Vander saken gecomen op heden bijden raide vand(er) stadt/ tussche(n) he(re)n ende meeste(re)n pauwele(n) oeghe raid m(ijns)/ / gened(ichs) he(re)n inden name van hem selven en(de) van/ wege(n) jouffr(ouwe) lijsbetthe(n) oeghs zijnd(er) zust(er) woenen(de)/ inden godshuyse t(er) banck t(er) eenre ende henr(icke) boene/ t(er) ande(re) ald(aer) te kynnen geven(de) hoe dat de voirs(creven) meest(er)/ pauwel hem verwonderde dat de voirs(creven) henr(ic) boene/ hem ende zijnd(er) sust(er) stoot ende hinder maecte in/ alsulk(en) voir t(er)mi(n)acien en(de) gewijsd(en) appointeme(n)ten/ gegaen uuyt crachte van gewijsden als van seke(re)n/ leveri(n)gen genome(n) nae des(er) stadt recht en(de) den/ gewijsden in dien voe(r) seke(r) coren en(de) gelt rinten/ die zij hadden op seke(r) goed(en) ende panden gelegen/ inden baenhoevel d(aer)af de voirs(creven) henr(ic) en(de) zijn/ mede(con)sorten besitters mochten wesen (contra)rie den vo(n)nisse/ d(aer)op bij scepen(en) gewesen ende den t(er)mi(n)acien voirs(creven)/ als dat zij dier panden souden gebruycken ende/ den emolume(n)ten ende p(ro)fijten der selver tottertijt zij/ van hue(re)r tacht(er)heyt die van dive(er)sen jae(re)n v(er)loepe(n)/ wae(re)n met coste en(de) co(m)me(r) ende oick van oude(re)n pachte/ ende rinten die zij hadden moten betalen v(er)nueght/ souden wesen hen des gedragen(de) totte(n) vo(n)nisse en(de)/ t(er)mi(n)acien in dien Ende dat boven dien oic de/ selve henr(ic) seke(r) vruchten gecomen vand(en) selven/ panden hadde pijnen af te nemen(e) en(de) he(m) d(aer) af/ te spolie(re)n d(aer)af hij oick gedoempt was die te/ restitue(re)n hem des gedragen(de) totte(n) t(er)mi(n)acien in/ dien staen(de) ger(e)gistreert inde ii[te] came(r) van des(er)/ stadt Ende hoe wel de selve henrick vele en(de)/ div(er)se pointen he(m) hadde vermeten te thoenen en(de)/ d(aer)om noch wed(er)o(m)me comen wae(r) in questie(n) soe/ hij verstont tegen zijn sust(er) voirs(creven) welken thoen/ aenhoirt was soe hij verstont om hem en(de) zijn sust(er)/ te moeyen(e) boven en(de) in (contra)rien vand(er) voirs(creven) t(er)mi(n)acie(n)/ ende gewijsden Soe hoepte hij nochtan dat de/ voirs(creven) voir t(er)mi(n)acien ende ande(r) vo(n)nissen in dien/ geloepen hem souden ond(er)houd(en) wordden ende dat/ hij soude wordden gemai(n)teneert navolgen(de) den selve(n)/ en(de) oick and(er)ssins nae recht inde voirs(creven) goede en(de)/ / bladingen der selv(er) totter tijt toe hij inden name als/ voe(r) van des voirs(creven) steet vernueght en(de) betaelt soude/ wesen met coste (en)de co(m)me(r) ende dat tot dien de selve/ he(n)rick de vruchten bij hem gespolieert en(de) den selve(n)/ meeste(re)n pauwelse en(de) zijnd(er) zust(er) ontogen wed(er)kee(re)n/ soude nae uuytwijsen(en) der voirs(creven) t(er)mi(n)acien maken(de)/ d(aer)af (con)clusie en(de) heysch ende den voirs(creven) henr(icke) in dien/ ond(er)wesen te wordden(e) met rechte ende tot dien/ gestraeft en(de) gecorrig(er)t nae de hooch(eyt) m(ijns) gened(ichs) he(r)en/ en(de) den recht(e) van des(er) stadt van zijne(n) ombehoirlijck(en)/ reite(r)atien ende molestatien die hij (contra)rie den voirs(creven)/ rechtvorderingen en(de) t(er)mi(n)acien pijnde te doene alsoe/ dat genoech soude moegen sijn D(aer) op de voirs(creven)/ henr(ic) gep(re)te(n)deert heeft mits zijne(n) thoene bij hem/ geleydt