Vand(er) aenspraken die gheerit yngelbrechts gedaen/ heeft tot joose van mulcke oft zijnen procur(eur) inde banck/ voir meye(r) ende scepen(en) van loeven(e) vand(er) so(m)men/ van sesse hondert negentich goud(en) gulden(en) viii(½)/ stuv(er)s hem gebreken(de) soe hij seyde vand(er) so(m)men van/ derthien hondert seven gulden(en) te twintich stuv(er)s den/ gulden ende achthien gelijcke stuv(er)s op welke so(m)me/ hij gheerit bekynde betaelt te wesen(e) vierhondert/ goud(en) gulden(en) te xxiiii stuv(er)s tstuck soe dat hem noch/ resteerde de voirs(creven) zesse hondert neghentich goud(en) gulden(en)/ viii(½) stuv(er)s navolgende eend(er) cedullen gescreven/ ende gehanteekent bij jacoppe de cassele(re) begrijpende/ soe hij seyde dat de selve jacop inden name van hem/ selven ende oic van wegen des voirs(creven) joos va(n) mulke/ bekynde ontfangen te hebben vand(en) voirs(creven) gheeritte/ de voirs(creven) so(m)me van xiii[c] vii gulden(en) te xx stuv(er)s/ tstuck ende xviii gelijcke stuv(er)s vand(er) daet dece(m)br(is)/ xv a(nn)[o] xcii Seggende ten ande(re)n male de/ selve gheerit dat deselve cedulle was gescreven/ ende geteekent bijd(er) hant des voirs(creven) jacops/ de cassele(re) Ten derde male dat corts voe(r)/ sint andriesmesse lestleden de voirs(creven) joos van/ mulke was comen inde stadt van antwerpe(n)/ ende hadde aldair gehouden co(mmun)icatie ende sprake/ metten voirs(creven) jacoppe de cassele(re) zijne(n) medegeselle/ van huer(er) beider hanteringhen ende dat joos dair/ bekent hadde dat jacop ende joos wae(re)n een lude/ te wetene wes jacop gedaen hadde ov(er) langhen/ tijt van pe(n)ni(n)gen tontfangen(e) uutgeven(de) van/ coma(n)scapen te doene oft anderssins dat/ joos van mulke zijn medegeselle in dien was
//
ende met hem zuet ende zuer deylde/ alsoe wel ind(er) saken den voirs(creven) gheeritte aengaen(de)/ Ten vierden dat de voirs(creven) gheerit omtrint s(in)t/ andriesavont lestleden inden roosen(en) hoet wesende/ binne(n) des(er) stadt bijd(en) voirs(creven) joese ende den selve(n)/ joese gevraeght hebbende Joes hebdi niet geloeft/ wes pe(n)ni(n)gen ic hier bringhe dat ic zal/ ombedrogen bliven ende egheene faulte noch/ fraude van betalingen dairinne vinde(n) De selve/ joes dairop antwerde gheerit ic kynne dat/ ic u dat toeseyde mair doen was ic zijn/ geselle ende nu en bi(n)nicx niet geweest/ Ten vijfsten male dat deselve joos van/ mulke tege(n) ada(m)me van cav(er)chon bekint/ hadde dat hij jacops geselle was seyde/ voirts de selve gheerit ten zesten en(de) lesten/ male hoe de selve joos aenden voirs(creven) jacoppe/ de cassele(re) als zijne(n) medegeselle gescreve(n)/ hadde tot div(er)se stonden div(er)se scutbrieven/ dair uut m(er)kelike(n) bleeck dat zij tsamen/ wae(re)n geweest twee gesellen van allen/ hue(re)n coma(n)scapen bewinde ende hanteri(n)ghe(n)/ die gesciedde(n) ten huyse des voirs(creven) jacops/ tantwerpen Dese ende meer ande(re)/ poenten hem dienende tot zijnd(er) (con)clusien/ soe verre die bijd(en) voirs(creven) joose oft zijne(n) procur(eur)/ ontkyndt werdden ende die in feyte gelegen/ wae(re)n p(rese)nteerde deselve gheerit te thoene(n) en(de)/ metten mynsten te gestaene hopende voe(r)/ zijn (con)clusie wair hij dat gedoen conste dat/ de selve joos gehouden zoude zijn hem zijn/ rest vand(en) voirs(creven) vi[c] negentich goud(en) gulden(en)
//
viii(½) stuv(er)s te voldoene te voirde(r) oic want de/ voirs(creven) zijn geselle als geruymt hem opde kercke/ onthielt Dairtegen de voirs(creven) joos hem/ verantwerden(de) dede seggen dat hem van des(er)/ des voirs(creven) gheerits voirnemen(e) ende aenspraken/ niet genoech en conste verwonde(re)n hopende dat/ hij die tonrechte op hem hadde gedaen soude d(air)aff/ met vonnesse wordden geabsolveert bij div(er)sen/ reden(en) ende middele(n) die hij tot dien ynde/ dede seggen Ende yerst dat hij joos ende/ jacop decassele(re) bijd(en) voirs(creven) gheerit gealleg(eer)t hebbe(n)/ gehouden verscheyden woeni(n)ghen ende taflen/ Ten ande(re)n male dat hij met ande(re)n div(er)sen/ coopluden div(er)se coma(n)scapen gehanteert heeft/ ende coma(n)scape(n) gedaen dairinne de voirs(creven)/ jacop decassele(re) p(ar)t noch deel en hadde/ Ten derden male dat omtrint den uutga(n)ge/ vand(en) bamesm(er)ct lestleden als robrecht zas/ woude procede(re)n ende execuetien doen opde/ goede des voirs(creven) joes ende dat doen(de) v(er)socht/ heeft te doen co(m)me(re)n ende raste(re)n de haeffelike/ goede oft pe(n)ni(n)gen den voirs(creven) joese toebehoe(re)nde/ sijnde in handen oft onder den voirs(creven) jacoppe/ decassele(re) ende dat de voirs(creven) jacop de cassele(re)/ dairop doen antwerde p(rese)nte(re)nde bij eede ten/ heyligen taffirme(re)n dat hij niet onder/ en hadde den voirs(creven) joese toebehoe(re)nde dat/ hij metten zelven joese oic niet te doen/ en hadde hem belanck en was mair/ dat zij van malcande(re)n gesceyden wae(re)n/ ontkynnen(de) dbijleggen des voirs(creven) ae(n)legg(er)s
//
