Het sijn come(n) in rechte voir meye(r) ende scepen(en) van loven(e) inde banck/ ald(aer) jan vanden berghe als man ende momboir marien van troenbeke/ sijnd(er) huysvrouwen in deen zijde ende henrick witteman na(tur)lick met/ katline(n) e(n)nekens sijnre huysvrouwen in dande(r) alse vanden vliegen(de) erve/ ende and(er) haeflijken goeden die bleven souden moghen sijn nae de doot/ barbelen wijlen vander lynden op peet(er)ken baers zone peet(er)s wijlen/ baers zoens der voirs(creven) berbelen die de selve wijlen peet(er) barbelens/ zone hadde van katlinen e(n)nekens voirs(creven) doen sine(n) wijve Aldair de/ voirs(creven) jan vanden berghe dede segghen dat wae(re)n drie ghesuste(re)n/ deene gheheeten lijsbeth dande(r) barbele ende de derde m(ar)griete dochte(re)n/ van wettighen bedde jans wijlen van troenbeke ende dat de voirs(creven) lijsbeth/ eene vanden drie ghesuste(re)n voirs(creven) eene(n) docht(er) hadde van h(er) arnde wijlen/ vander lynden prieste(r) gheheeten barbele ende dat die selve barbele h(er)/ arnts docht(er) ghetrouwt hadde eene(n) gheheete(n) jan baers dair af sij/ twee wettighe kinde(re) hadde deen gheheeten peet(er) ende dande(r) katline/ Ende dat jan baers de vader aflivich werdt voir barbelen sine(n) wijve/ ende sijn kinde(re) voirs(creven) Segghen(de) voort dat de voirs(creven) peet(er) de zone ghetrout/ hadde eene gheheeten katline ennekens die nu wijf es henricx wittema(n)s/ na(tur)lex voirs(creven) Ende dat de selve peet(er) baers [en(de)] katline sijn zust(er) voir barbelen/ huer(er) moeder te weten(e) katline zonder ghebuerte ende de voirs(creven) peet(er) aflivich/ wordden acht(er) hem bevrucht laten(de) katline(n) e(n)nekens sijnre huysvrouwen voirs(creven)/ welke katline e(n)nekens nae de doot van peet(ere)n hue(re)n man ter werelt baerde/ eene(n) wettighen zone die peet(er) gheheeten werdt ende dat de selve peet(er)/ de jonghe alsoe nae gheboren uut den voirs(creven) goeden als uut sine(n) p(ro)pren goeden/ ghestorve(n) es zonder wettighe ghebuerte onder sijn jairen ende onghehouwet/ Ende alsoe wae(re)n die vlieghent erve ende haeflijke goede die barbele wijlen/ vander lynden besadt ende acht(er) hair bleven verstorven ende verschene(n) op den/ voirs(creven) peet(ere)n baers den jonghen Segghende voort dat berbele van troenbeke/ eene vanden voirs(creven) drie ghesuste(re)n eene wettighe docht(er) hadde gheheeten/ marie die jan vanden berghe ghetrouwt heeft Ende soe es de voirs(creven) marie/ jans vanden berghe wijff eene vanden naesten levenden des voirs(creven) peet(er)s/ baers den jonghen van weghen der voirs(creven) barbelen sijnre oudermoeder dair/ af die goede dair questie om es come(n) sijn Bieden(de) die pointen te/ thonen(e) meynen(de) dair o(m)me dat hem die voirs(creven) goede sijn kinsge/ deelte schuldich wae(re) te volgen(e) dair op de voirs(creven) henrick witteman dede
//
segghen al waert soe dat e(n)nighe vliegen(de) erve oft haeflijke goede/ nae de doot van barbelen ghebleven wae(re)n opden voirs(creven) peete(re)n den/ jonghen Soe was de selve peet(er) van dien goeden recht hee(r) ende dair/ uut ghestorven als uut sine(n) p(ro)pren goeden soe de wederp(ar)tije selve kint/ ende inden brode sijnre moeder sijnde want de selve peet(er) ghestorve(n)/ es soe sijn die goede bij doode van hem schuldich te blive(n) sijnre/ moeder katline(n) ennekens voirs(creven) oft ten minsten wae(re)n die goede/ schuldich te comen(e) op den naesten leven(de) van des selfs peet(er)s jonghe(n)/ zijden Ende soe es voort wair dat de voirs(creven) jan baers oud(er)vader/ des voirs(creven) peet(er)s des jonghen hadde eene wettighe zust(er) gheheete(n)/ margriete en(de) dat die m(ar)griete acht(er)ghelaten heeft eene wettighe docht(er)/ gheheeten m(ar)griete voets ende dat die selve m(ar)griete voets es die/ naeste erfghename van pete(re)n wijlen baers des jonghen de welke/ m(ar)griete met arnde van bijlant hue(re)n wettighen man voir scepen(en)/ van loven(e) huer recht ende actie vanden voirs(creven) goeden der voirscr(even)/ katlinen ennekens ov(er)ghedraghen ende ghetransporteert heeft Seggen(de)/ voort dat de voirs(creven) m(ar)griete voets recht erfghename es van peete(re)n/ den jonghe(n) voirs(creven) ende al van wettighen bedde in beyden zijden Te/ weten vand(er) zijden/m(ar)griete(n) van huer(er) ghebuerte(n) en(de) vand(er) zijden/ peet(er)s des jonghen voirs(creven) van janne wijlen baers sine(n) oud(er)vader/ tot sijnre ghebuerten mair die ghebuerte die jan vanden berghe mach/ segghen van wettighen bedde te zijne mach waer sijn vand(er) eender/ zijden te weten(e) van lijsbetten van troenbeke sijns wijffs voirts(creven) tott(er) gebuerte(n)/ toe van marien huer(er) docht(er) mair en can niet van wettighen bedde ghesijn/ vander zijden barbelen vand(er) lynden want zij na(tur)lijke docht(er) was h(er) arnts/ wijlen vander lynden Soe dat ten uut(er)sten beyde p(ar)tijen tot hue(re)n thonisse/ ghewesen ende thonisse in beyden zijden ghehoirt sijnde vonnislijken ghewijst/ es dat jan vanden berghe als momboir sijns wijfs met sijnd(er) aenspraken/ aende voirs(creven) goede v(er)doolt es cor(am) g(odefrido) roelofs l(udovico) roelofs meld(er)t berthem vos/ most maii ix