Aldair bij den raide vand(er) stat es geco(m)par(er)t pet(er)nelle/ trouwants huysvr(ouwe) jans trouwants clagen(de) en(de) geven(de)/ te kynne(n) hoe de selve huer man wae(re) va(n) quaden
//
en(de) sobe(re)n regime(n)te en(de) levene ov(er)bringen(de) niet alleene de/ goede van sijnd(er) sijden gecome(n) mair oick de hue(re) soe v(er)re/ hij conste en(de) mochte en(de) met hae(re)n sculde(re)n afcoop ende/ compositie liet maken eer de rinte(n) oft pachte(n) gevallen/ wae(re)n en(de) huer allet ghene ontrock dat hij gecrijgen/ conste sond(er) huer yet te geven(e) om hue(re) dair op tont/ houden(e) alsoe dat zij armoede soude moete(n) lijden soe/ v(er)re huer d(air)op niet en wordde v(er)sien bidden(de) ende/ bege(re)nde d(air) om dat hue(r) geconsenteert geottroyeert en(de)/ v(er)leent wordde(n) aengesien des voirscr(even) es behoirlijke/ brieve(n) van bevelen aen alle officie(re)n om bedwonge(n)/ te hebben(e) alle de ghene die e(n)nige goede oft rinte(n)/ sculdich sijn oft sulle(n) houden oft sculdich sijn va(n) huer(er)/ sijden gecome(n) dat zij huer oft hue(re)n spe(ci)alen geco(m)mitte(eer)de(n)/ voirtane d(air)aff betalinge daden en(de) nyema(n)de anders/ op dwelck den voirs(creven) raid gelet hebben(de) bevi(n)dende/ de voirs(creven) beg(er)te redelijck sijnde heeft inder selver/ beg(er)ten geconsenteert en(de) gewillecort om hue(re) de voirs(creven)/ brieve v(er)leent en(de) gegeve(n) te wordde(n) en(de) oick bevel/ te gescieden(e) aende sculde(re)n hier bynne(n) die yet sculdich/ sijn oft sullen sijn van goeden en(de) rinte(n) va(n) huer(er)/ sijden gecome(n) en(de) dit (con)sent due(re)nde totte(n) wed(er)roepen(e)/ en(de) goetduncken(e) vand(er) stadt in (con)silio opidi nove(m)br(is) xix
//