Allen den ghenen die dese l(ette)ren sullen sien oft horen lesen/ burgermeeste(re)n scepen(en) en(de) raide der stat van loven(e) saluyt/ doen cont en(de) te weten [dat opden] datum van desen voir ons come(n)/ en(de) gestaen is her peter dillen priester capellain der/ kercken van sinte peters te loven(e) tot desen renu(n)cie(re)nde/ de p(ri)viliegien vand(er) univ(er)siteit van lov(en) en(de) alle ande(re)/ En(de) heeft geconstitueert gesedt volcomen macht p(ro)curacie/ en(de) auctoriteit gegheven goessen(e) goessens [en(de)] pete(re)n goessens/ sijnen brued(ere) oft den eenen van hen alle en(de) yegewelke/ sijn saken questien en(de) gescillen die hij te doen heeft/ inden lande van brabant oft elswair oft namaels te doen/ oft uutstaende sal hebben teghen wat p(er)sonen dat dat zij/ voir alle gerichten gheestelic en(de) weerlijc alle zijn/ goede chijsen renten erfpachten en(de) sculden te rege(re)n [te bedinge(n) te wynnen te v(er)liesen en(de) composicie d(air) af te maken] te/ manen teysschen opteboren en(de) tontfanghen dair voir te/ panden te daghen rastementen te doen legghen die/ met rechte uut texeque(re)n die met jairscharen uut/ te gheven den sculd(er)s te quite(re)n en(de) volcome(n) quitancie/ te gheven te replice(re)n te duplice(re)n also wale int/ principael als int accessoir getuygen ofs behoeff te/ leiden d(er) wed(er)p(ar)tien getuygen te sien zweren die te/ batteren also dicwille en(de) menichwerven als des behoeve(n)
//
sal alle guedinge(n) en(de) vesticheiden van erfgoeden oft renten/ die de voirs(creven) her peter vercrighen sal inden name/ en(de) tot behoef des selfs he(re)n peters tontfanghen/ na recht voir alle gerichten En(de) vortaen generalic/ en(de) specialijc allet ghene in des voirs(creven) is te doene ende/ te worde(re)n des de vors(creven) her peter selve in p(er)sone/ soude mogen doen telker tijt oft hij tegenwordich en(de)/ voir oghen wa(r)e Geloven(de) de voirs(creven) her pet(er) opde/ verbintenesse van allen sijnen goeden beruerlic ende/ omberuerlic tegenwordich en(de) toecomen(de) goet vast gestentich/ en(de) van weerden te houden allet ghene des bijden/ voirs(creven) procur(eur)s oft den eenen van hen in des vors(creven) is/ gedaen en(de) gevordert sal worden in eniger manie(re)n/ Behoudelic dat de vors(creven) procur(eur)s gehouden en(de) elc/ van hen besunder gehouden sullen sijn van hue(re)n bewinde/ ontfanghe en(de) uutgheven den vors(creven) he(re)n pete(re)n tsijnd(er)/ manessen goede rekeninge bewijs en(de) betalinge te doen/ cor(am) tybe burg(imagistro) hoeve(n) lynden ja(nua)[rii] xx