Allen den ghene(n) (et)c(etera) burg(er)meeste(re)n (et)c(etera) saluyt met kennissen d(er)/ wairheit doen te weten(e) dat opden dach van heden voir ons come(n) es in p(ro)pe(re)n/ p(er)soene katline m(er)chant weduwe jans wilen potent onse ingeseten(en) poirt(ere)sse/ ende heeft in ald(er) best(er) forme(n) ende manie(re)n soe dat nae recht best mach/ diene(n) ende behoe(re)n met hue(re)n vryen eygene(n) wille gheconstitueert gesedt/ ende volcome(n) macht ende auctoryteit ghegeve(n) woute(re)n potent brueder/ des voirs(creven) jans o(m)me alle huer goede chijsen renten pachte(n) lijfrenten jairgulde(n)/ ende schulde(n) als de de voirs(creven) katline heeft oft hebben mach te loven(e) te velthe(m)/ te meerbeke te libbeke ende elswair al brabant doe(n) ende men huer schuld(ich)/ es oft naemaels wesen sal te rege(re)n te mane(n) te eysschen op te bue(re)n ende/ tontfanghe(n) aen wat goeden oft p(er)soene(n) oft te wat steden dat dat sijn mach/ dair voe(r) te panden te daghene te beleyden(e) ende rastemente(n) te doen leggen(e)/ nae gewoente ende costume vand(en) plaetssen dair dat behoe(re)n sal oft behoeve(n)/ soude moghen ende op dats noot ghebuerde voir alle rechte(re)n gheestelick/ ende weerlick met rechte te vervolgen te verantw(er)den te bescudden ende te/ bedingen die te wynnen(e) ende te verliesen(e) composicie ende my(n)lijke yffeni(n)ge/ dair af te maken(e) den sculd(er)s van des hij ontfanghen sal quijt te schelden(e)/ en(de) quitan(cie) te gheven(e) Ende de omberuerlijke goede der voirs(creven) ka(tli)[ne(n)] eene(n) t(er)mijn/ van drie jaire(n) uut te gheve(n) te v(er)pachten en(de) te v(er)hue(re)n Ende voertaen/ g(e)n(er)alick en(de) sp(eci)alick allet ghene dair inne te doene ende te vorderen(e) dat/ de voirs(creven) katline selve soude moghe(n) doen waert dat sij tegew(er)dich en(de) voir/ oeghen wa(r)e Ghelove voort de selve ka(tli)[ne] in goeden trouwen voir goet/ vast ghestentich ende van weerden te houden(e) tot ewighen daghe(n) soe wes bijd(en)/ voirs(creven) woute(re)n potent inden zaken voirs(creven) ende in des dair aen cleeft ghedaen/ en(de) ghevord(er)t sal wordde(n) in e(n)nig(er) manie(re)n zond(er) arghelist due(re)nde (et)c(etera)/ cor(am) goess(uin)[o] tybe burg(imagistr)[o] et vos wynghe scab(inis) sept(embris) v[ta]