It(em) navolgende de vo(n)niss(en) van s(in)te pet(er)sma(n)nen van loeven onlangs gewijst/ tuschen janne van wesenbeke scouth(eit) van zanthoven in deen zijde/ en(de) henrick vander blaect s(in)te pet(er)s man van loeven in dande(r) so/ zijn op heden in questien comen voe(r) meye(re) en(de) scepen(en) van loeven/ de voirs(creven) p(ar)tien om des wille dat de voirs(creven) henrick die gevangen/ man was voe(r) tvoldoen vanden voirs(creven) vo(n)niss(e) zeke(re) saken op doen/ woude [aengaende poenten] inden selven vo(n)niss(e) geruert die hij ten voirs(creven) scouth(eit)/ wairt te seggen hadde dwelc de scouth(eit) meynde dat hij niet/ doen en zoude hij en soude ierst voldoen vand(en) voirs(creven) vo(n)niss(e) etc(etera)/ met borchtochten na inhouden des zelfs also dat de scepen(en) van/ loeven des gemaent zijnde wijsden voe(r) een vo(n) dat de voirscr(even)/ henrick zijn saken op doen zoude moegen en(de) dae(re)n teynden/ recht cor(am) m(ichaele) abs(oloens) roelants borch(oven) lynt(re) hortbeke m(er)sberge julii xxvi