It(em) es te weten(e) dat de voirs(creven) guedinge geschiet/ es in voldoeni(n)gen van alsulken drie rijders erflijck/ als de voirs(creven) jan pynnock der voirs(creven) weduwen sculd(ich)/ es te bevestigen naevolgen(de) der comenscap die hij d(air)af/ tegen hue(ren) tauden tijden gedaen heeft vander herbergen/ geheeten den sloetel inde dorpsstrate dair af den/ derden rijder als de wed(uw)[e] bekint heeft voir den/ raide vander stad afgeleet is Ende soe sullen de voirs(creven)/ rijders sijn sulck ende staen tot alsulker natue(re)n in/ betaling(en) erfdo(m)me ende afquitingen als nae inhoudt/ der selver comenscap behoirt Ende es deselve guedinge/ gedaen te dier meyni(n)gen ende op alsulken vorweerde/ ende conditie dat in alsoe verre deselve weduwe/ inder guedingen die zij gedaen heeft ja(n)ne van thienen/ tot behoef des voirs(creven) jans pynnock januarii penult(ima)/ a(n)no xcvii lestleden vand(en) selve(n) sloetel zij allessins/ genoech ende voldaen heeft naevolgen(de) der yerster/ comenscap alsoe nae recht behoirt dat zij in dien/ gevalle hue(r) ter stont oft tallen tijden alst hue(r) gelieft/ metter voirs(creven) gueding(en) der voirs(creven) twee rijd(er)s erflijck/ sal moegen behulpen Ende oft zij dair inne niet/ voldaen en hadde ende sij alnoch voldoen woude en(de)/ voldade nae der selver ierster comenscap en(de) nae recht/ dat zij insgelijcx heu(r) alsdan metter selver guedingen/ sal moegen behulpen mair soe verre bevonde(n) wordde/ dat zij nae recht ende inhouden der comenscap niet/ voldaen en hadde noch oick alnoch voldoen en woude/ oft en conste oft dat zij meer chijsen int wairscap bracht
//
hadde dan inder yerster comenscap verredent was/ dat zij hue(r) alsdan met des(en) guedingen niet behulpen/ en soude moegen ende soude dese guedinge alsdan/ nul ende van onweerden gehouden wordden als oft/ zij niet geschiet en wa(r)e(n) ende soude jan alsdan staen/ op sijn beloop van rechte vand(en) rijder bij he(re) gequeten/ Cor(am) eisd(em)