It(em) sal hem de vors(creven) jan metten vors(creven) schoutbrieve moge(n) doen beleide(n)/ alst hem gelieft tot allen den goeden have en(de) erve des vors(creven) henrix/ Dwelc gedaen sijnde sulle(n) de selve brieve ond(er) scep(enen) blive(n) liggende/ tot desen eynde dat de selve jan mette(n) selve(n) beleide nae de doot/ des vors(creven) henrix en(de) clemencie(n) sijns wijfs op alle en(de) niet eer op alle/ de selve goede v(er)hale(n) en(de) v(er)reike(n) de so(m)me van xxx rijd(er)s m(ijn)/ gened(ichs) h(ere)n mu(n)ten eens te betale(n) en(de) niet meer mette(n) coste vanden/ beleide op dat hij enich gedaen hadde En(de) ond(er) de macht vanden/ selven beleide te houden alle de goede des vors(creven) henrix sond(er) den/ selve(n) henricke die goede te moegen v(er)coepen v(er)tieren oft te belaste(n)/ in enig(er) manie(re)n het en wae(re) bij (con)sente des vors(creven) jans oft dat de/ selve jan vande(n) vors(creven) xxx rijd(er)s geheelic vol en(de) al betaelt/ ware metgad(er)s den costen die d(aer) op gelopen souden moge(n) sijn/ Behoudelic oec in desen oft de vors(creven) yemant den vors(creven) henricke sijn/ goede ongebruykich maecte dat de vors(creven) jan met sijne(n) vors(creven)/ beleide dat bescudden sal ten coste des vors(creven) henrix En(de) den/ selve(n) ja(n)ne vandes vors(creven) is en(de) alle cost en(de) co(m)m(er) v(er)nueght sijnde/ so salme(n) de(n) vors(creven) henr(icken) de vors(creven) brieve wed(er)om ov(er)geve(n) cor(am) eisd(em)