It(em) uut dien dat voe(r) den raede vand(er) stad van loeven op heden/ vergadert sijnde comen es willem de pape als momboir en(de) inden/ name vanden wittigen kijnde(re)n wout(er)s wilen van kareloe sijns sweers/ ond(er) hue(r) dage sijnde in deen zijde en(de) peter ruelens die na den/ rechte d(er) stad van loeven beleidt es tot den goeden have en(de) erve/ des selfs wilen wout(er)s welc wout(er) oic bij sijnd(er) levend(er) tijt beleidt/ was tot den goeden des selfs pet(er)s ruelens in dande(re) Aldair na/ dopdoen des selfs willems die te kennen gaf dat de voirs(creven) pet(er)/ den voirs(creven) weesen metten selven beleide ontrecken woude allen/ hoe(r) vaderlike goede en(de) erve de welke hij nu uut machte/ vanden voirs(creven) beleide aenveert en(de) ond(er)hadde trecken(de) dair af/ alle p(ro)fiten en(de) gerede bladinghen sond(er) die in goeden state/ te sustine(re)n also dat die laghen en(de) bleven liggen(de) ongewo(n)nen/ en(de) ongevroempt en(de) wae(re)n oic gescapen en wordde dair op/ niet versien biden tsijshe(re)n en(de) pechtene(re)n der selv(er) uutgewo(n)nen/ te werden Beg(er)de daer om want hij gheen recht noch reden(en)
//
totten voirs(creven) goeden van gods wegen en hadde en(de) hij om der saken hem te/ vord(er) buyten te maken cortsweeghs voerts tot sijnen behuwde soen/ tot sijnen goeden hadde doen leyden die alsoe voerts de selve goede/ aenveerde en(de) den voirs(creven) kijnde(re)n ontweldichde Dat de raet vand(er)/ stad de brieve daer aen hij met enen ontrechten lictekene comen/ was tot haerw(er)t nemen woude en(de) dae(re)n teynden de saken ov(er) wersijde/ ov(er)sien [en(de)] eeniegelijx bescheit aengehoirt elker p(ar)tien behulpen bat tgheen/ dat hij van gods en(de) rechts weghen sculdich wae(re) te hebben Dair/ op de voirs(creven) peter ruelens hem met alrehanden woerden verantw(er)den(de)/ ze(er) weynich inder redelicheit vander saken dienen(de) niet opdoende/ e(n)nige merckelike reden(en) die hij tot den voirs(creven) goeden hebben/ mochte versocht ten uutersten in sijnen scepen(en) brieven en(de) beleyde/ gehouden te werden en(de) voir meye(r) en(de) scepen(en) van loeven daer de/ ke(n)nisse van dien also hij meynde behoeren mochte geremiteert/ en(de) gestelt te zijn Overdraech de raet vand(er) stad nae des zij/ inder voirs(creven) saken van p(ar)tien verhoerden en(de) om alle gevueghs off en(de)/ besceits wille dat beide de voirs(creven) p(ar)tien ter stont elc sijn brieve/ van beleide brengen en(de) leggen sal in handen vander stad en(de) t(er)stont/ dach nemen op en goensdage naestcomen(de) te mistide te comen voe(r)/ hen en(de) dair soude de stad aenhoe(re)n allen gelegenth(eit) redelich(eit) en(de)/ bescheit inder saken en(de) doen en(de) ov(er)dragen tgheen des recht es/ ende besceit sal wesen p(rese)nt(ibus) nethenen substituto (et) dyeven ac (com)/ pluribus aliis de consilio febr(uarii)xii