It(em) het sijn come(n) in rechte voir meye(r) ende scepen(en) van loeven(en)/ jan everaerts van aerschot als aenlegge(r) in deen zijde ende/ jan van thienen hantsschoe(n)make(r) in dande(r) alse van dyen dat de/ voirs(creven) jan van thiene(n) teghen den voirs(creven) janne everaerts ghehuert/ zoude hebben een huys ghelege(n) taerschot bijde hoeghbrugghe xii jaire(n)/ langk elcx jairs om iiii hollantssche gulden(en) dair af de hue(re) totten/ daghe toe van heden alsoe verre verstreken es dat hij hem boven/ alle betalinghe dair af ghedaen schuldich bleven es xiiii hollantssche
//
gulden(en) ende wae(re) oic wair dat hij hem dair voe(r) tot aerschot/ beclaeght hadde ende voir de voirs(creven) xiiii hollantssche gulden(en) verreyct/ bieden(de) alle(n) die pointen te thonen(e) metten mynsten dair mede dat/ hij zoude moghen lijden inden rechte dair op de voirs(creven) jan van/ thienen antw(er)de hem ontkennen(de) de voirs(creven) hue(re) en(de) oic hem yet/ schuldich te zijne niet te myn want hem de voirs(creven) jan everaerts/ thonisse vermeten hadde dat lyet hij gaen soe dat diene(n) mochte/ nae recht ende nae dien dat de voirs(creven) jan everaerts tsijnen/ thonisse ghewesen sijnde ende op heden dwelck den yersten dach/ was vanden vryen jairghedinghe niet en thoende soe es vo(n)niskijke(n)/ ghewijst soe wair de voirs(creven) jan everaerts ten opstane smeyers/ en(de) scepen(en) niet en thoende dat dan de voirs(creven) jan van thienen/ der aenspraken onghehouden zoude zijn cor(am) witte roelofs nausnide(re)/ zande colonia januarii xiii ip(s)o die m(ar)t(is)