Het sijn comen in rechte inde banc voir meyer en(de) scepen(en) van loven(e) jan/ van lymelet die ov(er)mids vonnisse van scepen(en) brieven van loven(e) beleit is tot/ den goeden lodewijx van gipplen hee(r) van blamont in deen zijde en(de)/ raes vander rivie(re)n he(re) van graven die ov(er)mids vonnisse van scep(enen) br(ieven)/ van loven(e) beleit is tot den goeden geheten van eernaige met den/ woeni(n)gen huysen hoven wynne(n)den lande(n) beemde(n) eeuselen bossche/ tsijse rente(n) en(de) met allen hue(re)n toebehoirte(n) vrouwe lijsb(eth) van/ glymez wedewe h(er) gords wilen van gipplen ridders vader en(de)/ moed(er) des voirs(creven) lod(ewijx) in dand(er) zijde alse vande(n) voirs(creven) goede(n) van/ ernage met hue(re)n toebehoirte(n) daer de voirs(creven) jan van lymelet sijn/ beleit dede lesen inden rechte yesch en(de) versocht aen den meyer/ datme(n) houden soude vanden selven goede(n) in sijnen beleide want sijn/ beleit ouder ware van des voirs(creven) raes beleit en(de) hadde de selve/ raes of yemant anders hem d(aer) af yet aen te spreken dat hij dade/ en(de) met den rechte Daer op dat de voirs(creven) raes met sijnen/ gelev(er)den voirspreke verantw(er)de en(de) dede seggen dat hij met seke(re)n/ scep(enen) brieven van bruessel gegoet en(de) geerft wa(r)e voir a(m)man en(de)/ scepen(en) van bruessel die hij ald(aer) thoende en(de) dede lesen inde voirs(creven)/ goede van ernage uut machte van seke(re)n scepen(en) br(ieven) van bruess(el)/ bekent vander voirs(creven) vrouwe lijsbette(n) Seggende voert dat de selve/ goede der voirs(creven) vrouwe lijsbette(n) bleven en(de) aenverstorven wa(r)en in/ hue(re)n wedewenstoele van vrouwe [vacat] van corbais hue(r) witter/ vrouwen en(de) dat sij die goede oeyt sijdert beseten en(de) gehouden/ hadde alse hue(r) p(ro)pre goede en(de) dat dat waer was dat boet/ de voirs(creven) raes te thoene(n) en(de) met den mynsten d(aer) hij mede lijden/ mocht inden rechte Seyde oec dat de voirs(creven) vrouwe lijsb(eth) vande(n)/ selven goeden hier voirmaels in rechte gestaen hadde jeg(en) de/ wettige momboren des voirs(creven) lodewijx huers soens want de selve/ lodewijc doen t(er) tijt [noch] onder sijn dage was voir den rentmeest(er)/ en(de) ma(n)ne van genepien daer af dat soe verre gedingt was met/ den rechte dat de selve ma(n)nen gewijst hadden voir een vo(n)nisse/ dat der voirs(creven) vrouwe lijsb(eth) de voirs(creven) goede volgen souden en(de) dies/ waer hij wel getroest tot den ma(n)nen of tot alsulken brieven/ als de selve ma(n)ne d(aer) af geg(even) en(de) bezegelt hadden des seide hij
//
dat de voirs(creven) goede eygen goede wa(r)en hoe wale d(aer) inne tsijs goede/ liggen mochten daer hij hem gheens rechts toe en vermate maer/ hoepte ende meynde voir al nae dat hij inde voirs(creven) goede gegoet/ wa(r)e voir a(m)man en(de) scepen(en) van bruessel dat hem die en(de) sijnre/ guedingen volgen selen souden oft dat hij d(aer) af sijn recht soude/ mogen volgen t(er) plaetsen d(aer) die gued(inge) gesciet wae(r)/ Hier op verantw(er)de de voirs(creven) jan van lymelet met sijnen/ gelev(er)den voirspreke hopende dat de voirs(creven) raes ne(m)mermeer/ thoenen en soude des hij hem vermete(n) hadde ende dancte gode/ en(de) sijnen goeden rechte dat de voirs(creven) raes d(er) selve gekent ende/ gelijdt hadde dat de voirs(creven) goede eygen goede wa(r)en en(de) mids dien/ soe en wert van gheenre w(er)den al hedden de ma(n)nen van ge/ nepien d(aer) op e(n)nige vonnissen gewijst Seyde voert dat een/ groot ongenade wa(r)e dat de voirs(creven) raes met alsulken(en) brieve(n)/ van guedinge(n) de voirs(creven) goede te hemw(er)t trecken soude oft die volgen/ t(er) plaetsen d(aer)se gemaect wae(re)n