Item na dien dat arnd [wouter] de custe(re) vetwarier die ten selven rechte ov(er)hebben(de)/ zeke(re) scepen(en) brieve van loeven spreken(de) van eenen mudde corens der maten/ van loeven lijftochten ten live merten daems hoedemakers geleidt es/ tot den goeden lodewijcks van langbroeck geheten mercks voerspreke/ comen es in rechte voe(r) meye(r) en(de) scepen(en) van loeven in deen zijde en(de) machtelt/ va(n) bruysten geheten van belanden(en) mairte des vors(creven) lodewijcks die/ van te voren insgelijcx geleidt es tot den goeden desselfs lod(ewijcks) in/ dande(re) heur pijnen(de) de goede des voirs(creven) lodewijcks met heuren voerbe/ leide tegen de schult des voirs(creven) wout(er)s te defende(re)n ende de/ saken van dien om zek(ere)n reden(en) wille die d(air) inne vielen bracht was/ voe(r) den raide vander stad So es ald(air) get(er)mineert dat de voirs(creven)/ machtelt de goede des vors(creven) lodewijcx met heuren beleide voer/ heure deughdelike gebreke die zij sculdich zal zijn met heurer/ eed te verifice(re)n behoirlic exeque(re)n sall Act(um) in pleno (con)silio/ junii xviii