inden principaelste(n) poente e(m)mer van dat hij in des/ den voirs(creven) gheerit oft zijne(n) pe(n)ni(n)gen soude moeghen/ aengaen medegeselle zoude sijn geweest vand(en) voirs(creven)/ jacoppe oft bewint d(air)aff gehadt hebben oft oic dat hij/ van gheerit yet onderhadde oft ontfangen Dwelc/ e(m)mer zijn moeste soude hem gheerit yet co(n)nen/ geeysschen en(de) opdat hem gheerit met e(n)nighen/ kennessen oft geluften woude behulpen die gesciet/ zouden zijn geweest bij joesen den voirs(creven) jacoppen/ des(er) sculden ende ande(re)n aengaen(de) ten huyse der weduwe(n)/ gielis wijle(n) vande(n) wijng(ar)de D(air)tege(n) seet hij ende/ p(re)senteerde te bewijsen(e) dat tghene des dair gebuerde/ tusschen hen beyden dat was meer met bedwa(n)ge/ en(de) niet met wille en(de) dat hij ald(air) inden huyse/ gehouden werdt een lange wijle tijts van eene(n)/ daghe ende nachte ende tot dien gedreyght geva(n)ge(n)/ gehoude(n) te werden(e) ende ut(er)lijck was hij bijden/ dreygeme(n)ten soe verre bracht dat hij joos seyde/ Ic moet wel bekenne(n) dat ghij bekint wilt/ hebbe(n) eer hij van dair mochte ende soela(n)ghe/ dat dair gebue(re)n mochte tgene dairop de/ voirs(creven) gheerit hem funde(re)n wilt Dese en(de)/ meer ande(re) poente(n) bijd(en) voirs(creven) verweerde(r) oft/ zijne(n) procur(eur) bijgeleeght soe die nairde(r) blijcke(n)/ inde(n) int(er)rogatorien nabescreve(n) staen(de) en(de) geex/ tendeert metten depositien in dien d(air)op gedaen/ inden thoen desselfs verweerders oft hem die/ ontkint weerde(n) ende zij in feyte gelege(n) wae(re)n/ p(rese)nteerde de selve joos oft sijn procur(eur) te thoene(n) den/ rechte genoech zijnde ende metten mynsten/ te gestaene hopende tot zijnd(er) conclusien/ die bij zijnd(er) wed(er)p(ar)tien bekynt oft bij hem/ gethoent der aenspraken ongehouden te zijne/ Hebbe(n) de scepen(en) van loeven(en) t(er) manissen
//
smeyers beide p(ar)tien gewijst tot hue(re)n thoene/ ende ten daghen dairtoe dienen(de) heeft de voirs(creven)/ gheerit yerst geexhibeert op dierste article voirs(creven)/ de voirs(creven) cedulle gescreve(n) ende gehanteekent soe hij/ seyde bij jacoppen de cassele(re) dairmede de zelve/ jacop inde(n) name va(n) hem selve(n) ende oic van wegen/ des voirs(creven) joos bekynde vand(en) selven gheerit/ ontfangen te hebben de voirs(creven) so(m)me van xiii[c] vii guld(en)/ gelijc die selve cedulle hier nae volght van/ woirde te woirde jh..? m..? a(nn)[o] lxxxxii xv dece(m)bri/ ic jacob kassellere voe(r) my ende inden name van/ joesen vanden mullijc mijne(n) medegeselle in desser/ come(n)scap kenne gerekent hebbende inde(n) name/ oic als voe(r) met geert inelbert van griminghen/ te bij sijne van van lauerijs mumijs inde karsse/ tandwarpe(n) en(de) berwijn de meyere vleeschouwere/ beyde po[r]tterz tandwa[r]pen dat ic en(de) joes voirs(creven)/ end(e) elc van ons een voir al sculd(ich) blijve(n) van/ ontfange(n) pe(n)ninghe(n) dije wij alz voe(r) ontfange(n)/ hebbe(n) vand(en) voirs(creven) gherede vand(en) iid(en) dach nove(m)bri/ tot xviii daghe nove(m)bri xiii[c] vii guld(en) xx stuv(er)s/ voe(r) den guld(en) en(de) xviii stuv(er)s dairop wij betaelt/ hebben wij den voers(creven) gherede betalt den zeste(n) dach/ nove(m)bri iiii[c] goud(en) gulden tot xxiiii stuv(er)s stuc resten/ wij hem end(e) elc eijn voer al vi[c] lxxxx goude(n) guld(en)/ viii stuv(er)s e(n) half in ke(n)nijss(en) van dess(er) Soe hebbijc/ jacop voers(creven) tot onser beijd(er) behoeff dijt gescreff(en)/ e(n)d(e) mijn hantteijken mijtte[r] penne(n) hyer onder/ gemaect op spatijc des briefs in datu(m) bove(n) gescr(even)/ Aldus geteekent jcasselere Tweeste/ article des voirs(creven) gheerits heeft geaffirmeert/ jan bruegelman ende op tselve heeft gecleert/ gueken neve des voirs(creven) joos dat hijt(er) niet aff/ en weet oft zijn hant es oft niet
//
Opt derde voirs(creven) article des voirs(creven) gheerits heeft/ gecleert de selve guedeke(n) dat hem kenlijck is/ dat zij tsamen gesellen hebben geweest hier/ voirmaels mair oft zij gescheyden zijn oft niet/ des en weet hij niet Opt selve heeft gecleert/ de voirs(creven) jan bruegelman dat hij d(air)bij geweest heeft/ dair zij tsamen aten ind(er) stadt van antwerpen/ ende dat jacop doen seyde tot joese onder ande(re) woirde(n)/ Wij hebben onse saken ende hanteri(n)gen tot nu tsame(n)/ gedaen laet ons voirt doen dat de lude(n) geco(n)tenteert/ wordde(n) ende dat joos d(air)op antweerde dat hij noyt/ wille noch gedacht en hadde van he(m) te sceyden(e)/ ende als zij al ge(re)kent hadden dat joes noch wel/ drie duysent rijck zijn soude bekennende ald(air)/ genoech dat zij tsamen hue(r) hanteri(n)gen altijt/ gedaen hadden Cleerde oic deselve jan dat joos/ aldair oic genoech cleerde ende seyt tot jacoppe(n)/ dat zij(n) meyni(n)ge niet en was van hem te/ sceyden(e) de voirs(creven) gherit en soude betaelt werden/ Opt selve hebben gecleert voe(r) der stadt van/ antwerpen gesciet bij ov(er)geven(e) van p(ar)tien/ gelijc dat blijct bij c(er)tificatien der zelv(er) stadt va(n) antw(er)pe(n)/ vand(er) daet duysent vierhondert drie ende/ negentich s(e)c(un)da maii claes jongelinc dieme(n)/ heet ind(en) hage ende dierick van oete(re)n met/ opgerichte(n) vynge(re)n ende bij gestaefden eede/ lijflijck aenden heylige(n) gehouden en(de) gesworen/ Te weten(e) inden yersten claes jongelinc dat/ hem wel kenlijck is dat hij omtrint sint/ andriesdach lestleden dairbij ende mede geweest/ is ten huyse vand(er) weduwe(n) gielis wijle(n) vande(n)/ wij(n)g(ar)de aldair hij hoirde seggen en(de) bekenne(n)/ joese van mulke ende jacoppe de cassele(re) dat
//
