Nae dien dat op hede(n) come(n) sijn bijde(n) raide vand(er)/ stadt h(er) jan piers prieste(r) jaspar van ov(er)wynghe/ henrick van ravescote ende meer ande(re) ingeseten(en) poirters/ gegoedt wesende te wynghe t(er) eenre tegen willem(me) meest(er) jans/ janne vekeman ende meer ande(re) geco(m)mitteert van desselfs/ dorps wege(n) van wynghe t(er) ande(r) zijde(n) Aldair de voirs(creven)/ poirt(er)s ende ingeseten(en) van des(er) stadt te kennen gaven/ hoe dat hue(r) goede(n) aldair in rastem(en)te gedaen en(de) geleet/ wa(r)en bijden voirs(creven) vanden dorpe om te contribue(re)n in/ zeke(re) gelufte(n) bij hen gedaen zeke(re)n p(er)soene(n) als zij seyde(n)/ te weten(e) he(re)n cornelise van berge(n) ridde(r) ende ande(re)n/ Dair van de selve ingeseten(en) hoepte(n) ongehoude(n) te wese(n)/ ende hue(r) goede in dien los te hebbe(n) mits zeke(re) voir/ t(er)minacien in desen gewesen voe(r) den raide vand(er) stadt/ opte(n) [vacat] dach van [vacat] lestlede(n) te voirde(r) oic/ want dese co(n)tribucie ende laste(n) bijde(n) state(n) vanden/ lande noch bij ov(er)geven(e) van des(er) stadt niet geco(n)senteert/ oft ov(er)gegeven en wa(r)en ende zij alhier te scote ende/ te lote van alle(n) cont(ri)bucien staen moesten hopen(de)/ dair mede te gestaene zonder voirde(r) gepraemt
//
te wordde(n) te voirde(r) oic want ten tijde vand(en) voirs(creven)/ t(er)minacien genoech bevonden wert dat de behoefte die/ die van hale(n) ende wynghe hebben mochte(n) om eenige/ pe(n)ni(n)gen inne te heffen bij hem geloeft alleene spreken(de)/ was op dingeseten(en) vanden bedrive van halen en(de) dair/ omtrint gesete(n) ende soude wesen een quade co(n)sequencie/ dat der ingeseten(en) goede in alle laste(n) die de dorpe(n) oft ande(re)/ soude(n) moege(n) consente(re)n ap(ar)t altijt gelast souden worden/ dair zij egheen consent inne gedrage(n) en hadde(n)/ hopen(de) alsoe in dien dat de voirs(creven) vanden dorpe hue(r)/ goede hieraff ongemoeyt soude(n) laten ende trastement/ af te doene als voe(r) Dairop de voirs(creven) vande(n) dorpe/ sustineerden de contrarie nae de behoefte die zij meynde(n)/ te hebbe(n) te voirde(r) als zij seyde(n) dat he(n) niet moegelijck/ en was hue(r) lasten te drage(n) op he(n) selve(n) ind(en) co(n)tribucien/ vand(en) ingeseten(en) goede(n) Es alsoe op al gelet sijnde/ ende oic bevonden dat de voirs(creven) van wynge mette(n)/ laste vande(n) getracteerde(n) peyse als niet en co(n)tribueerde(n)/ ende oic gelet sijnde op de voirs(creven) t(er)minacie uutgesproke(n)/ ende getermineert dat der ingeseten(en) goede van/ des(er) stadt aldair liggen(de) in des(er) co(n)tribucien ongelast/ sulle(n) blive(n) ende dat deselve vanden dorpe/ trastem(en)t bij hen gedaen oft doen doen costeloes en(de)/ scadeloes sulle(n) sijn af te doene alsoe dat genoech/ zij In consilio opidi maii xxviii