Cond zij allen lieden dat willem iveten van zoerbeemde es comen in teg(enwoirdicheit) der/ scepen(en) van loeven(e) ende heeft genomen ende bekent dat hij genomen heeft vanden/ eerw(er)digen vader in gode den abdt des godshuys van heyleshem inden name ende/ van weghen des selfs godshuys thoff geheeten van suemaingne den voirs(creven)/ godsh(uys) toebehoiren(de) gelegen bij p(er)weis metten huysen hoven wynnen(de) landen beemde(n)/ eeusselen dryesschen en(de) met allen sijnen toebehoirten gelijc en(de) also verre als willem/ heylwigen van p(er)weis zalig(er) gedachten wijlen die te houden plach ende gehouden/ heeft te gade(r) noch met eenen beemdeken(e) dwelc jan de ponte te houden plach/ Te houden te hebben ende te wynnen van half merte dat was int jaer ons/ he(re)n dusent vierhondert ende eenenveertich eenen t(er)mijn ende getonste van/ neghen jae(re)n langc deen nae dander staphans sonder myddel volgen(de) elcx jaers/ dae(re)n bynnen voe(r) en(de) o(m)me vijftich gulden saluyten goet van goude ende zwaer/ van gewichten oft de werdde daeraf in ande(re)n goeden gelde alle jae(re) te betalene/ deen helicht den voirs(creven) abdt int voirs(creven) cloester te onser vrouwen liechtmisse en(de)/ dand(er) helicht te sent jansmisse baptisten daer naest volgende ende oec alle/ jare o(m)me vijftich mudde loevensch hards coe(re)ns goidt en(de) payabel met wa(n)ne/ ende vede(re)n wael bereydt der maten van p(er)weys alsulx corens als op tvoirs(creven)/ lant jaerlijx wassen sal alle jae(re) te sent andries misse apostels te betalen/ ende int voirs(creven) hof van suemaingne te leveren h(ere)n gheerde van pitchey/ h(ere)n mathijse lauwers h(ere)n janne scoemans spykelmeester canonicken reguliere(n)/ des voirs(creven) cloesters henricke motten den jongen goerde h(ere)nmeys den jonge(n)/ oft den eenen van hen breng(er) des briefs den voirs(creven) t(er)mijn due(re)nde en(de) telken/ t(er)mijne van corene en(de) gelde alse vervolghde schout op also dat de voirs(creven)/ wynne vanden voirs(creven) goeden betalen sal neghen pachte Item sal de voirs(creven) wyn/ de huysinge vanden voirs(creven) hove wel en(de) loflijc houden van vorste van wande/ ende van dake op sijnen cost den voirs(creven) t(er)mijn due(re)nde ende die also laten/ te sijnen uutgane wel gedect geplect gevorst ende gesloten Item sal de/ voirs(creven) wyn jaerlijx den voirs(creven) t(er)mijn due(re)nde leve(re)n dusent goede getuygelijk(er)/ walme(re) o(m)me die huysingen vanden voirs(creven) hove mede te deckene in nuwen/ oft in ouden dake daers meest te doene sijn sal met des abds raide ende/ alsmen die aldaer verdect soe sal de voirs(creven) wynne den werclieden den mont/ cost gheven en(de) tcloester sal de dachhue(re)n betalen Item es vorw(er)de geliefdet/ den voirs(creven) cloeste(r) aldaer meer doen te deckene dat dan de voirs(creven) wyn hem d(aer)toe/ jaerlijx leve(re)n sal noch driehondert oft vierhondert walme(re) ende alsmen die/ verdecte so sal de voirs(creven) wyn den werclieden den montcost gheven en(de) dat/ cloester sal die dachhue(re)n betalen maer tvoirs(creven) cloeste(r) sal tvoirs(creven) hof houden/ van ande(re)n grooven wercke Item sal de voirs(creven) wyn alle die lande vanden voirs(creven)/ hove wel en(de) loflijc wynnen werven mesten en(de) sayen alle jae(re) te mynsten
//