alle de hanteri(n)gen die zij gedaen hadden tot dien dage/ toe was een ende een ende dat de voirs(creven) joos jacops/ medegeselle was Tuyghde voirts dat hij oec/ hoerde beclagen den voirs(creven) joese ende jacoppe dat he(n)/ zee(r) leet was dat zij eenen geheete(n) gheerit engelbrechts/ dair zij tande(re)n tijden vele vrintscappen mede gehadt/ hadden soe vele sculdich wae(re)n Seyden oec dat/ zij wel wouden dat zijt eenen ande(re)n sculdich geweest/ hadden ende dat zij oec doen t(er) tijt hielden raet/ hoe zij den zelven gheerit betalen soude(n) moegen/ Ende de voirs(creven) dierick van oete(re)n tuyghde oec bij/ zijnen eede als voe(r) dat hem wel kenlijck is dat/ hij oec dair bij ende mede geweest is aldair de/ voirs(creven) joos seyde totten voirs(creven) jacoppe zijnen/ medegeselle dat hij wel wilde dat hij den/ voirs(creven) gheerit niet sculdich en wae(re) om deswille/ dat zij seyden dat zij vele vrintscapen met hem/ gehadt hadden Dairop de voirs(creven) dierick antw(er)de/ totten voirs(creven) joese ende jacoppe ghij zijt nu/ bij malcande(re)n hulpt malcande(re)n oft ghij zijt/ eeuwelijck bescaempt Dairop joos antwerde/ seggende dat willic doen d(air)om soe bi(n)nic hier/ comen seggende oic doen de voirs(creven) joos tot jacoppe/ zijnen medegeselle en sorght niet al en/ hebben wij nu gheen ghelt hier hebbic noch/ eenen brieff van loeven(e) dien hij doen uut/ zijne(n) boesem track ende seyde die van loven(e)/ sijn ons beiden noch sculdich xxvii[c] bourg(ondische) guld(en)/ wij sulle(n) hem wel betalen zonder fraude/ en(de) argelist Tvierde article des voirs(creven) aenlegg(er)s/ affirmeert bij eede willem van assche alsoe dat steet
//
Opt selve tuyght jan de nausnyde(re) aff(ir)me(re)nde bij eede/ dat gheerit joese vraeghde oft hij niet en kinde dat hij/ de pe(n)ni(n)gen hem hadde doen dragen tot jacops de/ cassele(re) en(de) dat die dair wel verwaert souden zijn/ ende dat hij d(air)op antwerde jay Tvijfste article/ cleert en(de) aff(ir)meert soe dat steet adam van cav(er)chon/ ende dat joes d(air)toe seyde al w(ar)t datmen seyde dat zij/ gesceyden wae(re)n dat dat nochtan niet en was/ Opt vi[te] en(de) leste article heeft de selve gheerit/ geexhibeert seven missiven die joos van mulke/ gescreve(n) soude hebben aende(n) voirs(creven) jacoppe de cassele(re)/ van div(er)sen hanteri(n)gen die zij alst schijnt met/ malcande(re)n gehadt souden hebben die hier nae volge(n)/ ende geinsereert zijn jacop gemi(n)de vrient/ ic laet u weten dat ic noch egheen antweerde/ en can gecrijgen vand(er) stadt It(em) die stadt heeft dien/ van gronyngen die assijse vand(en) vleshuys en(de) vand(en)/ vischm(er)ct in handen geset It(em) ic heb iii voed(er) ii aeme/ goets wijns gecocht het cols voed(er) ...? om l rinsg(ulden)/ corent It(em) betaelt jacop vand(er) heggen wijncoep(er)/ hondert xxxvi guld(en) corent hij bidt om nye/ vieryser of om goud(en) guld(en) te xxiiii stuv(er)s in die/ dat u niet en hyndert wantmen mach hem/ met alder leye ghelt betalen It(em) ic sal u/ eene(n) wissel brieff senden vand(en) i[c] xxxiii guld(en)/ ende ic sal u corts dat ghelt senden vand(en)/ volle(n) en(de) meer dat ic ontfanghe en(de) scrive(n)/ u als ic die antwoirde heb vand(er) stadt/ met meer dan god zij met u Item/ siet nae cloeck hij sal u xx guld(en) geven/ ende scrijft my oft u jan cloeck wat gheeft/ oft niet Aldus ondergescreven bij my
//
joese van mullick Ende boven den eersamen jacop/ casselaer tantwerpe(n) op ons(er) liev(er) vrouwe(n) kerchoff mijne(n)/ goeden vriendt It(em) jacop gemi(n)de vriendt ic gebiede/ my zee(r) tot u ic heb eene(n) br(ief) van u ontf(angen) ende/ redelic verstaen als dat ghij in groeten last zijt/ en(de) ic in egheen cleyn last It(em) oft ic goet had in/ uwen huys dat en can egheen man doen raste(re)n/ want opt gewijdde is alsoe en hebt ghij niet in dier/ manie(re)n van my ende oic spreken alle ander brieve(n)/ op my en(de) niet op u als vanden sculde(re) It(em) wolde/ laurens oskens met robrecht spreken en(de) dat wij/ quitan(cie) namen als vand(en) osterlinck en(de) oec van/ robrecht ende elc van hend(er) hant als eckt? een/ quitan(cie) soe soude ic raden dat wij dat betaelden/ in dien dat hij ons cortte(n) soude onse sculden die hij/ ons sculdich is ende want hij oec nu(m)mermeer betuge(n)/ en zal des gheens des hij seydt van ov(er)tugen ten/ wae(re) sake dat ghijt zelv(er) geseydt hadt It(em) ic heb/ met art cloet gesproken ende doen alle dingen bereet/ maken It(em) ic sende u die vi scaelen dair ghij/ om scrijft ende wilt myt allen dinghen het beste/ doen Aldus ondergescreven Bij my joese/ vand(er) mullick Ende boven den eersamen/ jacoppe(n) casselair tantwerpen mijne(n) bijsond(er)/ goed(en) vrindt It(em) jh..? m..? a(nn)[o] gr ii septe(m)ber/ gemi(n)de vriendt jacop ic gebiede my zee(r) tot/ u ende laet u weten hoe dat ic egheenen/ rinswijn meer en hebbe noch garschongen/ oec niet vele alsoe wilt coepen drie oft/ vier amen rinssen most die wat suetmu(n)dich/ zij Ende oec iii oft iiii amen cleren ryns/ wijn degoet zij cu(n)dien redelijc coep gecrijgen
//
