It(em) henrick spoeyens sone wijle(n) henricx in p(rese)ntia/ heeft genome(n) en(de) bekint genome(n) te hebben t(er) hellicht/ wynni(n)gen tege(n) ja(n)ne blidelevens de lande/ desselfs jans liggen(de) in drie aerde te houde(n)/ te hebben en(de) te wynne(n) in hellicht wynni(n)g(en) als/ vo(r)e van halfm(er)te anno negentich eene(n) t(er)mijn/ oft getoenste van sesse jae(re)n lanck v(er)volgen(de) Elcx/ jairs d(air)enbynne(n) om en(de) voe(r) deen hellicht va(n)d(en)/ vruchte(n) d(air)op jairlijcx wassende met conditien/ en(de) voirw(er)de(n) v(er)redent te beyd(en) zijde(n) dat de voirs(creven)/ henrick de lande wel en(de) loffelijck zijne(n) t(er)mijn/ due(re)nde wynne(n) werve(n) en(de) mesten sal en(de) zayen/ tijtverdichlijck en(de) op getijdege vo(r)en en(de) met alsulck(en)/ greyne als ja(n)ne dat believe(n) sal het sij met/ tarwen oft half tarwe en(de) half bruyn core(n) ond(er)/ een gemynct en(de) de zom(er)vrucht met alsulken/ greyne alst ja(n)ne believe(n) sal te weten(e) met gherste/ oft evene Ende de wynne sal leve(re)n en(de) doen/ den zaet van jae(re) te jae(re) dieme(n) op deselve lande/ zaeyen sal sond(er) des voirs(creven) jans cost oft last en(de)/ de voirs(creven) wynne sal ten oeghste alle tcoren ende/ greyn op de voirs(creven) goede wassen(de) jairlijcx picken/ en(de) doen picken opt velt gelijck reengenoeten/ ende alst tcoren tijtverdich es bijnden oick gelijc/ reengenoete(n) en(de) soe wa(n)neer dat tcoren gebond(en) es/ sulle(n) de voirs(creven) wynne en(de) jan tvoirs(creven) coren opt/ velt gelijckelijck deylen It(em) es voirw(er)de dat de/ voirs(creven) wynne des voirs(creven) jans coren ierstwerf inde/ schue(re) sal moete(n) vue(re)n It(em) de voirs(creven) jan sal moege(n)
//
dersschen en(de) doen dersschen wa(n)neer dat hem/ belieft ende wa(n)neer hijs een oft twee mudd(en) gederssche(n)/ sal hebben es voirw(er)de dat de voirs(creven) wynne/ gehoude(n) sal sijn alsdan tvoirs(creven) coren te vue(re)n te/ thiene(n) oft o(m)megaens vissenaeke bynne(n) eend(er)/ milen dairt den voirs(creven) ja(n)ne believe(n) sal op sijne(n)/ cost en(de) alsoe moete(n) vue(re)n allet tcoren en(de) greyn/ des voirs(creven) jans It(em) es voirw(er)de soe wa(n)neer de/ voirs(creven) jan aldair derschet oft doet derssche(n) dat/ de voirs(creven) wynne gehoude(n) [sal sijn] den derssche(r) den/ montcost te geve(n) en(de) de voirs(creven) jan de dachue(re)n/ betale(n) It(em) de voirs(creven) wynne sal jairlijcx sculdich/ sijn den voirs(creven) ja(n)ne te leve(re)n en(de) te geve(n) driehond(er)t/ walme en(de) elken walm van eene(n) veltscoeve/ en(de) alsmen die walme sal v(er)decken en(de) ald(air) sal plecke(n)/ sal de voirs(creven) wynne den deckers en(de) pleckers/ den montcost geve(n) sond(er) des voirs(creven) jans cost/ It(em) sal de voirs(creven) wynne gehoud(en) sijn allen den/ leem die de huyse behoeve(n) selen tsijne(n) coste en(de)/ laste aen te halen en(de) te vue(re)n Ende soe wa(n)neer/ de voirs(creven) jan de schue(r) doet ond(er)slaen sal de/ voirs(creven) wynne gehoude(n) sijn den ty(m)merliede(n) en(de)/ pleckers den montcost te geve(n) It(em) de voirs(creven) wynne/ sal gehoud(en) sijn de voirs(creven) huyse wel en(de) loffelijck/ vand(er) und(er)ster rijckelen ned(er)wert te houd(en) op/ sijne(n) cost en(de) last It(em) es voirw(er)de en(de) ond(er)sproken/ dat de voirs(creven) wynne jairlijcx betale(n) sal acht/ sister corens aen sieck gasthuys uute(n) gelege gaen(de)/ sond(er) cost des voirs(creven) jans It(em) es voirw(er)de dat/ de voirs(creven) jan sal moege(n) behoud(en) en(de) orbe(re)n tsijne(n)/ proufijte den sulde(r) bove(n) dwoenhuys op ende/ af te gaene vroech ende spade alst hem believe(n)/ sal sond(er) begrijp oft argelist It(em) es oick voirw(er)de/ dat de voirs(creven) jan sal hebben va(n)d(en) voirs(creven) wynne/ half de jonge duyve(n) ende half tdoeft en(de)/ dat sele(n) sij tsamen doen lesen te gelijcken coste/ mair de wynne sal gehoud(en) sijn te geve(n) den
