Vand(er) clachte(n) die arnt hanckart voirmaels heeft/ doen doen met joese peysman vorste(r) voir henr(icke)/ van ravenschote en(de) reymboute cnape reyners/ wijtfliet poirt(er)s op ja(n)ne gila topprebaix voe(r) de so(m)me
//
van tweelff croene(n) en(de) dat hij tot hem te segge(n)/ hadde gelijck dat mette(n) selve(n) vorste(r) en(de) poirt(er)s/ bij voirgaen(de) vonness(en) van scepen(en) op hue(re)n eedt/ alsoe gecleert es dairaff deselve arnt tvonnesse/ versueken(de) inde banck voir meye(r) en(de) scepen(en) van/ loven(e) de selve scepen(en) t(er) manissen smeyers gewijst/ hebben want den selve(n) scepen(en) mits d(er) lancheyt/ vand(en) tijde niet inde(n)ckich en was vand(en) vonnesse/ d(air)mede sij de(n) selve(n) arnde gewesen soud(en) hebbe(n)/ gehadt op sijne(n) thoen vand(en) voirste(r) en(de) poirt(er)s/ te aenho(r)en dat deselve arnt soude doen blijke(n)/ vande(n) selve(n) vonnesse en(de) d(air)entinde(n) recht alsoe/ dat deselve arnt ten naiste(n) daige d(air)nae dede/ opdoen hoe die clachte gesciede int uutgaen/ vand(er) maent octobr(is) lestlede(n) oft d(air) omtr(int) ende/ dair nae t(er)stont wairt hij vonneslijck op sijne(n)/ voirs(creven) thoen gewijst meyne(n)de t(er)stont d(air)mede/ voirtgeva(r)en hebben mair en was hem dat/ niet moegelijck geweest want reyners/ cnape voirs(creven) deene vand(en) vand(en) getuyge(n)/ die zed(er) in hollant en(de) buyte(n) lants hadde/ geweest alsoe dat mits dien al hadde hij/ sijn getuyge(n) te meer stonde(n) doen dagen hij/ die mits der selv(er) absen(tien) om volle(n) thoen te/ leyden niet en hadde conne(n) gecrige(n) voir nu/ onlancx als deselve reymbout wed(er) comen/ was en(de) aldus desen aengesien en(de) oick aengem(er)ct/ dat hijs he(m) gedroech tot e(n)nige(n) vand(en) secretar(issen)/ dat hij hen versocht hadde tvoirs(creven) vonnesse/ d(air)mede hij in desen op sijne(n) thoen gewesen/ was te teekene(n) die hem geantw(er)t hadden/ datmen yerst pleech te teekene(n) als de uut(er)lijcke/ vonnessen gewesen wa(r)en en(de) dat dairo(m)me/ dat was bleve(n) ongeteekent niet meynen(de)/ dat reyners cnape soe lange absent soude/ gebleve(n) hebbe(n) Alsoe dat scepen(en) h(ier)op wed(er)/ gemaent sijnde vonneslijck gewijst hebbe(n)/ datme(n) den voirs(creven) ja(n)ne gilla h(ier)op bescrive(n)/ soude en(de) hieraff adverte(re)n o(m)me tot eene(n)/ beteeken(de) daige oft hem geliefde h(ier)op gehoirt
//
te wordde(n) en(de) te allegeren(e) des hem soude moege(n)/ gelieve(n) tot sijnd(er) defensien en(de) redene(n) tege(n) tv(er)reycke(n)/ op hem versocht Acht(er)volgen(de) den welke(n) deselve/ arnt op heden wed(er) gecompareert es inde banck/ voir meye(r) en(de) scepen(en) van loven(e) aldair hij heeft/ doen lesen de copie van eene(n) brieve vand(er) stadt/ wege(n) gescreve(n) aend(en) selve(n) ja(n)ne gilla hem intime(re)nde/ vand(er) voirs(creven) procedue(r)en en(de) vonness(en) van v(er)eycke(n)/ op en(de) tegen hem versocht voe(r) de voirs(creven) so(m)me/ en(de) vand(er) depositien vand(en) voirste(r) en(de) poirt(er)s en(de)/ besceyende hem dach om tselve vervolch op dat/ hij conste te scutte(n) alh(ier) te compare(re)n tot eene(n) zeke(re)n/ voirleden(en) daige die diende opte(n) v[te(n)] dach/ februarii lestlede(n) en(de) die tot op heden verstreke(n)/ es tot welke(n) daige noch oick op heden deselve/ jan gilla nyet gecompareert en es en(de) deselve/ arnt hem gep(rese)nteert heeft en(de) doen blijcken bij/ rappoirte jans vand(en) bossche d(er) stadt bode dat/ hij den selve(n) brief ten huyse desselfs jans gedrag(en)/ heeft en(de) dat hij den selve(n) brief dair gelate(n) heeft/ want hij den selve(n) ja(n)ne nyet thuys en vant/ noch en wist te vynde(n) Ende aldus sustineerde/ ut(er)lijck deselve arnt met sijne(n) gelev(er)den voirspreke/ wair deselve jan niet en compareerde voe(r)/ den opstaene smeyers en(de) d(er) scepen(en) dat hij den/ selve(n) ja(n)ne vand(er) voirs(creven) clachte(n) en(de) voe(r) de so(m)me/ d(er) selv(er) vonneslijck v(er)reyct soude hebben te voird(er)/ oick want hij sijn scult p(rese)nteerde te ve(r)ifice(re)n/ met sijnd(er) eedt Alsoe dat scepen(en) van loven(e)/ h(ier)op gemaent gewijst hebben met vonnesse/ wair de selve jan gilla nyet en compareerde/ voe(r) dopstaen smeyers en(de) d(er) scepen(en) dat hij dan/ vand(er) selv(er) clachte(n) v(er)reyct soude sijn opde voirs(creven)/ p(rese)ntacie bij arnde gedae(n) Act(um) cor(am) o(mn)ib(us) scabinis/ in scampno dempto pynnock februarii xvii[a]