Ende sendet my t(er) stont op eene(n) waghen wa(n)t hier/ inde stadt noch gheenen most en is noch claren ryns oec/ de dooch Ende en kundi den claren niet gecrijgen soe/ sendt my den most t(er) stont op eenen waghen ende/ dan sal ic u hansken senden en(de) xl oft 50 guld(en) met/ hem ende ic sal dan oic eens dair come(n) wijlt/ god die u gespae(re)n wil in gesu(n)de gescr(even) te loven(e)/ datu(m) bove(n) It(em) jacop ic en scrive niet om den wijn/ om dat ic gherne tappen soude mair om dat/ nyema(n)t m(er)ken en soude dat wij van dair trecke(n)/ wille(n) my is gewairschult dat zij ons anders vorde(r)/ cancelier te rechte stellen souden als zij hans rocke(n)borch/ gedaen hebben Aldus ondergescreve(n) bij my joese/ vander mullick Ende bove(n) aende(n) eersame(n) jacoppe/ cassellere tantwerpe(n) mijne(n) bijsunde(re)n goed(en) vrient/ It(em) jacop gemi(n)de vriendt ic gebiede my zee(r) tot/ u ende ic heb eenen br(ief) van u ontf(angen) ende wel/ verstaen It(em) ghij scrijft my dat ic t(er) stont dair/ comen soude die gemechtige van peet(er) in die/ kers hebbe(n) my zelv(er) geseeght die zij lacht/ hebbe(n) om my te doen raste(re)n diet vervolght/ van blasius balbani weghen die hevet my/ ooc gesacht dat hij my raste(re)n soude mair/ scrijft my wa(n)neer ghij te berghen werdt/ trect dan sal ic t(er) stont come(n) ende trecken/ myt te berghen ende brenghe(n) oec alle gereetscap/ myt van instrume(n)ten ic heb vast gebeyt/ om te siene woe arndt cloet ende ande(re)/ vaeren souden Item ic ben tot sentruyden/ geweest ende heb groot geluc gehadt dat
//
ic niet geva(n)gen en ben van dien va(n) are(n)borch/ xiii ruiters hebben my in een dorp gejaeght/ en(de) in die kercke en(de) opte(n) toren vand(er) kercken/ ende dat ic gedaen heb tot sintruyden sal ic u/ segge(n) als ic dair coem It(em) ic sende u i l(i)b(ra) x s(cellingen)/ witgelt xi hors postelatus vii oude postelat(us)/ v goud(en) r(ins)g(ulden) v beyers ii croene(n) ii duc(aten) i ongers/ duc(ate) drie scaelen weg(ende) xvii onsse(n) ic en kan/ gheen gelt gecrijgen van dam of nyema(n)t al/ soude ic vastende slage(n) gaen en(de) een cleyn wat(er)pot/ ic meyn dat ghij binne(n) acht daghe(n) te berge(n) w(er)t/ trect met meer dan u god gespae(re) langhe/ gesont Aldus ondergescreve(n) bij my joese/ vand(er) mullick Ende bove(n) den eersamen/ jacop kasselaer tantw(er)pen come desen brieff/ mijne(n) besunde(re)n goede(n) vriendt It(em) gemi(n)de/ vriendt jacop ic gebiede my zee(r) tot u wet dat/ ic x daghe lanck te bedde gelege(n) heb en(de)/ sieck ben van groet(er) ongenuechte(n) die ic heb/ om der stadt wil art cloet is dair twee/ daghe geweest ende hij heeft cleyn antworde/ gehadt die meyer seyde hem drie male in/ mijnd(er) p(rese)ntien arnt sprect loesselijck want ic/ hier van u egheen harde woirden en wil hoe(re)n/ ic byn myt soeten melc opgehouden en(de) die/ borg(er)meesters en gave(n) hem egheen antwoirde/ mer die meyer seydt ons doet u beste dat/ ghij moeghe en(de) u arghste It(em) ic ben huiden/ den viii den dach april tot beide die borgemeest(er)s/ ende de stadt geweest ende heb zee(r) vrindelijck/ gebeden om die doot die god starff dat zij
//
ons hulpe(n) woude(n) want wij om der stadt wil hebbe(n)/ verloren ons goet ons eere ende ons neri(n)ge ende/ dat wij altoos bereet zijn geweest voe(r) die stadt het/ zij met borghe(n) te zijne oft te leene(n) oft in wat/ manie(re)n het geweest is het is al v(er)ghete(n) men/ antwoirde my hebt patientie Aldus en dorven/ wij ons niet verlaten dat wij te loven(e) e(n)nich/ ghelt meer crijgen zulle(n) met vrintscapen/ It(em) ghij moet van stonden aene hier comen/ ende dat wij besien hoe wij het beste doen/ zulle(n) oft wij moegent beide laten staen ende/ gaen broot bidden want souden wij al betalen/ dair wij borghe(n) voe(r) zijn ende van hen niet/ ontf(angen) ons goedt en soude niet toe reyke(n) It(em)/ en hadden gheen pande van ja(n)nes heyms soe/ wart my zee(r) leet dat ghij hem geborght/ hadt wa(n)t hij wel half gefaelgeert is ende hij/ es ons noch wel lxx rinsg(ulden) sculdich als ic/ u wel seggen sal want ghij moet tot hier/ comen ende dan salic u wel seggen hoe ghij/ myt robrecht lene(n) zult want al moet wij/ verlegge(n) soe en moeten wij mair dat derdeel/ gheve(n) ic heb hier vii oft viii l(i)b(ra) ic woude wel/ dat ghij daer hadt nyemant en wilt foeren/ met meer dan god zij met u Aldus ond(er)gescr(even)/ Bij my joese vand(er) mullick Ende boven/ den eersamen mijne(n) besunder vriendt jacop/ casselaer tantwerpe(n) op ons(er) vrouwe(n) kerchoff/ It(em) jacop gemi(n)de vrient ic gebiede my zee(r)/ tot u ic heb vele woirde(n) met robrecht zas/ ende ii daghe met hem gehouden alsoe/ zijn wij geaccordeert It(em) als van den xii l(i)b(ra)
//
die ghij hem ov(er) een jair geleent hebt die zulle(n)/ ons cortten ende den gouden rinsguld(en) tot xxii/ stuv(er)s alsoe maket net x l(i)b(ra) xvi s(cellingen) sterlincx/ behoudelijck dat ic moet ten heiligen zwe(re)n/ dat ic of ghij hem dat ghelt als xii l(i)b(ra) niet/ gegeven en hebben vand(er) stadt wegen mair geleent/ It(em) als vande(n) xii l(i)b(ra) die robrecht ontf(angen) heeft/ vande(n) cloest(er) van achel dair op seyt hij opdat/ ghij hem sculdich zijt xv oft xvi l(i)b(ra) It(em) het/ is gemaict dat hij inhoude(n) zal vi l(i)b(ra) op u scult/ ende vi l(i)b(ra) die sulle(n) ons cortte(n) die vi l(i)b(ra) make(n)/ iiii l(i)b(ra) xvi s(cellingen) sterlincx ende dit is ge(re)kent tot/ sterlincx ghelt ende men sal besien myt wat/ ghelt dat robrecht betaelt alsoe gelt mote(n) wij/ geven It(em) noch cort corneelis zas ii verke(n) van/ xiii s(cellingen) vl(aem)s zwair ghelt It(em) noch cornel(is) zas/ een gelach bij die vriesen iiii stuv(ers) It(em) robrecht/ i wyn gelach iiii stu(vers) noch hadde robrecht twee/ luide te gast gebede(n) vi stu(vers) voir hen in wyn in/ ons huis dyt sult ghij cortte(n) It(em) en sat(er)dach soe/ moet ghij die rest vand(en) xl pond(en) betaele(n)/ ende sult dese p(er)ceele(n) cortte(n) hier bove(n) en(de) sult/ niet late(n) ghij en nempt een quita(n)tie vand(en)/ oest(er)linck ham dat hij kent ontf(angen) te hebben/ van u of my xl l(i)b(ra) sterlincx of alsoe ghelt/ als ghij betaelt van alsoe borchtocht als ic voir/ die van loven(e) borghe ben geweest It(em) ic sal/ u wat ghelts senden ende oic wat zilv(er)/ mair ic en ders myt dese(n) bode niet senden/ It(em) ic sende u een cleyn os ghij eet g(er)ne/ magher vleesch dat zee(r) vet is ghelt hier/ groot ghelt wilt ghij verken hebbe(n) dat
//
uutbiedt my m(er) zij zijn zee(r) dier It(em) ic heb/ ons instrum(en)t tot mechele(n) doen maken art cloet/ meynt dat wij noch wat beid(en) hij meynt dat/ de officiael va(n) bruessel ons dinck wel doen zal/ It(em) wilt my die telde senden ic sal tot s(in)truyd(en)/ rijden en(de) corts bij u come(n) wilt my i(½) moeken/ sel souts senden It(em) scrijft my alle dinck robrecht/ gheet hier al streyen acht(er) strate(n) ic hope dat/ ons de stadt vand(en) ander borchtocht losse(n) zal/ Aldus ond(er)gescr(even) bij my joese vand(er) mullick/ Ende boven aen den eersamen jacop kasselaer/ tantw(er)pen mijne(n) besu(n)de(re)n goed(en) vriendt/ It(em) ...? ...? 10? mey a(nn)[o] gr...? gemi(n)de vriendt/ jacop ic gebiede my zee(r) tot u ende ic heb eene(n)/ brieff van u ontf(angen) ende wel v(er)staen soe wet dat/ ic volge van daghe te daghe ende heb een supplicatie/ den hee(re)n en(de) den meye(r) ov(er)gegeven dair alle onse/ rekenscap inne staet va(n) beginsel totten ynde ende/ soude g(er)ne een ynde met hen maken mair ic en can/ dair niet toecomen nochtans soudic wel scincken/ in een ende in ander als ic u wel seggen zal/ als ghij hier compt ov(er) meer dan xxv l(i)b(ra) f...? It(em) te/ weten als vande(n) huyse datme(n) ons doen soude en(de) dat/ wij onse schult in assijse(n) make(n) souden ende datme(n)/ ons voir pantelljoens gelt een assijse inde hant/ setten soude mair my grouwelt zee(r) al make(n) zij/ compact met ons datme(n) ons niet houden en zal/ want zij hue(re) woirden gheen macht en gheven/ En(de) doet de merck fijns gouts gheen mirakel/ het wae(re) noot datmen elken vele gave ende dat/ wij met vele en behelden god betert dat ons dair/ toe come(n) is compt alsoe geringhe hier als ghij/ moeght It(em) coopt ons ii vaten putauwi(n) de goet/ sijn It(em) ic heb gecocht xl oft xlv vierdele(n) coers/ liggen(de) tantwerpe(n) op tsant inde v herynge(n) opde
//
seewse merct los ende vry de vierdel om xxviii stuv(er)s/ i oert mij(n) gaet tot dair en(de) besiet dat coere(n) wij moege(n)/ u lien mair de coopman niet en(de) ic salt hier betalen soe/ scrijft my wat gemeten heeft anders soude ic u gelt gesonde(n)/ hebben ende sult den wert dese(n) brieff gheven dat/ coere(n) licht mair en vercoept noch gheen coere(n) de/ vierdel is hier wel opgeslagen binne(n) x daghe(n) wel/ vii stuv(er)s ende moghet opde(n) solder laten liggen ter/ weeke(n) om ii stuv(er)s de coepman vand(en) coeren hiet/ wout(er) van loeter van thiene(n) Item ic sende u eene(n)/ brieff met eener obligatien van jan m(er)tens wilt/ dair dilige(n)tie in doen gelijc hij ons scrijft ic soude te/ berghe(n) secretelijc gecomen hebben haddijc een eynde/ vand(er) stadt gehadt It(em) ic segge altijt hier wij/ betaelt hebben pantheljoene(n) ii duysent andries/ gulden(en) oft d(air)omtrint Ende wij en hebbet niet/ meer ontf(angen) dan vii[c] dar omtrent moegh di oec/ seggen oft u meest(er) ph(ilip)s oft yemant vraeghde/ niet meer dan v god gespare in gesonde en(de)/ coopt ons oic een vat pallette(n) dat goet is want/ icker mer een pijpe meer en hebbe Aldus ond(er)/ gescreven bij mij joese vanden mulke Ende boven/ aenden eersamen jacop casselere mijne(n) bijsunde(re)n/ goeden vriendt te berghe(n) oft tantwerpen Welke/ thoen aldus volleydt zijnde bij lancheyd(en) va(n) tijde/ ende div(er)sen uutstellen mits dat de voirs(creven) getuygen/ tsamen op eene(n) dach niet en hadde(n) geweest te/ vergade(re)n Ende oic ut(er)lijck met c(er)tificatien vand(er)/ depositien van so(m)megen der getuygen gelijc voe(r)/ volleydt zijnde heeft de voirs(creven) joos verweerde(r)/ ten daghe van thoene in dien dienen(de) ov(er)gegeven/ en(de) geexhibeert zeke(re) gescriften bij formen van/ int(er)rogatorien alsoe die hier nae volgen van/ woirde te woirde met oic der depositien vanden/ getuygen dairinne genoempt volgen(de) elc/ zijne(n) pointe ende article soe verre die alhier
//