als dat de voirs(creven) jouffr(ouwe) lijsbeth soude hebbe(n)/ doen raste(re)n zeke(r) goede den voirs(creven) henr(icke) toebehoe(re)nde/ gelegen t(er) ledich(eyt) ende die rastame(n)ten alsoe v(er)volght/ hoe wel de getuygen des hem niet en gestonden/ besund(er)t vand(en) vervolgen(en) vand(en) voirs(creven) rastame(n)te/ ende dat de selve jouffr(ouwe) lijsbeth inde schue(r) des/ voirs(creven) henr(ix) gederssche(n) soude hebben tot vier mudde(n)/ toe dwelc oic de getuygen niet en wisten te/ clee(re)n hoe vele des was hoe wel zij vanden/ dorsschen(en) deponeerden ende dat hij huer egheen/ belet d(aer)inne gedaen en hadde ende tot dien/ dat hij geseet soude hebbe(n) totten getuygen die/ in des(er) saken gedeponeert hadden dat de voirs(creven)/ jouffr(ouwe) lijsbeth vier mudden core(n)s hebben moeste/ en(de) een voeder corens metten stroo ende dat mits/ dien coren(en) de voirs(creven) jouffr(ouwe) genoech alsoe vele/ core(n)s soude hebben metten voirs(creven) stroo als van/ hue(re)n panden comen mocht zijn d(aer)af de selve/ getuygen oic niet vele en cleerden ende dat/ hij d(aer)af zijne(n) arbeyt gedaen hadde te weten(e)/ tvoirs(creven) coren te hulpen bynden opt velt des hem/ de getuygen gestonden hoe wel zij dnaiste niet en/ / wisten wie dat tcoren getogen hadde nae dien/ dat inde schue(r) wesen mochte hopen(de) alsoe ter/(contra)rien dat hij bliven soude inde possessie en(de) mania(n)tie/ van zijne(n) voirs(creven) goeden en(de) bladingen in dien D(aer)op/ de voirs(creven) meest(er) pauwel r(e)plice(re)nde mainteneerde/ de (contra)rie gem(er)ct ende aengesien dat niet wed(er)staen(de)/ tgene des bij henr(icke) geallig(er)t en(de) oick eensdeels/ gethoent mocht wesen hij noch niet geheel vold(aen)/ en was navolgen(de) den voirgewijsden van sijne(n) pachte(n)/ en(de) jae(re)n voirleden met coste en(de) co(m)me(r) die hij hoepte/ d(aer)aen te v(er)halen op goede reken(inge) van al Es/ get(er)mineert ende uutgesproken dat navolgen(de) den/ voirgewijsden t(er)mi(n)acien appointeme(n)ten en(de) vo(n)nisse(n)/ in desen te div(er)sen tijden gewesen de voirs(creven) meest(er)/ pauwel inden name als voe(r) tot zijne(n) wettigen gebreke(n)/ behoef bliven soude inde possessie en(de) mania(n)tie va(n)d(en)/ selve(n) goeden totten ynde van zijnd(er) betalingen met/ coste en(de) co(m)me(r) d(aer)op geloepen ende dat de voirs(creven)/ henr(ic) alle o(n)gebruyck en(de) letsele(n) in dien sculdich/ soude zijn af te doene en(de) den voirs(creven) meeste(re)n pauwel(en)/ inden name als voe(r) te laten volgen opde p(rese)ntacie/ bij hem gep(rese)nteert van rekeni(n)ghe te doene en(de) soe/ verre de selve henr(ic) rekeni(n)ghe beg(er)de dat de/ voirs(creven) meest(er) pauwel die doen soude op cautie/ die henr(ic) d(aer)af te vorst soude moten stellen genoech/ zijnde van te moten opleggen des de selve meest(er)/ pauwel in gebreke bevond(en) soude moegen wordden/ om tselve gebreck aende selve cautie te moeghen/ verhalen ende soe v(er)re hij voirtane e(n)nighe (contra)rie[n]/ attemptatien dade van des(en) ende ande(re)n voirgewijsd(en)/ den voirs(creven) meeste(re)n pauwelse inde(n) name als voe(r)/ oft den zijne(n) dat de stadt dat ov(er) hem oprichten/ soude ten exemple van ande(re)n t(er) (con)s(er)vatien vand(er)/ hoogheyt ende den rechten van des(er)/ stadt Actum in (con)silio opidi februarii/ sexta