Nae dien dat jan van wynghe als man ende momboir katline(n) vanden/ velde sijns wijfs mits zeke(r) scepen(en) brieve die hij spreken(e) hadde op lod(ewijck)/ van blanckelair gheheeten vette(re) ende willem(me) van haesdonck voirsprake/ ende janne leemans scoemake(r) van eene(n) peet(er) lijft(ochten) ten live vanden/ selve(n) janne van wynghe ende katline(n) sijns swijfs hadde doen ind(er)/ vroenten setten den selve(n) willem(me) van haesdonck ende janne leemans/ voir bewijsenisse der selv(er) lijftochte(n) ende de selve jan van wynghe/ t(er) eenre ende de voirs(creven) lodewijck t(er) ande(r) zijden dair af come(n) sijn/ voir den raide vander stad Ald(aer) de voirs(creven) lodewijck seyde dat hij dese/ lijft(ocht) van eene(n) peet(er) der voirs(creven) katline(n) met caucie(n) van borchtochte(n)/ v(er)borcht heeft uut bedwanghe vand(er) senten(cie) bij meest(er) janne van/ papenhove(n) ten tijde sijnre rectorie(n) ghegeve(n) ende ghepronu(n)cieert als/ voir der bet(er)nissen vand(er) diffloracie(n) vander voirs(creven) katline(n) en(de) de/ selve meest(er) jan als rector ghec(er)tificeert heeft dat sijn meyni(n)ghe/ vand(er) caucien vand(er) lijft(ochten) te doene es te verstane caucie van/ borchtochten oft caucie met panden dair af de voirs(creven) meest(er) lod(ewijck)/ koese soude hebben ende men oic bevindt inden regist(er) vander stad/ onder den p(ro)thocolle vander voirs(creven) lijftochten dat de selve lijft(ocht) compt/ spruyten(de) uut(er) diffloracien vand(er) voirs(creven) katline(n) ende uut(er) senten(cie) vand(en)/ rectoir d(air) af gegeve(n) Soe es ghet(er)mineert dat de voirs(creven) lodewijck/ van blanckelair ghestaen sal mett(er) caucie(n) van borchtochte(n) die hij gedaen/ heeft Behoudelick dien oft sijn borghen in rijckdo(m)me ghemi(n)dert/ wae(re)n oft oic aflivich wordden dat hij dat met ghelijken borghen sal/ verrichten ende verseke(re)n cor(am) ouder(ogghe) burg(imagistr)[o] et aliis de pleno consilio/ m(ar)tii iiii[ta]