Van janne vander doeseldonck/ Het sijn comen in recht voe(r) meye(r) en(de) scepen(en) van loeven inde banck ald(aer)/ jan vander doeseldonc die na den rechte d(er) stat van loeven comen en(de)/ geleidt is tot allen de(n) goeden marselijs vand(er) doeseldonc sijns brueders/ en(de) joffr(ouwe) geertruyde(n) spapen sijns wijfs so waer men die vynden mach/ in deen side en(de) wout(er) roelant die na de(n) selve(n) rechte d(er) stat van loeve(n)/ geleidt is tot de(n) goeden jans van assche he(re) tot mercxhem in dande(re)/ alse vander thienden tot mercxhem gelegen gelijc jan wilen de pape vad(er)/ der vors(creven) joffr(ouwe) geertruyden de selve thiende aldaer te houden plach Daer/ de vors(creven) wout(er) roelant inden rechte dede lesen den beleydtbrief daermede/ hi beleydt was tot de(n) goede(n) des vors(creven) jans van assche versuekende datme(n)/ hem vand(er) voirs(creven) thiende(n) houde(n) woude in sine(n) voirs(creven) beleyde na dat sijn beleidt/ ouder was van date(n) dan dbeleydt des vors(creven) jans vander doeseldonc Also/ dat doen de voirs(creven) jan vand(er) doeseldonc de voirs(creven) thiende met alrehande/ woerde(n) van rechte aensprack biedende ond(er) den ande(re)n te thoenen de geboirte/ va(n) sijns wijf brueders wive voirscr(even) en(de) dat de vors(creven) wile(n) jan de pape/ hae(r) vader de vors(creven) thiende besat die wile dat hi leefde met alrehande/ mede thoe(n)nissen die hi in sijnre aenspraken dede bilegghen V(er)clarende mede/ de voirs(creven) jan vand(er) doeseldonc dat des vors(creven) wouters beleydt vander/ vors(creven) thiende niet dienen noch daer op slaen en soude gemerct/ / dat de sake daer om de vors(creven) thiende aenden vors(creven) janne van assche comen/ soude langhe na de(n) date vanden beleyde des selfs wouters gevallen wae(r) also/ dat claerlic blijct En(de) seyde hier om voert de voirg(enoemde) jan vand(er) doeseldonc/ dat hem en(de) sinen beleyde de voirs(creven) thiende volgen zoude (et)c(etera) Daer op dat/ hem de voirs(creven) wouter verantwerde en(de) [de] aensprake vanden bodem vander/ thienden te mael liggen latende en(de) verswigende mer viel alleen op seke(r)/ heergewede die den vors(creven) janne van assche vand(er) vors(creven) thiende(n) v(er)schenen/ en(de) v(er)vallen souden zijn met alrehande redene(n) en(de) woerden die hi van/ dien heergewede in sinen voirs(creven) verantw(er)den dede seggen en(de) rueren Also/ dat ten slote de meye(r) van loeven maende de scepen(en) va(n) loeven die/ wijsde(n) voir een vonnisse na aensprake na v(er)antw(er)den en(de) na al/ dats voe(r) hen comen wae(r) datmen den vors(creven) janne vand(er) doeseldonc/ vand(er) vors(creven) thienden houde soude in sinen beleyde en(de) waert also/ dat de vors(creven) wout(er) roelant oft yemant anders e(n)nige heerghewede/ meyndde te v(er)volghen dat hi dat doen mocht ter plaetsen daer/ dat behoerde cor(am) lombart absoloens witteman vynck/ boys voshem des dijsdaeghs elf daghe in meerte anno p(rese)nti