//
leesers den montcost ende de wynne sal oick/ gehouden sijn des voirs(creven) jans gedeelte vande(n)/ oefte thuys te vue(re)n soe wa(n)neer dat hem believe(n)/ sal It(em) de voirs(creven) wynne sal gehoud(en) sijn jairlijcx/ den voirs(creven) ja(n)ne te winte(re)n drie coye ende oick/ een vercken ond(er) de sijne tot s(in)te lambrechtsmesse/ toe It(em) de voirs(creven) wynne sal gehoud(en) sijn alle stroe/ comen(de) vand(en) lande des voirs(creven) jans tot goede/ meste te bringe(n) ende hij en sal gheen mest stroe oft/ walme moege(n) vercoepen ende wilt de voirs(creven)/ wynne e(n)nich mest coepen dat sal de voirs(creven) jan/ half moete(n) betalen Ende wilt hij merghelen soe/ sal de voirs(creven) jan den voirs(creven) wynne cortte(n) voir elke(n)/ dach dat hij mergelt eens mans dachue(re) oft/ eene(n) [werck]man hem sette(n) en(de) de wynne sal hem den/ montcost geve(n) It(em) de voirs(creven) wynne sal moete(n) houd(en)/ allen gossen dair de watere vlieten wel ende/ loffelijck dat de voirs(creven) jan d(air)af aen sijn land(e) egheen/ scade en lijde en(de) de lande laten ten lesten jae(re) goet/ ende effene en(de) oick dat block grechten en(de) vreden/ wel en(de) loffelijck ten lesten jae(re) It(em) de voirs(creven) wynne/ sal hebben ende houden vand(en) voirs(creven) ja(n)ne den/ grooten beempt arnts poelen beempt pet(er)s spapen/ beempt en(de) den druegen beempt aent tfelt ende/ opden driesch tsjaers om en(de) voe(r) twintich lichte/ gulden(en) vallen(de) jairlijcx s(in)te mertensmesse ende/ de huering(en) vand(en) voirs(creven) beemd(en) sele(n) innegaen/ en(de) uute gelijck de lande voirs(creven) It(em) de wynne/ en sal gheen hout moege(n) houwen oft truncken/ dan wielien ende popeleere(n) om hagen mede/ te vredene en(de) de voirs(creven) wynne sal jairlijcx/ moeten setten xii oft xiiii poet(en) inde beemde/ It(em) de voirs(creven) wynne sal moete(n) laten den som(er)/ corens aert te weten(e) de wolmersheyde ten leste(n)/ jae(re) en(de) ten sijne(n) afscheydene wel en(de) loffelijck gewonne(n)/ te twee vo(r)en en(de) gebroken mett(er) eeghde(n) wel en(de) loffelijck
//
ende de braeke eens wel geackert ende den/ wint(er)core(n)aert wel gedreve(n) met vier ghetidege/ vo(r)en ende geseyt gelijck reengenoete(n) Ende want/ deselve wynne bekint heeft sculdich te sijne den/ voirs(creven) ja(n)ne sijne(n) meest(er) yerst van twee p(er)den tweelf/ rinsgulden(en) van eend(er) coe vier rinsgulden(en)/ It(em) noch vijff mudd(en) evene(n) noch acht halst(er) gherste(n)/ noch ix halst(er) harts coren noch een mudde graeuwe(n)/ erte(n) tiensch(en) [Item] noch drie moelevate(n) boene(n) noch twee/ sister erten It(em) noch een ploech mett(er) coppelen en(de)/ een eeghde Soe sal hij gehoude(n) sijn die sijne(n) meest(er)/ op te legge(n) en(de) te restitue(re)n bynne(n) drie jae(re)n naistc(omende)/ elcx jairs tderdel d(air)af quol(ibe)t ass(ecu)[tu(m)] [En(de) alle dese vorw(er)de(n) (et)c(tera)] cor(am) hoeve(n)/ buetsele junii vii