Nae dien dat op heden bijde(n) rade vand(er) stadt sijn/ gecompareert meest(er) henrick van ev(er)ghem geswoirne/ stadt meest(er) t(er) eenre die ald(aer) ontbod(en) hadde ja(n)ne/ vand(er) stappen ja(n)ne van maelcote pete(re)n baelge/ en(de) machiele vand(en) berghe maerscalck t(er) ande(r) zijd(en)/ seggen(de) en(de) v(er)sueken(de) deselve meest(er) henr(ic) navolgen(de)/ zeke(r) t(er)mi(n)atien tande(re)n tijden gewesen als d(er) wet/ kenlijck mochte wesen want hij hem in dien/ hadde pijne(n) te quijte(n) te weten(e) dat hij he(m) hadde/ versien van alhier te hebben tot eene(n) zeke(re)n gelegen(en)/ dage bij hen in wed(er)sijden dair toe genomen te/ weten(e) opten lesten dach der maent voirleden der/ stadt geswoirne meest(er) van bruessele om te visente(re)n/ dwerck bij he(m) ind(er) clerck capellen gestelt bove(n) s(in)t/ anthonijs outaer Dair tege(n) deselve gedaighde/ als momboirs vand(er) voirs(creven) capellen ten tijde/ als de come(n)scap gebuerde sculdich hadd(en) geweest/ te hebben de stadt meest(er) van mechelen oft e(n)nig(en)/ ande(re)n dient he(m) hadde belieft gesworen wercman/ sijnde ten ynde dat sij tselve nae recht soud(en)
//
hebben gevisenteert en(de) ov(er)bracht wes zij dairaff/ hadden bevonde(n) om te geraken(e) tot sijnd(er) geeyscht(er)/ scult tande(re)n tijden opgedaen d(aer)van hij alnoch in/ gebreke was t(er) so(m)men van hondert en(de) xl rinsgul(den)/ oft d(aer)omtr(ent) oft des he(m) nae recht comen soude/ tvoirs(creven) werck gevisenteert sijnde Dwelck de selve/ momboirs niet geacht(er)volcht en hadd(en) mair hadde/ sijne(n) gesworen(en) meest(er) tot sijne(n) coste en(de) te v(er)gheefs doen/ come(n) hopen(de) alsoe deselve meest(er) henrick dat de/ voirs(creven) gedaichde(n) in dien v(er)steken soud(en) wesen en(de)/ dat he(m) sijn geeyschte schult voirs(creven) volgen soude/ metgaders den costen vand(en) meeste(r) voirs(creven) die/ hij ontboden hadde en(de) te v(er)gheefs als voe(r) loopen(de)/ deselve costen iiii(½) rinsgul(den) nae dlanck v(er)volch/ en(de) groote moitenisse van ix maenden oft d(aer)omtr(ent)/ dat hij sijn gebreck v(er)volcht mocht hebben Dair/ tege(n) de voirs(creven) gedaichd(en) seyden dat he(n) stuck/ niet en wae(r) mair der faculteyt van arte(n) als/ ov(er)ste der selv(er) capellen en(de) van m(ijn) vrouwe(n) w(er)di(n)ne/ he(re)n jacops van halde(re) ridd(er)s die uut crachte/ vand(en) testame(n)te he(re)n jans uuyte(n) lyemi(n)gen hue(re)n/ voirman dese gebreken moeste cuelen en(de) drage(n)/ en(de) dat alsoe meest(er) henr(ic) hen te v(er)gheefs moedde/ Dairop de voirs(creven) meest(er) henr(ic) replice(re)nde seyt/ dat hij tegen nyema(n)de gecomenscaept en hadde/ dan tegen hen hem des gedragen(de) tott(er) cedulle(n)/ vand(er) come(n)scape en(de) die dair bij wae(re)n en(de) dat/ de voirt(er)mi(n)ac(ien) bijd(er) wet gegeve(n) van tvoirs(creven)/ werck nae recht te doen visente(re)n (et)c(etera) [(et)c(etera)] om tselve/ gerapporteert bijd(er) wet ind(er) geeysscht(er) schult/ nae recht gedaen te wordden soe behoe(re)n soude/ gegaen en(de) gewesen wae(re)n op hen en(de) en hadde noch/ de faculteyt noch m(ijn) vrouwen te volgen and(er)s dan/ hen mair zij wae(re)n wijs en(de) vroet wes zij voirts/ te doene mochten hebben Bliven(de) bij zijn v(er)sueke voirs(creven)
//
met meer woerdden in weerzijd(en) geallegeert es/ geappointeert en(de) uutgesproken bijd(er) selv(er) wet/ dat de voirs(creven) gedaichde al noch eens voir al eene(n)/ gelegen(en) dach sulle(n) neme(n) om tvoirs(creven) werck bijde(n)/ geswoirnen(en) meest(er)s oft meest(er) he(n) des v(er)staen(de) die zij/ in weerzijd(en) sullen moege(n) bringen en(de) neme(n) nae/ recht gewisenteert te wordden en(de) d(aer)entinden hue(r)/ cleerniss(en) ov(er)bringen en(de) doen d(er) wet oft tselve/ navolgen(de) d(er) comenscape(n) en(de) patroen gemaect es oft/ en es en(de) wes d(aer)aff soude moege(n) wesen en(de) hue(r)/ cleerniss(en) in dien doen bijd(er) wet om alsdan gedaen/ te wordden alsoe behoe(re)n soude aengaen(de) d(er) geeyscht(er)/ scult en(de) dat op elck in sijne(n) rechte in dien v(er)steken/ te zijne Ende dat de voirs(creven) costen vande(n) iiii(½) r(ins)gul(den)/ soud(en) blive(n) berusten(de) totten ynde van desen act(um)/ in cons(ili)[o] opidi martii xxii