Dits tgetuyghnisse dat gegaen en(de) geluydt sijn es tusschen arnde beyart in deen side ende vrancke(n)/ den ridde(re) in dande(re)/ Inden yerste(n) draeghen de getughe(n) dat de voirs(creven) arnt beyart tgedinge dat hingc tussche(n) hem en(de) zijn wijf/ tot coelen beroepen hadde en(de) dat doen de vriende in beyden zijde(n) tussche(n) beyde sprake(n) en(de) dat na lange/ dedinghe verdedingt waert Alse vande(n) huyse dat gecocht en(de) gecregen was biden voirs(creven) arnde en(de) sine(n) wive/ gelege(n) inde steenstrate (et)c(etera) op dat de vriende des voirs(creven) arnts wijf tvoirs(creven) huys op een ghelt setten/ soude(n) dat te nemen en(de) te gheven also dat ten eynde des voirs(creven) wijfs [vriende] tvoirs(creven) huys sette op/ lxx crone(n) op dat arnt tvoirs(creven) [huys] coes en(de) op dat arnt tgelt gecoren hadde so en soude hi mer/ lx crone(n) hebbe(n) ende doen koes de voirs(creven) arnt thuys en(de) tghelt te gheven Tughende voert/ de voirs(creven) getuge(n) dat ond(er)sproke(n) en(de) gevorwardt was datmen de voirs(creven) lxx cronen den/ voirs(creven) vrancke(n) geloven soude te betalen te vastelavonde doe naist comende en(de) dat waert also gedaen/ en(de) die worde(n) betaelt tussche(n) doen en(de) halfvaste(n) naest volgende Seggende voert de selve getuge(n)/ dat vorwart was datme(n) om de voirs(creven) lxx cronen seven mudde lijftochte(n) cope(n) zoude staende ten/ live des voirs(creven) arnts wive Op also waert dat si bide(n) voirs(creven) arnde niet en quame dat dan de selve/ arnt daer in gheen beweynde noch recht hebbe(n) en zoude en(de) geboret also dat de voirs(creven) arnt en(de) sijn wijf/ wed(er) bi een q(ua)men dat dan de voirs(creven) arnt theffen vande(n) voirs(creven) coren hebben soude mer altoes soude ment/ tghelt voirs(creven) wed(er) aen legge(n) aen lijftocht ten live des voirs(creven) arnts wive sond(er) des ande yegherinx/ ander bekeert te werden Ite(m) droeghen voert de voirs(creven) getugen dat ten eynde verdedingt was/ dat de joffr(ouwe) ve(re)nbrude(re)n hebbe(n) zoude voer den cost die si int voirs(creven) gedinghe verleeght hadde/elij elf licht cronen en(de) daer mede soude si te vreden zijn de welke xi licht cronen den/ voirs(creven) vrancke(n) oec geloeft waren te betalen tot paessche(n) d(aer) naest volgende/ Oec droegen noch de voirs(creven) getuge(n) dat si saghen dat de voirs(creven) arnt en(de) si saghen dat/ des voirs(creven) arnts wijf dagelix biden voirs(creven) arnde wae(re) en(de) bi hem verkeerde/ Oec droeghen de voirs(creven) getuge(n) dat tot halfvasten naest voerleden een jae(r) was dat/ tvoirs(creven) ghelt betaelt was Dit geschiede vi daghe in meye des donresdaighs/ int jaer xiiii[c] en(de) xxviii