It(em) meest(er) goirdt bubbele(re) d(er) stadt ty(m)m(er)man in p(rese)ntia/ heeft gekint en(de) gelijt genomen te hebben(e) te/ maken(e) dwerck van eend(er) moelen gelegen te/ rosieres ond(er) de banck van ov(er)ijssche nicolase blanc/ toebehoe(re)nde de welke de selve claes oick bekint/ mits teg(en) den selven meeste(re)n goirde verdinct te/ hebben(e) ind(er) manie(re)n opde formen en(de) condicien nae/ bescreven Ind(en) yersten sal de voirs(creven) meest(er) goirdt/ / moete(n) maken de twee vorste vlogels voe(r) de moelen bove(n)/ dwater It(em) de zijboerd(en) vand(en) co(m)me drie duimen dicke/ alsoe lanck als die behoeven It(em) tgeleie vand(en) twee/ wintgat(en) en(de) zijboerd(en) sal hij mot(en) planck(en) It(em) thuys/ vand(en) molen sal deselve meest(er) goirdt sculd(ich) zijn te/ platen(e) It(em) den gevel te wat(er)wert en(de) beid(en) zijd(en)/ sal deselve meest(er) goirdt moten plat(en) en(de) stijlen soe/ verre dat behoeve(n) sal en(de) buyten scutten en(de) bynnen/ planck(en) also hoghe als dat behoirt It(em) noch een/ but(en) rat sculd(ich) zijn te maken(e) in aldair formen/ en(de) manie(re)n als dout rat geweest heeft It(em) alle/ de pijlen en(de) pueluwe bynnen den huyse sal/ de selve meest(er) goirdt sculd(ich) zijn nyeu te maken(e)/ van vuysbomen en(de) molebomen It(em) een nyeu inrat/ en(de) twee wiegen elck wiege met seven spillen/ en(de) dat innerat opd(en) selven pas vand(en) voirscr(even)/ wieg(en) It(em) deselve sal noch mot(en) mak(en) eenen nyeu/ wen vuysboem thien duimen groot en(de) soe lanc als/ dien behoeven zal tot drie back(en) en(de) elken bac/ sal hebben drie hamers en(de) elken hamer sal hebbe(n)/ drie vuysten tot xviii hamers toe en(de) elken ham(er)/ vijff duimen vier cant en(de) soe lanck die behoeven/ sullen It(em) de g(r)[o]te sche(re)n sal hij oick sculd(ich) zijn te/ maken(e) soe dicke als de oud(en) zijn en(de) soe lanck/ die behoeven It(em) de clinck(ers) en(de) hamers twee/ duimen dicke en(de) vijff dumen breet en(de) inde/ acht(er)ste sche(re)n drie dumen dicke en(de) alsoe lanck/ die behoeven sullen te zijne It(em) noch twee/ back(en) xvi voeten lanck en(de) ii(½) halve(n) voete(n) vier/ cant te hoeschen cante en(de) voirt opwert gehuecht/ / nae smeest(er)s beliefte It(em) sal oick sculd(ich) zijn te maken(e)/ deselve meest(er) goirdt alle de plat(en) en(de) saten die behoe(re)n/ ond(er) de backen te liggen(e) It(em) es vorw(er)de dat de vors(creven)/ meest(er) gort leve(re)n sal allet thout behoeven(de) tott(en) vors(creven)/ werke en(de) al van goed(en) eycken(en) nyeuwen houte soe/ dat behoirt te zijne tzijnen laste It(em) es oick/ vorw(er)de dat dese moelen en(de) werck voirs(creven) vol/ maict moet zijn ende gestelt gaen(de) sinte m(er)/ tensmisse naistcomen(de) en(de) dit opde pene van vi/ rinsg(ulden) te cortt(en) bijd(en) voirs(creven) claese blancke aend(en)/ p(ri)ncipale d(enieren) op dat deselve meest(er) goirt tselve/ werck also niet en vol rechte [braghte] bynne(n) den voirs(creven)/ tijt It(em) de voirs(creven) claes sal sculd(ich) zijn te dijcken/ te oefen(e) en(de) te ressche(n) op sijnen cost also tott(en)/ werke behoeve(n) sal als meest(er) goirdt d(aer)toe gereet/ sal zijn Ende h(ier) voe(r) sal de voirs(creven) meest(er) goirdt/ trecken vand(en) voirs(creven) claese dit volbringen(de) te/ werckma(n)sp(ri)se en(de) hem sculd(ich) zijn te betalen(e) de/ so(m)me van ond(er)halff hond(er)[t] rinsg(ulden) te xx st(uvers)/ den guld(en) nad(er) valuat(ien) nut(er)tijt cours hebben(de)/ d(aer)aff deselve claes sculd(ich) zal zijn den voirs(creven)/ meeste(re)n goirde te geven(e) alsnu gereet xxx/ r(ins)g(ulden) en(de) als hij beghint te wercken(e) xx r(ins)g(ulden)/ en(de) als dwerck halff gedaen sal zijn xxv r(ins)g(ulden)/ en(de) als tselve werc als voe(r) all voldaen ende/ volset sal zijn soe dat behoirt sal deselve noch/ trecken xxv r(ins)g(ulden) al ind(er) werd(en) als bove(n) It(em)/ vi weken nae dat tselve werck voldaen zal/ / zijn en(de) in zijnen loep geweest hebben zal deselve meest(er)/ goirdt alsdan trecken noch vijftich gelijker rinsguld(en)/ dwelc deselve claes hem als voe(r) geloeft te betalen(e)/ It(em) es noch vorw(er)de dat de voirs(creven) meest(er) goirdt dit [werck] sal/ mot(en) beginne(n) viii daig(en) nae s(in)[t] jansmisse naistc(omende)/ oick opde verbuerte van eenen ponde vlaems te cortt(en)/ als voe(r) aend(en) voirs(creven) d(enieren) bijd(en) voirs(creven) claese op dat/ tselve bij meeste(re)n goerd(e) niet geacht(er)volght en w(er)d(e)/ Ende alle dese vorw(er)d(en) en(de) cond(itien) hebben geloeft/ de voirs(creven) p(ar)tien in w(er)sijd(en) malcande(re)n te voldoen(e)/ sond(er) fraude en(de) argelist alsoe dat elk(er) genoech sal/ mogen wesen cor(am) cav(er)chon vynck junii xx[a]