It(em) de voirs(creven) michiel absoloen en(de) ja(n)nes ostonis hebben geloeft dat zij/ met den voirs(creven) beleide niet wercken en selen in contrarien en(de) tegen/ den uut(er)sten wille des voirs(creven) meesters jans maer hebben ter begerten/ des selfs meesters jans geloeft en(de) toegeseeght dat zij den selve(n) uut(er)sten/ wille met den voirs(creven) beleide selen volvue(re)n en(de) doen houden in allen d(er)/ manie(re)n gelijc de voirs(creven) meester jan dien geordineert heeft of namaels/ maken en(de) en(de) ordineren sal het zij in ene(n) instrume(n)te voer notarijs/ en(de) getuyghen of voer zijne(n) p(ro)chiaen of gelijc hij dien setten sal gescreve(n)/ met sijnts selfs hant getekent met sijne(n) hanteken of niet getekent/ of van eens and(er)s kant getekent met sijne(n) hanttekene en(de) die leste/ ordinancie altijt van weerden houde(n) eisd(em)