gelijc reengenoten Item sal de voirs(creven) wyn alle de truncboome moegen doen truncke(n)/ ten behoirlijken tijde end daer mede de voirs(creven) goede wel en(de) loflijc bevreden Item/ sal de voirs(creven) wyn moegen doen afhouwen alle de verdroeghde d truncboeme ende/ daer voe(r) setten op sijnen cost voe(r) elken boem twee poten van gelijken arde ten be/ hoirlijken tijde ende die wel doen verdornen op sijnen cost Item en sal de voirs(creven)/ wyn niet moegen doen truncken egheen opgaende houdt in gheenre manie(re)n/ Item sal de voirs(creven) wynne noch alle jaere planten op de voirs(creven) goede hondert/ goeder getuygelijker poten ten behoirlijken tijde ende die wel ende loflijc doen/ verdornen en(de) bewae(re)n op sijnen cost Item sal de voirs(creven) wyn m(ijn) he(re) den abdts/ sculdich sijn int voirs(creven) hoff tontfaene alle jae(re) den voirs(creven) t(er)mijn due(re)nde/ driewerven met twee capellanen ende sijnen huysgesynne te weten dat/ m(ijn) he(re) daer comen mach des eens daighs te vesp(er)tijde ende daer bliven/ dien nacht en(de) voirt des morgens alle dien dach en(de) weder dien nacht/ ende voirt des morgens tot nae sijnen ontbijten tijde ende sal de selve wyn/ allen den cost daeraf doen en(de) betalen beide van lieden ende van p(er)den uutge/ nomen van wijne wasse ende cruyde Item sal de voirs(creven) wyn oec sculdich/ sijn tontfaene den proefst den spikelmeester ende ande(re)n boden vanden voirs(creven)/ cloeste(r) ende hen en(de) hae(re)n p(er)den hae(re)n cost doen uutgenomen van wijne/ also dicke als zij inde martse te doene sullen hebben o(m)me des voirs(creven) cloest(er)s/ saken Item sal de voirs(creven) wyn oec ontfaen alle jae(re) den voirs(creven) t(er)mijn due(re)nde/ eens den meye(r) en(de) scepen(en) van onsen voirs(creven) hove van suemaingne ende/ hen teten ende te drincken gheven van goeden biere gelijc alst tot h(ier)toe/ gewoenlijc es geweest sond(er) mijns he(re)n cost Item sal de voirs(creven) wyn/ moegen houden int voirs(creven) hoff scape van hem selven op dat hij wilt/ maer waer hijse van hem selven niet gehouden en kan soe sal hijse houde(n)/ van mijnen hee(re) den abdt te vuedene te twee jae(re)n te deylene en(de) van/ nyemant and(er)s op datse mijn he(re) hem te vueden gheven wilt en(de) die/ sal hij dan wel doen heerden vueden ende bewaren Maer waert tsake/ datse mijn he(re) hem niet te vueden en woude gheven soe mach hijse te/ vueden nemen van wyem hij wilt ende de voirs(creven) wyn en sal tvoirs(creven)/ hof niet laten moegen staen sonder scape in gheenre manie(re)n It(em) gevielt/ dat gemeyn oirloghe wae(re) ende tgemeyn lant van brabant uut/ trocke metten h(er)toge van brabant ende tvoirs(creven) cloester leve(re)n moeste/ den hee(re) van p(er)weis oft zijnen lieden eenen waghen met viere p(er)den/ soe es vorw(er)de en(de) conditie dat de voirs(creven) wyn dien waghen leve(re)n/ soude met viere p(er)den wel gespannen ende met h(ar)nassche ende met/ twee knechten sonder des voirs(creven) cloesters cost en(de) op also waert dat
//
sake dat den voirs(creven) waghen verloren wordde oft die p(er)de storven sond(er) schout oft/ ocsuyn der voirs(creven) knechten met ghemeynd(er) scoffulturen oft met e(n)nig(er)hande/ ande(re) manie(re)n so es vorw(er)de dat tvoirs(creven) cloester den voirs(creven) wyn dan betalen/ ende genoech doen sal vanden waghen p(er)den ende h(ar)nassche voirs(creven) ter goed(er)/ knapen prijse maer gevielt dat de voirs(creven) waghen oft p(er)den verloren wordde(n)/ bij quader hoeden oft ocsuyne der knechten voirs(creven) soe en soude m(ijn) he(re) dabdt voirs(creven)/ niet gehouden sijn die te vergeldene in egheend(er) manie(re)n Item voirtmeer/ heeft de voirs(creven) wyn genomen en(de) bekent dat hij genomen heeft vanden/ abdt voirs(creven) die thiende den voirs(creven) cloeste(r) toebehoren(de) gelegen inde p(ro)chie van/ p(er)weys also verre en(de) gelijkerwijs dat willem heylwigen die voirtijts ge/ houden heeft Te houden te hebben den voirs(creven) t(er)mijn due(re)nde elcx jaers dae(re)n/ bynnen o(m)me sess mudde ror lovensch hards coe(re)ns alsulken coren als/ vand(er) thienden voirs(creven) jaerlijx comen sal der maten van p(er)weis voirs(creven) alle/ jae(re) te sint andries misse apostels te betalen en(de) int