Het sijn comen in rechte voer meye(r) ende scepene(n) van lovene jan godens van/ meerhout in deen side ende jan van woutswynkele naturlec sone jans van woutswynkele/ die ov(er)mids vo(n)nisse van scepen(en) brieven van loven(en) beleydt es tot den goeden beatrice(n) wile(n) goedens/ moeder des selfs jans van woutswynkele in dander side daer de selve jan goedens segghen dede/ dat hi de naeste levende wae(re) vanden goeden die bleve(n) wae(re)n nae de doet der voirs(creven) beatricen wa(re)t/ hi haer wittich brued(er) was van wittigen bedde en(de) dat boet hi te thoene(n) metten minsten daer/ hi mede liden mochte inden rechte Ende dede voert segghen al hoe dat de voirs(creven) jan van wouts/ wynkele tot sijnre moed(er) goede beleydt wae(re) soe meynde hi dat hem dat beleyt gheen onstade/ doen en soude mids vorw(er)den ende condicien die geschiet wae(re)n tusschen sijnre moed(er) en(de) hem/ dats te weten dat doen de voirs(creven) jan van woutswynkele hem beleyden dede tot sijnre moed(er)/ goede dat doen sijn moed(er) doen sij dat v(er)nam groet mesbaer maecte verwonde(re)nde hoe(re) bi/ wat redenen hi tot hoe(re)n goeden dede leyden want sij noyt te loven(en) en quam daer sij hem brieve/ bekindt hadde alsoe dat de vriende en(de) gebueren daer tusschen ghingen sprake(n) en(de) deedingde(n)/ als de ghene die gherne moed(er) en(de) kindt verenicht hadden om dat sij benemen wouden dat/[de woerde die de moed(er) geseeght hadde] tot she(re)n kennissen niet en quame de woerde die de moeder geseeght hadde en(de) verdroeghen/ daer ond(er)lingen dat de voirs(creven) jan van woutswynkele sijnre moed(er) de voirs(creven) brieve ov(er)gheve(n)/ soude ende dat hi hem daer mede nu(m)mermeer behulpen en soude en(de) hier op soude de moed(er)/ segghen dat sij te loven(en) gheweest hadde en(de) den voirs(creven) scepen(en) brief bekindt hadde en(de) doen/ gaf hi hoe(r) over den bekindt brief daer mede dat sij meynde alle de brieve over gehadt/ te hebben Ende alle dese voirscr(even) pointen boet de voirs(creven) jan goedens te thoene(n) met goed(en) waerh(eit)/[ende metten mynsten] daer hi inden rechte mede liden mochte Voert boet de voirs(creven) jan te thoene(n) dat doen de voirs(creven)/ beatrijs in hoe(re)n siecbedde lach daer sij niet af en verquam badt en(de) begheerde datmen/ den voirs(creven) scepenen brief hoe(re)n voirs(creven) sone niet en gave mar datme(n)ne janne den coste(re) hoe(re)n/ brueder gave Daer op dat de voirs(creven) jan van woutswynkele antw(or)de en(de) dede segghen/ sinen voirsprake dat hem de waerheit noch getuychnisse dat [dier] hem jan goedens vermeten/ hadde hem noch sinen beleyde gheen onstade doen en soude mar dat hi blive(n) soude in/ sinen beleyde want men gheen scepen(en) brieve te nieute maken en mochte het en wae(re) met/ scepenen monde ocht met scepenen brieve Hier op maende de meyer de scepen(en) van/ loven(en) nae aensprake ende nae antwerde van beyden p(ar)tien (et) [die] wijsden voer een vo(n)nisse(n)/ want hem jan goedens thoenisse vermeten hadde dat hi thoenen soude en(de) dat be/ gheerden [sij] taenhoe(re)n ende dae(re)n teynden recht Daer thoende jan goedens voirs(creven) met vier/ knapen alle des hi hem voe(re) vermeten hadde te thoenen alsoe dat de scepen(en) van loven(en) vande(n)/ meyer van loven(en) daer op worden ghemaent (et) [die] wijsden voer een vo(n)nisse nae aensprake/ nae antw(or)de en(de) nae thonisse dat den voirs(creven) beleyt brief volghen soude den naesten erfgename(n)/ der voirs(creven) beatricen ende dat de voirs(creven) jan van woutswynkele oec wed(er)keren soude den naeste(n)/ erfgename(n) alsulken have als hi mids den voirs(creven) beleyde opgehave(n) hadde Hier wae(re)n/ over henric vanden borchove(n) gielijs de rike wouter pynnoc jan van oppendorp gheert/ van haenwijc en(de) jan vand(er) lynden scepen(en) van loven(en) int jaer m iiii[c] en(de) xvi op den/ ande(re)n dach van merte
//