Cond sij allen lieden dat henric van tielt es comen in jeghenwordicheit der scepen(en) van/ love en(de) heeft bekent dat hij ghenome(n) heeft van wenceline de herthoge sine goede ghele/ ghen te rixfonde(re)n met allen hare(n) toebehoerte(n) en(de) met den dofhuse mar uutghescheiden den/ wijngart te houdene en(de) te hebbene enen t(er)mijn van neghen jaren lanc ingaende te half m(er)te/ naest comende ind(er) voeghen en(de) manieren hier nae volghende Dats te wetene dat de voers(creven)/ henric van tielt hebben [gheven] sal de [vanden] lande(n) toten voers(creven) goeden hoe(re)nde [dier es] onttrent veertien boende(r) en(de)/ daer toe een hoefken [gheleghen] al daer binnen den bijvanghe vande(n) voers(creven) goeden dat de voers(creven) wencelijn/ daer toe vercreghen heeft te samen [oec] met ene(n) dachmael lands daer bij [buten lovene bid(er) elst] gheleghen te samen o(m)me/ neghen en(de) twintech mudde rogs elcs jaers hier binnen o(m)me goet en(de) payabel der maten van/ lovene elcs jaers hier en binnen tsinte andries misse dsapostels te betalen en(de) te lovene daer den/ voers(creven) wenceline ghenueghen sal te leve(re)n Oec sal de voers(creven) henric alle jare den tsijs vanden voers(creven)/ hoefken betalen sond(er) wencelijns cost Item sal de voers(creven) henric hebben sal elf dachmale beemde/ en(de) de weyde alsoe die beleghen es int hof te gad(er) o(m)me vijftien hollantsche guldene goet en(de) ghenge/ alle jare hierenbinne(n) tsinte m(er)tensmisse te betalen Item soe wa(n)neer aen de husinghe aldaer yet es/ te deckene of te pleckene soe sal de voers(creven) henric allet stroe [en(de) walme(re)] daer toe gheven en(de) de wercliede voede(n)/ sond(er) enighen ande(re)n cost daer toe doene [En(de) die ghelijc sal de selve henric gheven alle de walme(re) diemen toten wijngarde aldaer orbe(re)n sal] En(de) wencelijn sal behouden den stal en(de) de porte tot sijns/ selfs behoef Ite(m) sal henric voers(creven) den voers(creven) wenceline alle jare halen drie dusent wijngartstaken/ daer wencelijn wilt Ite(m) de selve henric sal wenceline alle jare twee daghe mestvueren met sinen/ waghen op sine(n) waghen [wijngart] te rixfonde(re)n en(de) halent daert wencelijn copen sal binnen lovene op dat/ wencelijn den waghe(n)man dan voeden wilt Item henric voers(creven) sal wenceline alle jare sine balghe(re) va(n) sinen/ wine vueren in een persse te lovene en(de) die ghelijc sinen wijn en(de) sijn wijngarthout tot wat huse binnen/ lovene wencelijn wilt Oec sal de voers(creven) henric wenceline alle jare een we vaert wine vueren met sinen/ waghene tot bruessele Item de voers(creven) henric sal de voers(creven) lande binne(n) den voers(creven) sinen t(er)mine tweew(er)f/ wel en(de) cusbarlec mesten En(de) alsoe dicke als hij enich lant hoervrocht soe sal hijt mesten Ite(m) sal/ henric ten lesten ja(r)e besayen vijf boende(r) en(de) een dachmael lands met weyssinghe op vier tidighe voren
//
En(de) de storte sal hij laten op ene vore en(de) de brake gheheel En(de) int letse jaer sal hij vol besayt hebben/ tsinte dyonijsmisse ten lanxten Item doeft dat inden bogart wassen sal dat selen de voers(creven) wencelijn en(de)/ henric alle jare hebben en(de) deylen half en(de) half en(de) sij selen ond(er) hen beyden de dachhuren vanden oefte te/ lesene ghelijc ghelden mar henric sal de lesers voeden En(de) henric sal wenceline sijn deel vande(n) oefte vueren/ tot wat huse hij wilt binne(n) lovene hij Ite(m) henric sal thof [wel] houden van grechtene en(de) van lukene alsoeme(n)/ sculdech es te doene en(de) ten lesten jare wel bevreedt laten En(de) den loke die daer ov(er)blijft sal wencelijn/ hebben sine(n) wille met te doene Welke vorwerden ghe en(de) condicien alle en(de) yeghewelke boven bescreven/ de voers(creven) henric heeft gheloeft wel en(de) volcomelec te voldoene tot elken t(er)mine en(de) in alle der voeghen/ voers(creven) alse vervolghde scout En(de) des sijn burghen des voers(creven) henrics als principale sculde(re)n onghesundert/ en(de) onghescheiden jan van weterbeke becke(r) en(de) arnt van vileer cledermake(r) de welke sine burghen de voers(creven)/ henric heeft gheloeft daer af scadeloes tontheffene Hier waren over godevert de kersmake(re) en(de) lodewijc/ roelants scepen(en) van lovene ghegheven int jaer onss he(re)n m vierhond(er)t en(de) drie den seven(en)twintechte(n) dach in augusto