inde banck hebbe(n) gedeponeert int(er)rogatorien joos/ vand(en) mulck verweerde(r) tegen gheerde ingelbrechts aenlegge(r)/ Inden yersten salmen manen robbrechte zas anthoenise/ vanden broeke weert inden roeden leeu den amman/ geheeten lanceloet van ursel meeste(re)n cornelise/ henrici ende cornelise zas oft hen niet kenlijck/ en is dat de voirs(creven) joos ende jacop casselair hebben/ verscheyden woeni(n)ge ende cost gehouden ende dat/ joos ten coste ende tafelen gegaen heeft vanden voirs(creven)/ anthoenise ende tot adriaens verhagen inden/ pelgrem robrecht zas affirmeert dit article/ It(em) men sal manen den voirs(creven) robrechte anthoenise/ laureyse oskens ende cornelise oft hen niet/ kenlijck en is dat de voirs(creven) joos come(n)scap gedaen/ heeft van lijwaet engelsche laken(en) met pete(re)n van/ sulp ende met meer ande(re) ind(er) tijt doen de voirs(creven)/ joos met jacoppen oec come(n)scapte ende d(air)inne/ jacop cassele(re) voirs(creven) part oft deel inne en hadde/ noch oic d(air)aff t(er) wy(n)ni(n)gen noch te verliese en stont/ robrecht zas deponeert op dit article dat hij wel/ weet dat joos ende jacop div(er)se coma(n)scape(n) gedaen/ hebben mair vande(n) p(ar)te vand(en) wynnen en(de) v(er)liesen/ en weet hij niet/ It(em) men sal manen den amman robrechte zas anth(onise)/ inden roeden leeu meeste(re)n cornelise henrici/ laureyse osken ende cornelise zas voirs(creven) oft/ hen niet kenlijck en is ende oft zij niet dair/ bij ende aen geweest en zijn dair robrecht/ zas recht versocht heeft ende heeft willen doen/ co(m)me(re)n ende arreste(re)n zeke(re) haeffelike goede oft/ pe(n)ni(n)gen die de selve jacop onder soude gehadt/ hebben in handen alsoe hij seyde ende den selven/ joese toebehoe(re)nde robrecht zas aff(ir)meert dit article/ en(de) oic dat de cassele(re) p(rese)nteerde ten heiligen te zwe(re)n
//
dat hij met joose niet te doene en hadde zed(er)t/ der sinxen(en) merct/ It(em) den selven dat doen de voirs(creven) jacop bekinde/ ende seyde dat hij niet onder en hadde den voirs(creven) joese/ toebehoe(re)nde noch aen den selven niet belanc en was/ noch dat hij met den selven joose niet te doen en/ hadde noch joos met hem mair dat zij van/ malcande(re)n gescheyden wae(re)n d(air)aff hij p(rese)nteerde/ zijnen eedt ten heyligen te doene It(em) oft dit niet/ en gesciedde alsoe voirs(creven) is inden uutganck vand(en)/ bamesse merct nu lestleden Ende dese articlen/ aff(ir)meert de voirs(creven) robrecht gelijc voe(r)/ It(em) oft den selven niet kenlijck en is dat de selve/ jacop een costelijck huys heeft doen ty(m)meren ende/ maken tantwerpen op onser liev(er) vrouwe(n) kerchoff/ bynnen ende zedert der bamesse merct voirs(creven) dair/ inne joos voirs(creven) gheen seggen part noch deel en/ heeft ende oick zonder aensien desselfs joes bijd(en)/ welken dat blijct dat zij vanden ande(re)n ov(er)lang/ gescheyden wae(re)n robrecht zas deponeert dat hij/ he(m) thuys heeft sien doen maken mair vanden/ deele en weet hij niet/ Item men manen robrechte zas ende anthoenise/ inden leeu voirs(creven) oft hen niet kenlijck en is dat/ joos vand(en) mulct voirs(creven) ende desselfs anthoenis/ huysvrouwe bynne(n) drie jae(re)n h(er)weerts tsamen/ come(n)scap van lijne(n) laken(en) gedaen hebben d(air)inne/ jacop cassele(re) part noch deel en hadde in enig(er) manie(re)n ende desgelijcx dat joos voirs(creven) bynne(n)/ den selven tijde metten selven robrechte ingelsche/ laken(en) scaerlaken(en) ende meede gecocht heeft/ dair inne jacop voirs(creven) part noch deel
//
en hadde robrecht zas aff(ir)meert dit article en(de)/ dat jacop dair gheen deel inne en hadde dat hij weet/ It(em) men sal manen pete(re)n van sulx godevart boelart/ ende hansken van trie(re)n oft hen niet kenlijck en is/ dat joos vand(en) mulct en(de) peet(er) van sulp voirs(creven) tegen/ robrechte zas ende meer ande(re)n gecocht hebben binnen/ den selve(n) tijde hondert ende tweendertich yngelsche/ laken(en) ende die wed(er)om tsamen te vranckvoirt v(er)cocht/ hebben zonder jacoppe d(air)aen e(n)nich p(ar)t oft deel te hebbe(n)/ hansken van tryere seeght op dit article dat hij bijde/ coma(n)scap niet en was mair qua(m) yerst bij he(n) te coele(n)/ doen de laken(en) gecocht wae(re)n mair heeft joose ende/ pete(re)n hoiren seggen dat jacop d(air)aen niet en deylde/ ende weet wel dat de laken(en) te francvoirt v(er)cocht wae(re)n/ It(em) men sal manen goirde boelarts hansken van triere/ ende janne bruegelman oft hen niet kenlijck en/ is dat t(er) tijt doen joos lestwerve(n) tantwerpe(n) was/ inden huyse jouffr(ouwe) alijt vande(n) wijng(ar)de zweg(er) des/ voirs(creven) jacops omtrint den xxv[ten] dach nove(m)br(is) lestlede(n)/ aldair de selve jacop versocht aenden voirs(creven) joese zeke(re)/ brieven die hij hadde geordineert ende gescreve(n) oft/ doen ordine(re)n ende scriven bijden selve(n) joese de selve/ brieve gesegelt te hebbe(n) dwelc de selve joos egheenss(ins)/ doen en woude want die brieven alsulck wae(re)n/ dat hem dat egheenssins en stont te doene ende/ dat doen de voirs(creven) jacop dairop wed(er) antwerden(de)/ den voirs(creven) joese dreyghde te vangen en(de) geva(n)gen/ te houden tot dier tijt toe dat hij de voirs(creven)/ brieven soude hebben besegelt Ende dat dien/ acht(er)volgen(de) de voirs(creven) jacop den voirs(creven) joese bi(n)nen/ den huyse hiel ende dede bliven eene(n) dach ende/ eene(n) nacht Boelarts seet dat hij dair ontbode(n)/ was van joese ende dat hij joese hoirde seggen/ dat jacop brieve gescreven hadde mair hij die tuyght
//
