Ite(m) want goessen vanden kerchove en(de) joffr(ouwe) aleyt vand(er) brugge(n)/ sijn wijf and(er)wile een ov(er)drach voe(r) de stat van loeve(n) van hae(re)n/ goeden aengegaen zijn daer in e(n)nich van hae(re)n kijnde(re)n beswaert/ soude(n) sijn geweest In dien dat sij aen hae(re)n lantrecht vande(n)/ goede(n) des vors(creven) goessens en(de) joffr(ouwe) aleite(n) zijns wijfs v(er)cort en(de)/ v(er)myndert soude(n) wesen En(de) nu biden rade vande(r) stat come(n) zijn/ de vors(creven) goessen vande(n) kerchove en(de) joffr(ouwe) aleyt sijn wijf claerlic/ seggende en(de) opdoende dat bi seke(re)n en(de) notablen redene(n) hen/ daer toe berue(re)nde hae(re) wille en(de) eyndlic begheerte [is] dat negheen/ van hae(re)n kijnde(re)n van sine(n) lantrecht in hae(re) voe(r)s(creven) goede in/ deel oft in al beroeft noch v(er)myndert sijn en sal mer/ dat een yegelic van hae(re)n kijnde(re)n hebbe(n) sal tgheen des/ hem na den lantrecht geboert en(de) sculdech is de volghen en(de)/ alse vande(n) goeden en(de) renten die de kijnde(re) nu t(er)tijt heffen/ es hae(re) begheerte dat joffr(ouwe) odilie docht(er) der vors(creven) goessens/ en(de) joffr(ouwe) aleite(n) daer in gelijc en(de) mede deyle(n) sal also die/ ande(re) dochte(re)n doen sonder e(n)nich vanden dochte(re)n daer in vordel/ te hebbe(n) Daer om eest dat de raet vand(er) stat aensiende/ dat de beg(er)te en(de) tvoir tversueck des vors(creven) goessens en(de)/ sijns wijfs redelic is get(er)mineert heeft voe(r) reden(en) en(de) bescheyt/ en(de) besund(er) want de vors(creven) goessen en(de) joffr(ouwe) aleyt sijn wijf
//
haerre goede noch mechtich zijn dat dov(er)drach voe(r)gheruert/ also v(er)re als dat des(er) t(er)minacien (contra)rieert te nyeute sal sijn/ Cora(m) lyemi(n)ghen burg(i)mag(ist)ro (et) aliis in pleno consilio des/ goensdaeghs xi daghe in meye/