It(em) jan de leppe(re) plattijnmake(r) heeft gegeven voe(r) hem zijn erven ende/ nacomelinghen jacoppen vlas cousmake(r) zijnen erfgenamen en(de) nacome/ linghen een cleyn huysken met eenen hoefkene dair voe(r) liggende/ en(de) metter heymelich(eit) dair op staende en(de) ande(re)n heuren toebehoirten/ gelijc de voirs(creven) goede gelegen zijn inde dorpstrate achter en(de) aen/ thuys svoirsc(reven) jacobs vlas dat wilen was gielijs crauwel tusschen/ tselve huys aen deen zijde en(de) die goede vrancks van mairbeke beck(er)s/ op dande(re) en(de) de goede toebehoiren(de) der pedagogien vander lyelien meest(er)/ karels me(n)nekens inde derde en(de) de goede toebehoiren(de) der ca(m)men gehete(n)/ gulden(en) leeu aende vierde tsamen met den doerganghe zo w verre/ hij gelegen es en(de) hem strect van aen tvoirs(creven) hoefken tot opten egghe/ vanden ghevele van svoirs(creven) jacobs huyse dat wilen gielijs crauwels/ was en(de) van dien egghe voirts nederwairts vijfthien voete verre/ behoudelic den voirs(creven) janne zijn gaen en(de) ke(re)n inden selven doergangh/ tot den voirs(creven) egghe toe aen welken egghe de voirs(creven) jan [jacob] sal moeghen/ hanghen een doere en(de) dander gedeelte vanden doerganghe metten/ huyskene en(de) hoefkene voirscr(even) also afsluyten en(de) beheymen Ende den/ voirs(creven) doergangh van dien egghe nederw(er)t bynnen den voirs(creven) vijfthien/ voeten en sal noch jan noch jacob voirs(creven) moegen beco(m)me(re)n in e(n)nigher/ manie(re)n voirder dan dat de voirs(creven) jan aldair onder den oesendrup vande(n)/ camhuyse daer aen staende sal moegen hanghen een berd also hoeghe/ datmen dair onder vueghlic en(de) ombelett gaen mach en(de) dair op sal hij/ moegen leggen des hem gelieft Behoudelic in desen waert dat de vors(creven)/ jan of zijn nacomelinghe oft zijn recht hebbende thuys dat de voirs(creven)/ jan aldair nu besittende es gelegen tusschen de voirs(creven) ca(m)me en(de) svorsc(reven)/ jacobs vlas huys hier namails vercochten oft verthierden also dat dat/ in heurer rechter linagien niet en bleve dat dan tvoirs(creven) gebruyck en(de)/ bewynd inden voirs(creven) doerganghe den selven goeden noch den bezitt(ere)n/ van dien niet meer volgen en sal mair zelen de voirs(creven) jacob en(de)/ zijn nacomelinghe dien doirgangh t(er) stont moegen te henw(er)ts nemen/ en(de) besluyten ten ynde vanden voirs(creven) xv voeten gemeten vanden voirs(creven)/ egghe ned(er)w(er)ts Voert es bevorw(er)t en(de) ondersproken dat de vors(creven)/ jacob erflic hebben sal zijnen gangh over en(de) dore den vors(creven) doergangh/ tot den borrenputte staende aen svoirs(creven) jans huys neven dynde/ vanden selven doerganghe en(de) oic dnutscap en(de) tgebruyck vanden/ selven putte alst hem gelieft om ald(air) water te halen(e) en(de) and(er)ssins
//
niet Sal oic de voirs(creven) jacob moegen setten in zinen ghevel tegen den voirs(creven)/ putte bynnen der helicht vander goeten dair onder gelegen eenen morsel/ om dwater dair inne te ghieten en(de) also voirt op tsijne tontfanghen/ erflic te houden en(de) te besitten op tween(de)vijftich stuv(er)s der mu(n)ten (et)c(etera)/ Dair uut en(de) uut den voirs(creven) ande(re)n huyse tsvoirs(creven) jans erflic gaende ten/ behoirliken tijde te betalen die wouter groothoot daer aen heeft en(de) voertmeer/ op eenen(de)twintich stuv(er)s en(de) eenen halven der mu(n)ten voirscr(even) goed en(de) ghinghe/ erfliker rinten alle jaire te kersmisse te betalen den voirs(creven) janne de leppe(re)/ en(de) zijnen nacomelinghen tot eeuwighen daghen Dyerste betalinghe d(air)af/ inne te gaen van kersmisse naistcomen(de) over een jair en(de) niet eer/ Ende op dese erfrinte en(de) den voerco(m)mer voirscr(even) heeft gelooft de/ voirs(creven) jan den voirs(creven) jacoppen de voirs(creven) goede van allen [ande(re)n] letsele ende/ calai(n)gien voertaen te warande(re)n en(de) d(air)af alt(oes) genoech te doen oft hem/ dair inne yet te luttel geschied wae(re) also dat hem en(de) zijne(n) nacome/ linghen vast en(de) zeker sal moegen wesen Heeft voert gelooft de vors(creven)/ jan den voirs(creven) jacoppen en(de) zijn voirs(creven) goede vanden voirs(creven) tween(de)vijftich/ stuv(er)s erflic svoirs(creven) wouters groothoet altoes scadeloes en(de) ongelast/ te houden en(de) heeft daer voe(r) de voirs(creven) jan zijn voirs(creven) huys met/ zijnre toebehoirten bij orlove tshe(re)n vanden gronde [behoirlick] tonderpande gesett/ en(de) verbonden Geloven(de) den selven onderpand opte voirs(creven) tween(de)vijftich/ stuv(er)s erflic alse op allen co(m)mer dair uutgaende voertaen te warande(re)n/ also dat den voirs(creven) jacoppen en(de) zijnen nacomelinghen vast en(de) genoech/ sijn sal welcke eenen(de)twintich en(de) eenen halven stuv(er)s erfrinten vorscr(even)/ de voirs(creven) jacob lossen en(de) quiten mach alst hem gelieft elcken pe(n)ni(n)gh/ dairaf met achtien geliken pe(n)ninghen en(de) met vollen rinten en(de) in/ dier quitinghen sal de voirs(creven) jacob tpontgelt alleene betalen Ende es/ voert bevorw(er)t zo wanneer de voirs(creven) jacob de voirs(creven) quitinghe doet/ dat dan de selve jacob ende jan de pe(n)ninghe dairaf comende beke(re)n sele(n)/ in afleggene en(de) mind(er)nissen vanden voirs(creven) tween(de)vijftich stuv(er)s erflic/ svoirs(creven) wout(er)s groothoet zo v(er)re die alsdan niet al afgeleeght en zijn/ Es noch h(ier)inne bevorw(er)t en(de) ondersproken dat de voirs(creven) jan de voirs(creven)/ uutgegeven goede hebben en(de) gebruycken sal also hij die opten dach/ van heden helt tot paeschen toe naistcomen(de) of veerthien nacht d(air)na/ ombegrepen En(de) dan sal hij tvoirs(creven) huysken afbreken en(de) alle den/ afvall d(air)af comende sal hem volghen uutgenomen de steenne die/ den voirs(creven) jacoppen volghen selen Cor(am) oppendorp et vynck/ nove(m)br(is) xx