en sach de brieve niet ende dat jacop woude die/ brieve van joese besegelt hebben ende dat jacop eene(n)/ groeten eedt zwoer joos en soude uuten huyse niet/ gaen zij en souden veraccordeert zijn ende dat jacop/ eene(n) dienae(r) woude doen halen om joese ald(air) met/ fortchen int huys te houden mair en weet niet/ hoe la(n)ghe joos dair bleeff ende hansken seeght/ dat hijt(er) niet aff en weet/ It(em) den selven goirde boelaerts hansken(e) van triere/ ende janne bruegelman oft hen niet keenlijc en is/ dat de selve joos vele coma(n)scapen gedaen heeft van/ engels laken(en) lijwaet silver goudt en(de) scaerlake(n)/ dair de selve jacop part oft deel aen en hadde/ ende bynnen dien tijde dat de voirs(creven) joos met jacop/ coma(n)scap gedaen en heeft Hansken affirmeert/ dit article/ It(em) den selven twee p(er)soenen ende ja(n)ne bruegelman/ oft hen niet kenlijc en is dat doen de voirs(creven) joos/ dat weyg(er)de aldair int huys gehouden en(de) gesloten/ was eenen dach ende eenen nacht lanc due(re)nde/ ende dat hem de selve jacop dreyghde mits der/ voirs(creven) weygeri(n)gen dat hij joese soude doen houden/ ende vanghen voe(r) de borchtocht dairvoe(r) hij stont/ voe(r) de stadt van loven(e) ende dat deselve joos doen/ seyde jacop wairom soudi dat doen want ic dair/ bij groetelijck belast soude wordden ic moet wel/ bekennen dat ghij bekynt wilt hebben mair/ o(m)mer en sal ic den brief oft brieven niet besegelen/ in e(n)niger manie(re)n Hansken seet op dit article/ dat hijt(er) niet aff en weet Boelarts seet/ als hij voe(r) geseet heeft dat joes de brieve niet/ besegelen en woude ende dat hem joos seyde/ dat hij aldair allen den dach geweest hadde
//
ende dat hij savonts met jacoppe uutghinc en(de)/ moeste jacoppe geloven met hem wed(er) te comen(e)/ mair zij en quamen gheen van beiden weder/ want jacop selve opden kerchoff ghinc des ande(re)n/ daigs/ It(em) den selven oft hen niet kenlijck en is dat/ dbekyn bij joese bekint geschiet is inde(n) gesloten/ huyse alsoe voe(r) verhaelt es ende bij bedwanghe/ van gevangen te zijne alsoe voirs(creven) is Boelarts/ ende hansken seggen dat zij hier bij niet geweest/ en hebben/ Tot allen desen p(rese)nteert de voirs(creven) joos vanden/ mulke zijne(n) behoirliken eedt dat hij vanden/ pe(n)ni(n)gen die gheert yngelbrechts in hande(n) casselair/ gesedt soude hebben alsoe hij seet niet en weet gehadt/ noch gesien en heeft noch d(air)aff wy(n)ni(n)ghe bate v(er)lies/ oft acht(er)deel geweten te hebben noch hij noch/ nyema(n)t van zijnen weghen dairaff bevel gegeven/ en heeft noch oic gheerde voirs(creven) niet toegeseeght/ noch beloeft en heeft/ De voirs(creven) productien ind(er) maten voirs(creven) te div(er)se/ daghen alhier inde banck gedaen zijnde heeft de/ voirs(creven) joos tot tween div(er)sen daghen van rechte/ geexhibeert twee open(en) brieven van c(er)tificatien/ der stadt van antwerpen inhouden(de) ende/ verclae(re)nde de deposicien ende getugenissen van/ diversen getugen alsoe die gedeponeert hebben/ voe(r) de wet van antwerpen op diverse articulen/ inden voirs(creven) int(er)rogatorien des voirs(creven) joos begrepen/ welke c(er)tificatien hier nae volgen(de) van woirde/ te woirde Allen den ghenen die dese l(ette)ren/ zulle(n) sien oft hoiren lesen ende zunderli(n)ge den
//
eerbae(re)n ende zee(r) wijzen hee(re)n den meye(r) borg(er)meeste(re)n/ ende scepen(en) vand(er) stadt van loeven(e) onse(n) goede(n)/ vrienden borg(er)meeste(re)n scepen(en) ende raidt vand(er)/ stadt van antwerpen saluyt Doen u te wetene/ ende c(er)tifice(re)n voe(r) de gerechte wairheyt dat acht(er)volgen(de)/ uwen l(ette)ren ons bijd(en) brenghe(r) van desen uwen bode/ gep(rese)nteert met zeke(re)n int(er)rogatorien van joose van/ mulck voe(r) u in rechte staende tegens gheerde/ engelbrechts dairinne besloten wij opden dach/ van heden ondergescreven vore ons metten rechte/ ontboden hebben ende doen comen in prope(re)n p(er)soenen/ ende onder dande(re) inde voirs(creven) int(er)rogatorien genoempt/ lancelot van urssele amman des(er) stadt op des(er) tijt/ ende janne bruegelman kerbindere onse ingeseten(en)/ poirters oudt omtrint xlv jae(re)n de welke opde/ voirg(eruerde) int(er)rogatorien ondervraeght zijnde hebben/ Te wetene de voirs(creven) lanceloot van urssele bijden/ eede dien hij onsen ald(er)genadichste(n) he(re)n ende des(er) stadt/ tot zijnre offitien gedaen heeft en(de) de voirg(enoemde) jan/ bruegelman bij zijnen eede hem bij ons lijflijc aend(en)/ heiligen gestaeft zijnde getuyght en(de) geaff(ir)meert/ thgene ende alsoe hier nae volght Ende yerst/ de voirs(creven) amman ov(er)hoort op dierste poent vand(er)/ int(er)rogatorien voirg(eruert) van dat joos voirs(creven) ende/ jacop casselee(re) verscheyden woeni(n)g(en) en(de) tafle/ gehouden souden hebben (et)c(etera) seydt dat hij d(air)aff/ niet en wiste te tuygene It(em) ondervraeght/ op tderde poent der zelv(er) int(er)rogatorien oft hij/ dair bij ende mede geweest hadde daer robrecht/ sas recht v(er)sochte om te doen co(m)meren ende/ arreste(re)n zeke(re) haeffelike goede oft pe(n)ni(n)ghen/ die jacop casselee(re) onder soude hebben gehadt
//
