Van colen van montenake(n)/ Item want wouter vander eyken come(n) es voir(screven) den raede vand(er) stat/ thoene(n)de en(de) opdoende dat coel van monthenake(n) hem hadde doen pande(n)/ voir erftsijs op seker goede den selve(n) woute(re)n toebehoe(re)nde inden lande van/ arschot gelege(n) meyne(n)de dat hij dat tonrechte gedaen hadde aenge/ sien dat hij dat sonder den voeght gedaen hadde (et)c(etera) met meer reden(en)/ ende woirden die de voirs(creven) wouter vander eyken dair toe dede seggen/ Ende de selve coel dair op verantwerde seggende dat hij met sijne(n) meyer/ en(de) laete(n) voir gebreck van sine(n) erftsijse even verre dat sijn hofrecht bynne(n)/ den lande van arscot ghinc ende strecte dat dat alsoe gedaen hadde sond(er)/ den voeght dair bij te neme(n) ende dat boet de selve coel te thoenen/ dair hij dach van thoenisse toe nam en(de) ten daghe van thoenissen/ thoende de voirs(creven) coel openbairlic dat hij met sijnen meyer en(de) laeten/ voir gebreck van sine(n) erftsijse gepant hadde alsoe verre als sijn hoffrecht/ strecte Al waest oec also dat de pande d(aer) aff inden lande van arscot ge/ legen wae(re)n ov(er) xxx jae(re) ende dage sonder den voeght dair bij te/ neme(n) het en wae(re) dat op huysinge geweest hadde die geslote(n)/ stonden en(de) op datme(n) die open gedaen soude hebben soe nam men/ dair toe den voeght Dair om eest dat de raet vand(er) stat ge/ termineert heeft voir recht dat de voirs(creven) coel nae de wairheit die sij/ dair toe verhoirt hebben blive(n) sall in sijnre possessien van sine(n) hofrecht/ voirscr(even) tot aen d(er)re tijt dat hij metde(n) rechte dair uutgewo(n)nen sal werde(n)/ ter plaetse(n) dair dat behoirt cora(m) kersmak(er) voshem burgim(a)g(ist)ris in cum/ pleno (con)silio julii p(ri)ma
//