Item want willem bot van breda in de als sente peters man/ van loeven in deen side en(de) henric bernage in dande(re)/ and(er)wijl voe(r) meye(r) en(de) sente peters ma(n)ne van loeven inde banck/ tot loeven in rechte geweest zijn daer de saken bedingt/ worden van achterstellighe(n) erfpacht op alsulke(n) voeghe/ / gelijc dat geregistreet is metten vonnisse vanden selve(n) p(ro)cesse gewijst/ int dit selve boeck xxviii dage in novembri en(de) de selve willem/ in cont(ra)rien den voirs(creven) vonnisse hier af v(er)volgh gedaen heeft bid(er) stat/ van bruessel gelijc dat openbaerlic blikende was bi seke(re)n brieven/ gescreven vander voirs(creven) stat van bruessel daer in de vors(creven) willem/ bot alsoet scheen hem grotelic mesdragen heeft jegen de gewijsde/ vo(n)nisse van sente peters manne van loeven en(de) uut desen de vors(creven)/ willem bot jegen den voirs(creven) henricke bernage opten dach van heden/ bide(n) rade vand(er) stat in gescreve(n) is geweest daer si beyde q(ua)men/ elc sijn bescheyt d(aer) opdoende en(de) ten eynde te samen accorde(re)nde en(de)/ consent daer in dragende dat sij vanden stote daer om dat dese/ handelinghe geweest zijn comen souden te rechte voe(r) den scouthet/ en(de) scepen(en) van ghy(n)nicke Daer om eest dat de raet vand(er)/ stat ghet(er)mineert heeft voe(r) reden en(de) recht dat de vors(creven) willem/ bot ter stont afdoen sal alsulken vervolgh als hi in cont(ra)rien/ va(n) desen aende stat van bruessel gedaen es en(de) of hem gelieft/ va(n) dese(n) e(n)nich recht meer te vervolghe(n) dat hi dat doen/ moet en sal voe(r) de scepen(en) van ghy(n)nicke en(de) nerghens elde(r)/ Terminatu(m) (et) act(um) in pleno consilio febr(uarii) xxi anno xxxvii