joese voirs(creven) toebehoe(re)nde (et)c(etera) Tuyghde en(de) aff(ir)meerde/ dat hem dat alsoe kenlijck was ende aen hem v(er)socht/ hadde geweest mair dat jacop geantwerdt hadde dat/ hij niet onder hem en hadde joese voirg(enoemt) toebehoe(re)nde/ zijnen eedt dairaff p(rese)nte(re)nde It(em) opt iiii[de] artikel/ der voirg(eruerde) int(er)rogatorien ondervraeght oft hem/ niet vore en stont als jacop voirs(creven) als voren/ geseeght hadde dat hij niet onder en hadde joese/ toebehoe(re)nde met meer ande(re) woirden oft dat niet/ en gesciede inden uutganck vand(en) bamism(er)ct nu/ lestled(en) (et)c(etera) Aff(ir)meerde bij zijne(n) eede als bove(n) dat/ hem wel voe(re)n stonde dat de voirs(creven) woorde(n) gebuerde(n)/ inde bamism(er)ct mair en wist niet sekerlijck oft/ int uutgaen was vand(en) merct oft niet It(em) ov(er)hoirt/ opt vijfste poent rue(re)nde dat jacop casselee(re) een/ costelijck huys heeft doen maken op ons(er) liev(er) vrouwe(n)/ kerchoff alhier zonder aensien joes voirs(creven) binnen/ ende zedert der bamism(er)ct voirg(eruert) d(air)inne joes/ p(ar)t noch deel hebben en soude (et)c(etera) Tuyghde d(air)op/ dat hem kenlijck is soe ooc gemene fame is/ alhier ind(er) stadt dat de voirs(creven) jacop tvoirs(creven) huys/ heeft doen ty(m)me(re)n mair en weet niet binnen/ wat tijde de ty(m)meri(n)ge gesciedde noch wed(er) ooc de/ voirs(creven) joos oft yemant anders dair mede p(ar)t/ oft deel aene hebben mach oft niet Ende and(er)s/ en wiste de voirs(creven) amman niet voirde(r) te tuygen/ Ende de voirs(creven) jan bruegelman tuyghde en(de)/ aff(ir)meerde bij zijne(n) eede voirs(creven) ende yerst op/ dinhoudt vanden achsten article der int(er)rogatorien/ voirs(creven) van dat gebuert was geweest joese lestw(er)ff/ alhier tantwerpe(n) wesende ten huyse van jouffr(ouwe)/ alijten vanden wijng(ar)de zweg(er) des voirs(creven) jacops/(et)c(etera) dat hij [wel] heeft hoiren seggen dat joos voirs(creven)
//
tantwerpe(n) was hem niet voe(re)n staende vanden/ tijde ten huyse van jouffr(ouwe) alijten voirg(enoemt) ende dat/ jacop voirs(creven) van joesen eene(n) brieff besegelt woude/ hebbe(n) die joos geco(n)senteert hadde mair dat het joes/ ten lesten niet doen en woude Affirmeerde voorts/ opt selve dat hij deposant tghene des voirs(creven) is/ geschiet zijnde t(er) stont d(air)mede quam ende hoirde/ dat jacop voirs(creven) seydt tot joesen sceydt va(n) my/ niet mair blijft ende laet ons den voirg(enoemde) gheerde/ betalen want u tstuck alsoe wel als my ae(n)gaet/ Ende als dese man betaelt is ende wij gerekent/ hebben ons sal genoech ov(er)schiete(n) seggende voorts/ ic heb liev(er) dat wij beide tsamen geva(n)gen gaen/ tes roydraghers huyse dan wij hem niet voldoen/ en souden met meer des(er) gelijcken woirde(n) Opt/ welke joos antwerden(de) seyde soe wildi my niet/ fortchen hier houden Dairop jacop seyde neen ic/ mair ic en begheere niet meer dan dat ghij/ bij my blijft om hem te voldoene Antwoorde/ joos dairop ic en heb noyt gedacht van u te/ sceydene Dese woirde gesciet zijnde seyde/ h(er) adriaen vanden wijng(ar)de prieste(r) dair ooc zij(n)de/ doet de doere op ende laetten gaen hij seeght/ doch dat hij weder comen wille Ende is alsoe/ de voirs(creven) joos uute(n) huyse der voirs(creven) jouffr(ouwe) alijte(n)/ gegaen met jacope casselee(re) met hem deposant en(de) godev(ar)de/ boelart joes neve tot op ons(er) liev(e) vrouwe(n) kerchof/ alhier sprekende met eene(n) man aldaer ende dat/ gedaen zijn zij tsamen weder gegaen ten huyse der zelv(er)/ jouffr(ouwe) alijten en(de) maecte(n) ov(er)drach met malca(n)de(re)n hue(r)/ dinge(n) te gaen ov(er)rekene(n) ende ghinghe(n) t(er) zelv(er) tijt/ ten huyse waert van hem deposant dair hij jacop/ voren inne ging op een came(r) mair joos voe(r) de
//
dore gecome(n) zijnde is acht(er) rugge opt kerchof gegae(n)/ ende niet mede gevolght Ende hij deposant ghinc t(er)/ beg(er)ten van jacoppe voirs(creven) t(er) stont soecken den voirs(creven)/ joese opt kerchoff tot eens canoni(n)cx huyse vragende/ nae hem dair hem geantweert ware dat hij joos/ dair geweest hadde mair was uutgegaen alsoe/ dat hij deposant hem niet vinden en conste It(em)/ ondervraeght opt negenste poent der int(er)rogatorien/ voirs(creven) rue(re)nde der hanteringen van coopmanscapen/ die joos gedaen soude hebben van ingelsche(n) laken(en)/ lijnwate ende anders binne(n) den geselscape va(n) jacoppe/ voirg(enoemt) dair jacop paert noch deel aene en hadde (et)c(etera)/ Tuyghde bij zijne(n) eede hem voe(re)n staende van hue(re)n/ geselscape mair en weet niet wed(er) joos voirs(creven) bi(n)nen/ den tijde desselfs geselscaps e(n)nige coopma(n)scape(n) op hem/ selve(n) gedaen heeft oft niet Ende opt x[te] en(de) xi[te] articule(n)/ der voirs(creven) int(er)rogatorien ov(er)hoirt rue(re)nde dat joos voirs(creven)/ eene(n) dach ende eene(n) d nacht geslote(n) was int voirg(eruerde)/ huys doen hij de voirs(creven) weygeri(n)ge dede vande(n) brieve/ te besegelen ende dat zijn bekenne(n) alsoe bij bedwa(n)ge/ van geva(n)gen tsijne geschiet soude zijn (et)c(etera) Tuyghde/ bijde(n) selven zijne(n) eede dat hij d(air)aff niet meer en/ weet te tuygene dan hij voe(r) op dachste poent getuyght/ ende verclairt heeft ende anders en stont hem niet/ voe(re)n vanden int(er)rogatorien voirs(creven) Ende dande(re) getuyge(n)/ inden voirs(creven) int(er)rogatorien meer genoemt te weten(e)/ anthoenis vande(n) broeke meest(er) cornel(is) henrici cornelis/ sas ende laureys oskens onse poirte(re)n zijn alle tsame(n)/ absent ende uut(er) stadt op desen tijt Ende peet(er) van/ sulp is woenachtich tot coelne wair bij wij die/ niet en hebbe(n) conne(n) hooren Ende des torconden hebben/ wij den zegel ten saken der voirg(eruerde) stadt va(n) antw(er)pe(n)/ hier onder op doen drucken int jair ons he(re)n alsmen screeff/ m cccc en(de) xciii opde(n) tweede(n) dach va(n) mey geteekent j cobbaert