Nae volghen(de) den vonnissen onlanx te weten(e) m(ar)cii xxii/ lestleden bij scepen(en) van loven(e) ghewesen tusschen pete(re)n ty(m)m(er)man/ in deen zijde ende janne ende pauwelse van beerhem in/ dande(re) voir tvoldoen van welken vo(n)nisse ende coste(n) van rechte/ inden ghedinghe bijden voirs(creven) pete(re)n ghedaen de selve pet(er) in hachte(n)/ hadde doen houden den voirs(creven) janne ende pauwelse Soe sijn op/ heden comen voir meye(r) en(de) scepen(en) van loven(e) de voirs(creven) jan en(de) pauwels/ t(er) eenre ende pet(er) ty(m)merman t(er) ande(re) ald(air) de selve jan en(de) pauwels p(rese)nteerde(n)/ gheluften te doene o(m)me te comene t(er) plaetssen dair de mesdaet gheschiet es/ ende hen ald(air) met rechte ontw(er)cken van tghene des int voirgaen(de) vo(n)nisse/ beg(re)pen es meynen(de) dair mede tvo(n)nisse te voldoene ende met rechte dair/ mede te ghestane ende dat de costen alh(ier) ghedaen berusten souden totter/ tijt toe de sake ter voirs(creven) plaetssen dair die mesdaet gheschiet es/ gheeyndt soude [sijn] Dair op de voirs(creven) peet(er) antw(er)de segghen(de) dat sij/ o(m)me de ghewysde vo(n)nissen der scepen(en) van loven(e) huer volcome(n) execucie/ te hebben(e) schuldich sullen sijn caucie ende borchtochte(n) te stellen o(m)me ter/ voirg(enoemde) plaetssen te rechte te comen(e) ende ten ynde uut rechts te/ pleghen(e) ghemerct dat sij hen voir dese zake vluchten ghehoude(n)/ hebben vander plaetssen der misdaet en(de) oick uut(er) a(m)ma(n)nyen van/ bruesselle ghelijck inden p(ro)cesse vanden yersten vo(n)nissen ghebleken/ mach hebben Ende als vanden costen seeght hij dat die questie/ die voir scepen(en) van loven(e) ghehanghen heeft es gheweest van dien/ te weten(e) oft jan en(de) pauwels bet(er)nisse doen souden nae den rechte van/ des(er) stad oft nae der natue(re)n van rechte ter plaetssen vander misdaet/ ende want dan tvo(n)nisse ghewesen heeft dat sij bete(re)n sullen nae der/ natue(re)n van rechte vander plaetssen teghen dwelke nochtan de voirs(creven)/ jan en(de) pauwel(s) hen p(ar)tije ghemaect hebben soe meynt hij dat sij schuldich/ sijn de costen van rechte op te legghen(e) Soe es bijden h(ere)n scepen(en) van loven(e)/ ghewijst dat de voirs(creven) jan ende pauwels in hachten sullen blive(n) t(er) tijt toe/ sij redelijke borchtochte ghestelt sullen hebben om ter voirs(creven) plaetssen/ vander misdaet te rechte te comen(e) ende rechts te pleghen(e) totten ynde/ uut ende heeft yemant enich ghebreck van coste dat hij dat volghe/ nae recht cor(am) lyemi(n)ghen absoloens milit(e) blanck(aer)t absol(oens) m(er)sels hoeve(n)/ lynden marcii xxiiii