Tusschen m(ar)tinen smildegreven die in hachten hadde/ doen stellen pete(re)n rogge scaelgiedecke(r) t(er) eende(r) ende/ den selven pete(re)n t(er) ande(re) dair de selve p(ar)tien voe(r)/ den raide vand(er) stadt contendeerden tegen malcande(re)n/ ende de selve m(ar)tine claeghde van meshandelinghen/ die pet(er) over huer gedaen hadde en(de) huer gequetst/ en(de) gewont hadde v(er)sueken(de) van hem mits dien v(er)sekert/ te zijne van hue(re)n live nae des(er) stadt recht hopen(de)/ dat dat alsoe behoirde ende d(aer)enboven zijns v(er)dragen/ te wordden Te voirde(r) want hij soe zij seyde vele/ vand(er) hue(re)n hadde gehadt als hij spelen ghinck niet/ wercken en woude en(de) and(er)s d(aer) af zij wel beg(er)de/ restitutie en(de) vand(en) geleend(en) d(enieren) die hij van huer gehadt/ hadde d(aer)af genoech lud(en) vand(en) gebue(re)n wisten te spreken/ den tijt alse zij tsamen huys gehouden en(de) gewoent/ hadden D(aer) tegen de voirs(creven) pet(er) antw(er)den(de) dat hij huer/ / vonden hadde met p(er)sonen in o(n)eeren ende alsoe zij/ bellix niet gedaen en soude hebben nae de (con)versatie/ die zij tsamen gehadt hadden en(de) den cost en(de) last/ die hij van huer gehadt hadde d(aer) hij dmeestdeel/ sijne(n) pijn en(de) arbeyt inne gescoten hadde en(de) hadden/ deen dand(er) gedeylt lief en(de) leet en(de) mits den welken/ hij die in grot(er) ne(r)ri(n)gen he(m) aende chartroisen en(de)/ elders sijne(n) pe(n)ni(n)ck gewo(n)nen hadde en(de) bij huer/ bracht ende dat meer is selve van sijnd(er) wy(n)ni(n)gen/ de pe(n)ningen inne gehaven wair bij al hadde hijse/ meshandelt dat dat gheen vremde sijn en soude Oick/ hadde hij ind(er) v(er)gaderingen bij huer bracht seke(r) p(ar)ceele(n)/ van goeden welke p(ar)ceele(n) en(de) pe(n)ni(n)gen die zij van/ sijne(n) arbeyde ontfangen hadde sij bellix gehouden/ soude zijn hem te restitue(re)n om van malcande(re)n te/ sceyden en(de) elk den eene(n) te moegen volgen met meer/ woirden Es duytsprake vand(er) stadt dat de voirs(creven)/ pet(er) der voirs(creven) m(ar)tinen verseke(re)n sal nae der stadt recht/ ende alse vand(en) ande(re)n pointe vand(en) sceyden van malcande(re)n/ dat de voirs(creven) m(ar)tine de gebue(re)n ende goede luden/ dair zij huer toe gedraeght sal doen comen bijder/ wet om die taenhoe(re)n ende d(aer)entinden recht en(de)/ dat zij den selven pete(re)n sal laten volgen alle alsulke/ p(ar)ceelen van goeden ende p(en)ni(n)gen noch in wesen(de) en(de)/ bij huer wesende alse hij sal co(n)nen bijgebringen dat/ hij dair bracht heeft ende zij van hem oft den/ zijnen noch ond(er) hebben mach ende d(aer)entinden recht/ in c(on)s(ili)[o] opidi januarii xxii