voirs(creven) hoff van sue/ maingne te leveren den voirs(creven) p(er)sonen oft den e(n)nigen van hen breng(er) des/ briefs en(de) telken t(er)mijne alse vervolghde schout ende oec om sess gulden/ saluyte(n) goet van goude en(de) zwaer van gewichten oft de werde d(aer)af in/ ande(re)n goeden gelde deen helicht te onser vrouwen liechtmisse ende dand(er)/ helicht te sent jans misse baptisten daer naest volgen(de) te betalen jaerlijx/ den voirs(creven) m(ijn) he(re) den abdt int voirs(creven) godsh(uys) jaerlijx den voirs(creven) t(er)mijn due(re)nde/ ende telken t(er)mijne alse vervolghde schout It(em) sal de voirs(creven) wyn den knechte(n)/ des voirs(creven) abds gheven alle jae(re) den voirs(creven) t(er)mijn due(re)nde een mudde coe(re)ns/ der maten voirs(creven) ende oec alle jae(re) des abds huysgesijn te jaersmisse eene(n)/ halven gulden(en) clinckart sond(er) afslach der principaeld(er) so(m)men voirs(creven) It(em) es/ vorw(er)de dat de voirs(creven) wyn alle goit en(de) vrucht dat vanden voirs(creven) goeden/ en(de) oec vand(er) thienden voirs(creven) jaerlijx comen sal bringen sal int voirs(creven) hoff/ en(de) vueren en(de) niet elders en(de) alle tstroe dat d(aer)af comen sal sal hij jaerlijx/ in meste bekee(re)n en(de) dat mest vue(re)n op tvoirs(creven) lant daers alre best te doen/ sijn sal slants meeste p(ro)fijte behoudelijc dat hij de voirs(creven) walme(re) daer uut/ scudden sal moegen Item es noch vorw(er)de ende conditie dat de voirs(creven) wyn in sijnen lesten jae(re) alle tstroe ende caf int voirs(creven) hof laten sal behoudelijc/ dien dat hij laten sal also vele stroes ongheet beide wynt(er) stroes en(de) zom(er)/ stroes in die schue(r) ende inde stalle alsmen behoeven sal moegen van half/ merte tot meye toe o(m)me alle die beesten shoefs voirs(creven) uut te voedere(n)ne/ ende noch ond(er)half hondert goeder schove crocken ongheet en(de) vier hond(er)t/ goeder schove erweten ongeett It(em) sal de voirs(creven) wyn noch laten te sijnen/ afsceiden in die cleyn schue(r) vanden aenden doren op die sijde ten peertsstalle/ waert in beiden sijden vol tot aen die want vanden pertsstalle eenen voet
//
neerd(er) dan die cleyn schue(r) dore es eenen goeden tas hoys voermaets wel ge/ tast en(de) getreden Item sal mijn hee(r) dabdt behouden altoes den sulde(r) op die/ capelle en(de) alle die nuwe huysingen tot sijnen behoef op also dat de wyn/ voirs(creven) hebben sal jaerlijx den voirs(creven) t(er)mijn due(re)nde viere ellen wullens lakens/ tot eene(n) rocke van sijnen knechten cleede(re)n en(de) daer voe(r) sal hij mijne(n) he(re)/ den abdt getruwelijc dienen Item sal tvoirs(creven) cloester den voirs(creven) wyn borgen/ telken jae(re) van sijnen twee cleynsten aerden twintich mudden corens/ der maten voirs(creven) sond(er) die te gelde te slaene totten naesten sinte andries/ misse apostels daer naest volgen(de) Item es den voirs(creven) wynne geleent tsijnen/ aencomen tgheen des hier nae volght dwelc hij geloeft heeft tsijnen lesten/ jae(re) te betalene te wetene sesthiene mudden loevensch coe(re)ns der maten/ van p(er)weys vijf mudden loevensch spelten en(de) vier dosijnen maten van/ p(er)weys vijf mudden loevensch cortter evenen ende sessentwintich en(de)/ een half mudden loevensch en(de) drie s dosijnen lang(er) even(en) mate van p(er)weys/d thiene dosijnen boenen twee mudde loevensch grauwer erweten en(de)/ twee mudde loevensch witter erweten en(de) twee mudde loevensch crocke(n) al/ d(er) maten van p(er)weis voirs(creven) Item noch eene(n) goeden wagen met vier p(er)den/ gestoffeert wel en(de) loflijc met haren harnasschen ende toebehoirten ge/ taxeert op veertich gulden peters der mu(n)ten sh(er)togen van burg(oign)[en] en(de)/ van brabant Item noch eenen ande(re)n goeden waghen oec met vier/ p(er)den gestoffeert met hae(re)n harnasschen en(de) toebehoirten getaxeert tsame(n)/ met eene(n) zoecvoelen(en) op sevenentwintich gulden(en) peters d(er) mu(n)ten/ voirs(creven) It(em) noch vier ploeghe drie eeghden een slachkerre ende twee/ eeghtwissen gestoffeert met hae(re)n toebehoirten getaxeert tsamen op/ vijf gulden peters d(er) mu(n)ten voirs(creven) Item noch sesse goede melc coeye/ vanden besten en(de) drie ande(re) melc coeye drie verssen die calfve(re)n droegen/ en(de) een jaerlinc calff en(de) noch drie jonge calve(re)n getaxeert tsamen/ op tsestich gulden peters d(er) mu(n)ten voirs(creven) Item noch sesse zoghe eenen/ beer en(de) negenentwintich goeder verkenen en(de) achthiene jonge cuddene(n)/ tsamen getaxeert op vierendertich gulden peters der mu(n)ten voirs(creven) It(em)/ es vorw(er)de dat de voirs(creven) wyn jaerlijx die hove beemden driesschen eeussele(n)/ ende landen wel en(de) loflijc grechten ende bevreden sal ende alle die thuyne(n)/ ten lesten jae(re) aen beemdt en(de) aen lant staende laten sal sonder afbreeken/ It(em) es vorw(er)de dat de wyn voirs(creven) ten lesten jae(re) de brake die hij met wynt(er)/ corne besaeyt sal laten wynnen sal wel en(de) loflijc op vier goede getidege/ voe(re)n en(de) die wel eeghden en(de) bereyden en(de) oec saeyen op dat mijn he(re) des/ gelieft voe(r) sente remeysmisse ende oft mijne(n) he(re) gelieft soe mach hij/ daer synden eene(n) zaire die dat wynt(er)coe(re)n besaeye(n) sal en(de) de wyn sal
//
alle den saet leve(re)n ende den zaiere den montcost gheven en(de) oec allen perswerck/ en(de) mijn he(re) voirs(creven) sal den sayere de dachue(re)n betalen Item sal de voirs(creven) wyn oec tsijne(n)/ lesten jae(re) alle die brake laten wel en(de) loflijc eens omgeackert ende alle die storte/ oec eens o(m)me geackert wel en(de) loflijc uutgesceiden dat d(aer) twelf boende(r) d(aer)af ge/ ackert wae(re)n in sijnen aencomen(en) als met eend(er) voren te sayene lange even(en)/ gelijc dat daer toe behoirt Item sal willem de wyn voirs(creven) alle die wynhove/ ten lesten jae(re) oec laten wel en(de) loflijc eens o(m)megedaen It(em) sal de wyn voirs(creven)/ ten lesten jae(re) in sijnen afsceiden alle dat mest dat hij maken sal van sinte/ remeysmisse tot liechtmisse toe vueren op die lande slants meesten p(ro)fijte daers/ alre best te doen sal wesen en(de) daer men somer coe(re)n saeyen sal Op also waert/ dat sake dat de voirs(creven) wyn bynnen sijnen voirs(creven) t(er)mijn ende getonste e(n)nige scade/ lede van tempeesten oft van gemeynen orloghe dat tvoirs(creven) cloest(er) hem d(aer)af/ rastoer doen sal gelijc ande(re) he(re)n en(de) p(re)laten hae(re)n pechtene(re)n boven en(de) beneden/ doen sullen Ende alle dese voirs(creven) geluften vorw(er)den ende conditien boven heeft geloeft/ de voirs(creven) wyn den voirg(enoemde) h(er) janne scoemans spijkermeest(er) inden name en(de) tot/ behoef des voirs(creven) cloesters van heyleshem vast en(de) gestedich te houden ende te voldoen/ tallen tijden ende t(er)mijnen als sij vallen ende verschijnen sullen en(de) telken t(er)mijne alse/ vervolghde schout Ende hier af sijn borgen des voirs(creven) wynne(n) alse principael/ sculde(re)n ongesund(er)t ende ongesceiden en(de) elc voe(r) al henrick iveten des wynnen/ wettich brued(er) ende missen van ned(er)hem woenen(de) te kersbeke te weten dat/ dese voirs(creven) borgen staen sullen desen t(er)mijn due(re)nde voe(r) alle conditien vorw(er)den/ en(de) der leeni(n)gen nae tenuere deser l(ette)ren ende van jae(re) te jae(re) voe(r) een jaerschae(r)/ des hoefs voirs(creven) en(de) niet meer Welke borgen voirs(creven) de voirs(creven) wyn geloeft/ heeft hen hieraf scadeloes te houden ende tontheffen als v(er)volghde schout h(ier)/ over wae(re)n lomb(ar)t pynnoc m(ar)cii xvii