Alsoe als ten vervolghe joh(ann)is de vos procurator(en)/ als procur(eur) hee(re)n jans de mol ridders als man/ en(de) mo(m)boir vrouwe marien vand(er) borch wed(uw)e/ hee(re)n augustijns wijlen vand(en) borchoven geleyt/ zijnde nae den rechte van des(er) stadt voir zijn/ wettich gebreck uut crachte van scepen(en) brieven/ van loeven(e) tot allen den goeden beyde have/ en(de) erve katlijnen h(er) henricx wed(uw)[e] goirts wijlen/ vand(en) putte jans vand(en) putte huer soens en(de)/ gheerts bastart soe wair die gelegen zijn met/ brieven van des(er) stadt gescreven es geweest/ aen allen officie(re)n Ende versocht zee(r) ernstelijck/ alle de goede der voirs(creven) p(er)sonen te leve(re)n en(de) te/ doen volgen den voirs(creven) geleidden oft den bring(er)/ ons(er) brieven in zijnen name Ende den voirs(creven)/ p(er)sonen oft zij hen dair tegen hadden willen/ oppone(re)n dach van rechte te beteeken(e) alh(ier) inde/ banck voir meye(re) en(de) scepen(en) van loeven(e)/ op heden dienen(de) aldair nyemant van hu(n)nen wege/ en es gecompareert den voirs(creven) procur(eur) compare(re)nde/ en(de) trecht voirts versueken(de) Soe hebben de/ scepen(en) van loeven(e) ter manissen smeyers/ gewesen met vo(n)nisse nae dien hen behoirlijck/ gebleken heeft bij cleernissen jans dridoens
//
bode te voete van des(er) stad die gecleert heeft bij/ zijnen eede de voirs(creven) leveri(n)ge en(de) dach besch(eidinge)/ bijden stadhouders smeyers van van cumptich/ te roesbeke en(de) breyshem en(de) van houthem tot/ s(in)[te] m(er)tens vissenaken behoirlijck geschiet te/ sijne dat men den voirs(creven) geleidden vand(en) voirs(creven)/ goeden houden soude inde macht van zijnen/ scepen(en) brieven beleidde soe verre het noch voir/ hen scepen(en) comen is In scampno cor(am) o(mn)ibus/ dempt(o) beert octobr(is) ultima