Wij jan van oppend(orp) en(de) joes absoloens zone wijlen joes scep(enen) te lov(en)/ doen cond eene(n) yegelijken dat nae dien dat jan van thiene(n) cled(er)mak(er)/ in deen zijde ende stas roelofs in dand(er) hen vanden stoete ende/ tebat die tussche(n) hen opv(er)staen en(de) v(er)resen was alse van huer(er) beyd(er)/ erve ende huysen deen bijden ande(re)n gelege(n) inden corttenbruel tussche(n)/ de goede andries den nausnide(re) in deen zijde ende de goede henr(ix)/ van lynthe(re) in dande(re) zijde hen behoirlijke v(er)bonden en(de) gesubmitteert/ hadden voir scep(enen) van loven(e) in willem(me) de beer matheeuse de/ laeyns ende jacoppe vand(er) vesten der stad meeste(re)n en(de) gesworen(en)/ werckliede(n) o(m)me bij hen hue(re)n erve(n) en(de) naecomelinge(n) tewige(n) dage(n)/ vast en(de) gestentich en(de) onv(er)brekelijke tond(er)houden(e) te wordden(e) tgene/ des bijden voirs(creven) gesworen(en) werckliede(n) uutgesproken sal wordde(n) Soe/ sij(n) de selve willem matheeus en(de) jacop als segghers der voirs(creven) p(ar)tije(n) come(n)/[voir scepen(en) van loven(e)] ende hebben yerst p(ar)tijen [in] des elck voir hen allige(re)n woude gehoirt/ en(de) volcome(n) informacie and(er)ssins genome(n) huer uutsprake gedaen/ gelijck h(ier) nae volght Inden yersten es huer uutsprake dat/tu dnuwe huys des voirs(creven) jans van thiene(n) voir t(er) straten in alsulke(n)/ state alst aldair gety(m)mert en(de) gemetst steet sal blive(n) staen(de) niet/ wed(er)staen(de) dien dat de vors(creven) stas heeft moghe(n) meyne(n) oft in
//
in toecomen(de) tijden soude mogen meyne(n) oft seggen dat/ hen tselve huys ende sine(n) eene(n) te nae gety(m)mert wae(r) en(de)/ seggen voort gelij gelieft den voirs(creven) stasse op sijn plaetsse/ aen de strate ald(aer) al vast [nae] den huyse des voirs(creven) jans een huys/ dair neven te setten en(de) te doen ty(m)meren(e) dat hij dat sal/ mogen doen ende met dyer ty(m)meringe(n) en(de) and(er)ssins met/ ande(re)n wercke daert hem behoeve(n) sal boven inde(n) muer/ en(de) want vanden vors(creven) huyse des vors(creven) jans van vore/ t(er) straten acht(er)weerts inder lingden van xix voeten/ oft d(aer) omtrent ende die ty(m)meringe metten ande(re)n sine(n)/ behoeften vesten aen en(de) inde mueren en(de) gevelwant/ voirs(creven) het sij opde platen balken stijlen wormenen rijboeme(n)/ ende keep(er)s zond(er) wedersegghen des voirs(creven) jans van thiene(n)/ Behoud(elijck) soe wes de voirs(creven) stas mits dien aen thuys/ oft aen de want oft muer des voirs(creven) jans brect dat hij/ dat wed(er)o(m)me tot sijnre cost inden yersten state sal doen maken/ en(de) rep(ar)eere(n) ende die ty(m)meringhe gemaect sijnde sal de vors(creven)/ want ende muer den vors(creven) ja(n)ne en(de) stasse ende hue(re)n goede(n)/ van dan voertaen van onder tot bove(n) te gelijke toebehore(n)/ en(de) te(n) gelijken coste van hen beyden teewigen daghe(n) in goede(n)/ state en(de) wesen(e) gehouden wordde(n) It(em) es voort der voirs(creven) meest(er)s/ uutsprake dat de voirs(creven) stas acht(er) op sine(n) hoff op sijn zijde op dat/ hem ghelieft sal moghen doen maken ende setten een huys Beghynnen(de)/ van opden acht(er)sten hoecke vanden stroelen huyse des voirs(creven) jans van/ thiene(n) ende alsoe lijnrecht uutgaen(de) tott(er) leygracht ald(aer) ende van/ sijne(n) huyse tot ewighen daghen hebben en(de) behouden sine(n) wat(er)loepe binnen/ den pale ald(aer) staen(de) op ende ov(er) de goede des voirs(creven) jans van thiene(n) ind(er)/ breydden van sesse duymen zonder wedersegghen desselfs jans van/ thiene(n) oft van sine(n) naecomlinghe(n) in e(n)nig(er) manie(re)n Ende d(aer) vore sal/ de voirs(creven) stas voir hem sine(n) erve(n) ende naecomelingen uut sine(n) goiden voirs(creven)/ gheven ende betalen den voirs(creven) ja(n)ne van thiene(n) en(de) sijne(n) naecomelinge(n)
//
viere plecken brabants ghelts erf(lijck) ter quijtinghen den pe(n)ninck/ met xviii[e(n)] dair af dyerste betalinghe sijn sal van opden yerste(n)/ dach van aprille naestcomen(de) ov(er) een jair ende soe voert van jaire te/ jaire vervolgen(de) It(em) es voort der selv(er) meest(er)s uutsprake dat de/ voirs(creven) jan van thiene(n) op dat hem ghelieft op sijn zijde van sijne(n)/ hove beghynnen(de) van opden hoecke van sine(n) stroelen huyse voirs(creven)/ ende soe nederweert gaen(de) inder lingden van sestien voeten sal moge(n)/ doen maken ende setten een huys ende de ty(m)merynghe van dien huyse/ hechten ende vesten tot sine(n) gherieve in ende opde want en(de) ty(m)meringhe/ vanden voirs(creven) huyse dat de voirs(creven) stas ald(aer) sal doen maken zond(er) wedersegge(n)/ des voirs(creven) stas Behoud(elijck) oft de voirs(creven) jan van thiene(n) aen de voirg(eruerde)/i want oft aen de ty(m)merynghe vander selv(er) yet brake dat hij dat/ weder o(m)me op sijne(n) scost sal doen h(er)maken in sulken state soe hij/ dat bevinden sal En(de) den voirg(enoemde) janne tvoirs(creven) huys alsoe ghemaect/ ende gesedt hebben(de) sal die want inder lingden vanden selven/ xvi voete(n) den voirg(enoemde) ja(n)ne van thiene(n) ende stasse ende huer(er) beyder/ huysen te gelijke toebehoren ende inder selv(er) lingden van xvi voeten te/ ghelijken coste van hen beyden in goeden state ende wesen(de) ghehouden/ wordden erflijck in naecomen(de) tijden martii xxviii