Vande(n) gedinge dat geweest heeft inde banck voir/ meye(re) ende scepen(en) van loeven(e) tusschen den procur(eur)/ des schouth(eits) van he(re)nthals aenlegge(re) ter eender zijden/ ende janne van aven poirte(re) van des(er) stad verw(eer)de(re)/ ter ande(re) aldair de voirs(creven) aenlegge(r) dede segge(n) dat/ de voirs(creven) verweerde(r) in hachte(n) zijnde en(de) aengetast/ ten versueke vand(en) drossete van braba(n)t geloeft hadde/ ongepoirtert ende ongevrijt tot sijnder maniss(en) inder/ vroente(n) te comen(e) oft sijne(n) moet te hebben(e) oft uuterlijck/ tegen hem nairder stad recht van he(re)nthals rechts te/ plegen(e) offe(re)nde dair af thoon soe verre hem dat/ wordde ontkint Hopen(de) voir sijn conclusie dat tselve/ bekint oft bij ontkynne(n) gethoont de sake ende p(ar)tien/ souden wordden ger(e)mitteert ende versonden ter/ bancken recht van he(re)nthals voirs(creven) hem des gedragen(de)/ totten rechte ende vo(n)nisse niet tegenstaen(de) den/ brieve(n) bij hem gei(m)petreert D(aer)op de voirs(creven) v(er)weerde(r)/ antwerden(de) dede segge(n) datme(n) niet bevi(n)den en/ soude de gelufte in maten voirs(creven) geschiet te zijne/ e(m)mers nae recht genoech zijnde om gere(n)voieert te/ zijne mair dat hij soe v(er)re hij hem yet eyssche(n) woude/ dat sculd(ich) soude sijn te doene oft bijden offic(ie)r van/ des(er) stad te doen doene alh(ier) inde banck dair hij/ nae de h(er)lijch(eit) ons gened(ichs) hee(re)n en(de) der vrijh(eit) recht/ vander poirterie(n) van des(er) stad behoirt hem des/ oic gedragen(de) tot den rechte ende totte(n) vo(n)nisse/ der hee(re)n scepen(en) Hebben deselve scepen(en) ter maniss(en)/ smeyers gewesen voir een vo(n)nisse nae dien de/ ae(n)legge(r) nae voirgaen(de) ande(r) vo(n)niss(en) sijns vermeets/ genoech volcome(n) was dat sij de sake ende p(ar)tien/ remitteerden ende versynden ter bancke(n) recht van/ he(re)nthals in scampno aug(ust)[ti] xxvi