geven(de) oic te kynne(n) dat dit soude moege(n) ge/ drage(n) in mynd(er)nissen vanden rechte m(ijns) gened(ichs) he(re)n/ voir hem en(de) toecomen(de) diene(re)n p(rese)nte(re)nde want der/ officien aenghinck d(air)aff te gaen(e) mette(n) voirs(creven) vande(n)/ dorpe opde rekencame(re) ons gened(ichs) he(re)n shertoge(n) in/in brab(ant) om p(ar)tien in wed(er)sijden ald(air) gehoirt de sake bijden selve(n)/ vand(er) raidcame(re)n geappointeert en(de) gedecideert te wordden(e)/ soe sij bevi(n)den soude(n) behoiren(de) Dair op de voirs(creven) vande(n) dorpe/ replice(re)nde seyden en(de) yerst op tgene dat sijn voirsete(n) noch/ hij gheen betalinge gedaen en soude(n) hebben (et)c(etera) dat dat hen/ gheen p(re)judijs drage(n) en mochte aengesien dat dat geschiet mocht/ wese(n) van gr(ati)en en(de) goed(er)tierenh(eit) dwelc hij tot gheend(er) (con)sequen(cien)/ noch rechte en conste getrecken aengesien dat nae d(er) instructie(n)/ opde bede gemaict a(nn)[o] li bijden state(n) vande(n) lande hij noch/ dier gelijcke p(er)sone(n) ald(air) niet exempt genoe(m)t en wa(r)en/ noch in ande(re)n plaetse(n) quijt en ghinge(n) en(de) op tgene des/ hij p(rese)nteerde van te gaen(e) opde rekencame(re) (et)c(etera) Seyde(n) sij dat/ sij hielde(n) dat de kynnisse va(n) des(er) materie(n) nerge(re)ns elders/ en behoirde navolgen(de) d(er) selv(er) instructie(n) dan voir de/ wethouders van des(er) stadt hen des gedragen(de) tott(er) selv(er) bliven(de)/ alsoe bij huer voirneme(n) voirs(creven) te voirde(r) wa(n)t de voirs(creven)/ jan groot en(de) divers beslach hielt va(n) beesten en(de) and(er)ssins/ soe va(n) he(m) selve(n) soe van ande(re)n en(de) dagelijcx meer alsoe/ soude moege(n) ae(n)neme(n) en(de) hem alsoe in dien willen be/ scudde(n) dwelc tegen god en(de) recht soude wesen den voirs(creven)/ ja(n)ne als bove(n) t(er) (contra)rien sustine(re)nde Es geappointeert en(de)/ uutgesproken de voirs(creven) instructie voir ooge(n) geleecht/ sijnde en(de) op al gelet dat de voirs(creven) jan boeg(ar)t sculd(ich)/ soude sijn in des(er) tegewoirdig(er) bede(n) en(de) oic in allen ande(re)n/ toecomen(de) beden en(de) lasten te (con)t(ri)bue(re)n gelijc ande(re) ingese/ ten(en) bove(n) en(de) benede(n) nae advena(n)t va(n) sijne(n) goede(n) En(de) oft/ gebuerde dat hij e(n)nige [executie] oft dienst va(n) sdorps wegen dade/ tot hue(re)n v(er)sueke d(air)aff hij sculd(ich) wa(r)e geloent te sijne dat/ hij d(air)aff sal moege(n) eyssche(n) en(de) neme(n) sijne(n) behoirlijcken solar(is)/ soe dat behoirt En(de) als vande(n) eyssche bij die vande(n)/ dorpe gedaen vande(n) voirleden(en) ja(r)en en(de) lasten hier te vo(r)en/ bij hen gelede(n) d(air)aff sij gelijc vo(r)e v(er)sochte(n) v(er)nuecht te/ wese(n) hebbe(n) de voirs(creven) wethoud(er)s beg(eer)t dat de voirs(creven)/ p(ar)tien d(air)aff mynlijc souden v(er)gade(re)n en(de) v(er)eenige(n) op dat/ sij conste(n) bij middele va(n) goede(n) ma(n)ne(n) En(de) op dat sij niet/ v(er)eenige(n) en conste(n) en(de) alsdan e(m)mers trecht soude(n) willen/ hebben dat sij d(air)aff quame(n) tot eene(n) ande(re)n gelegen(en)/ dage van rechte om dair aff gedaen te wordden(e)/ soe den raid bevi(n)den soude beho(r)ende In consilio/ opidi p(rese)ntib(us) ambobus burgim(a)g(ist)ris octobr(is) xxvi