Het sijn comen in rechte voer meyer en(de) scepen(en) van loven inde banck ald(aer)/ margriete vanden dijcke als na den gemeynen lantrechte van brabant/ momboer hennekens vanden kerchove huers natuerlix soens die voer/ meyer ende scepen(en) van loven gegoedt ende gheerft es in zeke(re) goede/des voirs(creven) jans wilen vanden kerchove vaders des voirs(creven) hennekens/ in deen zijde ende katheline weduwe mertens wilen de valkene(re)/ die na wijf was des voirs(creven) wilen jans vanden kerchove ende/ merten de valkene(re) hae(re) sone in dande(re) Daer de voirs(creven) katheline/ en(de) merten hae(re) soen in dande(re) Daer de voirs(creven) katheline/ en(de) merten hae(re) soen een aensprake deden tot vijf boende(re)n lants/ gelegen inde prochie van berlaer ten rode tuschen de goede gheert/ wellens ende jan giels met alrehande woerden ende thoenissen/ die sij hen daer toe seiden en(de) v(er)maten Ende daer op hae(r) de/ voirs(creven) margriete als momboer huers voirs(creven) kynts v(er)antwerdde/ in alzulken worden als sij daer toe dede seggen So dat uut/ desen de p(ar)tien in beiden siden tot thoenissen gewijst wordden die/ huer thoennissen ten daghe daer toe gesedt leidden Ende dat/ gedaen wesende wijsden bij manissen des meyers van loven/ de scepen(en) van loven voer een vonnisse Na aensprake na verant/ werden ende na thoenisse dat der vrouwen tocht den kijnde/ en(de) sijnre goedingen volgen sall Ende dat de erfman noch te/ vruegh op es cor(am) lombart borch(oven) kersmake(re) vynck boys voshem/ oct(obris) xxi/