Cond zij allen lieden dat gheert de snyde(re) van buetsele es comen voe(r) scepen(en)/ van loeven(e) ende heeft genomen en(de) bekent dat hij genomen heeft van janne loenijs/ woenende te loeven inde proefstrate alle de goede des selfs jans in wynnende lande(n)/ beemden ende eeusselen also die bynnen kerckem gelegen sijn uutgenomen een eeussel/ geheeten tstringeleeussel en(de) den busscopshoff gelijc en(de) also verre gheerd straesborchs/ van kerckem de selve goede vanden voirs(creven) janne hier voe(r) in pechtingen gehoude(n)/ heeft Te houden te hebben en(de) te wynne(n) van halfmerte naestcomen(de) eenen/ t(er)mijn van twelf ja(r)en langc deen nae dand(er) d(aer) nae sond(er) myddel volgende/ elcx jaers hie(re)n bynnen te wetene de voirs(creven) wynnen(de) lande o(m)me en(de) voe(r) thien/ sacke en(de) thien moelevaten rogs d(er) maten en(de) pacht van kerckem Ende/ de voirs(creven) beemde ende eeussele op en(de) voe(r) sess grijpen te weten veertich plecke(n)/ brabantschs payments voe(r) elcke grijpe gereekent te betalen te weten tvoirs(creven)/ coren tsente andries misse en(de) te loeven te leve(re)n ende de voirs(creven) sess grijpe(n)/ tsente m(er)tens misse inden wynter alle ja(r)e den voirs(creven) t(er)mijn due(re)nde ende/ telken t(er)mijne alse v(er)volghde schout Item sal de voirs(creven) wynne den voirs(creven) t(er)mijn/ due(re)nde jaerlijx de voirs(creven) goede wel en(de) loflijc wynnen ende werven gelijc/ sijnen reengenoten boven en(de) beneden en(de) met goeden cusba(r)en zade bezaeyen It(em)/ sal de voirs(creven) wynne alle ja(r)e den voirs(creven) t(er)mijn due(re)nde alle de lande die hij/ met rogghe besaeyen sal wel en(de) loflijc te voren ov(er)mesten It(em) sal de voirs(creven)/ wynne den wynt(er)aert te weten den meysenacker wel en(de) loflijc gemest en(de)/ besaeyt laten met rogge op vier getideghe vo(r)en de storte te weten calfver?/ eeussel eens o(m)megedaen en(de) de brake te weten tscouwboschvelt al geheel/ It(em) mach de voirs(creven) wynne alle truncboome staende aende voirs(creven) goede sijne(n)/ t(er)mijn due(re)nde ten behoirlijken tijde truncken om de voirs(creven) goede dair zijs te / doen hebben sullen mede te bevreden Ende alle dese voirs(creven) vorw(er)den geluften/ en(de) condicien (et)c(etera) ja(cop) py(n)noc wynghe oct(obris) xxii