It(em) het zijn comen in rechte voe(r) meye(r) en(de) scepen(en) van loeven henr(ick) speelbergh/ in deen zijde en(de) peter van mairbeke in dande(re) aldair de voirs(creven) henrick/ een aensprake dede tot den selven pet(ere)n zeggen(de) dat zij anderwile/ tsamen vergadert hadden geweest en(de) dat daer de voirs(creven) henr(ick) sette/ eenen nobel oft vijftich stuv(er)s daer voe(r) om den voirs(creven) pet(ere)n dien te/ trecken en(de) daer voe(r) te zetten den voirs(creven) henricken te leve(re)n oft van/ hem tontfaen op eenen zek(ere)n prijs xiiii mudde tarwen xiiii mudde/ roggen xiiii mudde ghersten en(de) xiiii mudden evenen all der maten va(n)/ loeven en(de) dat doen de voirs(creven) peter den voirs(creven) nobel track zettende elc/ mudde vanden voirs(creven) graine op zeventhien stuv(er)s te leve(re)n tuschen dien/ tijde en(de) liechtmisse doen naistvolghende en(de) nu langhe ov(er)leden vanden/ welcken de voirs(creven) henrick koes tvoirs(creven) grain tontfaen en(de) tgelt te/ gheven betalen(de) noch eenen rijnsch(en) gulden(en) van xx stuv(er)s van gelage/ dairaf hem peter deen helicht soude opleggen alsmen tvoirs(creven) grain lev(er)de/ oft henrick soude hem die helicht aen tvoirs(creven) grain inder leveringhen/ afcorten welcke poenten de voirs(creven) henrick bood te thoenen hopende/ zo verre hij des volquame dat hem dan de voirs(creven) peter vander voirs(creven)/ comanscap voldoen soude en(de) sculdich wae(r) te voldoen Dair op de/ voirs(creven) peter hem verantw(er)de meynende d(air)inne niet gehouden te wesen/ bij diversen redenen en(de) zunderlinghe want die comanscap wel van/ over drie jairen geschied was Welcke aensprake en(de) verantw(er)den geschied/ zijnde de scepen(en) van loeven wijsden den voirs(creven) henricken tsijnen/ bethoene des hij geheelic volquam van allen den poenten also hij hem/ vermeten hadde en(de) voirscr(even) steet Na den welken de scepen(en) va(n) lov(en)/ ter maniss(en) vanden meye(r) wijsden voe(r) een vo(n)nisse dat de voirs(creven) p(ar)tien vand(en)/ voirs(creven) comanscap malcande(re)n voldoen souden na dat de wairheit d(air)af/ gedraghen heeft Cor(am) roel(ants) vynck heyk(ens) caverson ja(nuarii) xvi