It(em) vander aenspraken die laureys de clyeve(re) gedaen heeft voe(r) meye(re) en(de)/ scepen(en) va(n) loeven tot janne van tricht barbier den jonghen alse va(n)/ dat de selve jan den voirs(creven) laureyse gequetst en(de) gewond hadde also/ hij anderwile gekend hadde voer goede ma(n)nen in eenen peyse d(aer)af/ bij hen gemaict op condicie zo verre hij den wech die hem doen/ aengeseeght wairt te doen niet en dade bynnen eenen zek(ere)n tijde d(aer)toe/ genoemt dat dan den peys niet zijn en soude mair de sake soude/ staen op heur yerste also de voirs(creven) laureys bood te thoenen en(de)/ oic dat den tijt daer toe genoemt ov(er)leden wa(r)e eysschende d(aer)om
//
ter bet(er)nissen zeke(re) weghe oft alsulke bet(er)niss(e) als de scepen(en) wisen souden/ Daer inne de voirs(creven) jan meynde ongehouden te zijne mids den voirs(creven) peyse/ meynende te gestaen met eenen weghe te nijsele die hem d(aer)inne aen/ geseeght waert ontkennende de voirs(creven) condicie anders niet te wesen dan/ of hij den meester niet af en dade bynnen drie daghen daer na dat/ dan den peys te nieute zijn soude en(de) and(er)ssins niet ende dat hij den/ meester afgedaen hadde in tijts boed te thoenen Seggende oic dat/ hij den voirs(creven) wech niet gegaen en hadde quam bij dien dat hij bynne(n)/ den tijde dat hij om dien te doen soude hebben moeten porren ae(n)genome(n)/ was bij mijnen he(re) van chantrain om met hem inder reysen te trecken/ bieden(de) dairaf oic zeke(re) thoeniss(e) Ende thoeniss(e) ten beiden zijden ae(n)gehoirt/ so hebben de scepen(en) van loeven gewijst voer een vo(n)nisse dat de voirs(creven)/ jan gehouden zijn sal den voirs(creven) laureyse ter bet(er)niss(en) te doen een/ bedevairt te meylanen en(de) d(er)w(er)ts te porren bynnen xl dagen naistc(omende)/ en(de) goede wairheit d(aer)af te bringhen na des(er) stad recht oft zijnen/ goeden moet d(aer)af te hebben Actum cor(am) scab(inis) in scampno junii xiiii