want de brieve daer hij uut/ gegoedt wae(r) en spreken mer van eenre schout van ii[c] crone(n)/ dwelc een cleyn so(m)me we(re) nae datt(er) goede vele is en(de) soe/ wa(r)e oec te bruessel een recht hoe wale dats raes niet/ cleer op en dede soe wie lanxte leefde van ma(n)ne en(de) wijf/ dat die de eygen goede alleen te hemw(er)t trect sijnen wille/ d(aer) mede te doen en(de) also soude lodewijc die een erfman is/ vanden voirs(creven) goede(n) en(de) hij die d(aer) toe met scepen(en) br(ieven) van loven(e)/ come(n) is met allen onterft ende bedrogen bliven dat hij/ hoept nae inhoude(n) van sijne(n) scepen(en) brieve(n) van beleide die/ ouder sijn dan des voirs(creven) raes brieve ne(m)mermeer sijn en sal/ men en sallen houden inden selven sijnen brieven Dede voert/ seggen dat dese goede voirs(creven) vrouwe lijsb(eth) lodewijx moeder/ bracht en(de) hue(r) gegeve(n) waren vander voirs(creven) vrouwen van corbais/ hue(r) wittervrouwen in huwelike vorw(er)den met den voirs(creven) wilen/ h(ere)n goerde van gipplen hue(re)n ma(n)ne nae d(er) selv(er) vrouwen van/ corbais doet te volgen en(de) also we(re)n sij hue(r) aencomen en(de) v(er)storven
//
Ende seide voert dat de voirs(creven) h(er) gord ende vrouwe lijsbet hadde(n)/ eenen wettigen soen en(de) dat wa(r)e lodewijc die hem de brieve/ bekent hadde ende dat dat waer was dat boot hij oec te/ thoene(n) en(de) met den mynsten d(aer) hij mede lijden mocht/ inden rechte hoepte en(de) seide want de selve goede des voirs(creven)/ lodewijx vader en(de) moeder in huweliker vorw(er)den gegeven/ waren dat lod(ewijc) d(aer) af een erfman is en(de) dat mids dien/ hem en(de) sijnen beleide nae der voirs(creven) vrouwe lijsbette(n) doot/ die sculdich sijn te volgen Dede oec seggen dat de voirscr(even)/ goede eygen goede wa(r)en en(de) dat die hoefden en(de) leghen ond(er)/ den abdt van gemblourz ende alsmen d(aer) af recht vord(er)de/ dat gesciede voir den meyer of rentmeest(er) en(de) eyghen/ genoeten des voirs(creven) abds van gemblourz en(de) die stonden tot/ hue(re)n wijsdo(m)me en(de) als sijs da(n)der saken niet wijs en/ we(re)n dat sij dan ten hoede toghen aen de scep(enen) van ludic/ en(de) dat dat waer was dat boden sij te thoenen en(de) met/ den mynsten (et)c(etera) hoopte en(de) seide nae dat de goede ald(aer)/

hoofden ende te rechte behouden soe en soudt van gheenre/

weerden sijn Seyde voert dat dlantrecht ald(aer) inne hadde/ soe wa(n)neer man of wijf aflivich worden en(de) den stoel/ gesceiden is dat dan de ghene die lanxte leeft de goede/ besidt als een tochter en(de) gheen macht en heeft lang(er)/ beco(m)me(re)n dan sijn leefdage lang en(de) als sij wettich oer/ acht(er) laten dat dat t(er) stont als deen aflivich is worden/ gericht is in terdel vanden goede(n) en(de) dat dat waer is dat/ boet de voirs(creven) jan oec te thoene(n) en(de) met den mynsten (et)c(etera)/ Hoopte en(de) zeyde nae dat de goede ald(aer) hoofden en(de) te recht/ behouden soe en soudt van gheenre weerden sijn al/ hedden de ma(n)ne van genepien d(aer) af e(n)nige vo(n)nisse(n) gewijst/ Hier op maende de meyer van loven(e) de scepen(en) van loven(e)/ wes hier af recht sijn soude die wijsden voir een vo(n)nisse/ want hen beyde p(ar)tien thoenis vermeten hadde(n) dat sij/ dat begheerden te aenhoe(re)n ende dae(re)n teynden recht
//
Ten daghe van thoenisse thoende de voirs(creven) raes ende dede lesen/ inden rechte eenen brief bezegelt met der ma(n)nen segel van/ genepien welken brief mencie maecte dat de voirscr(even)/ vrouwe lijsb(et) vande(n) voirs(creven) goeden jegen de momboren des voirs(creven)/ lodewijx voir hen in rechte gestaen hadden en(de) dat de/ selve goede der selver vrouwe lijsbette(n) aengewijst waren/ Voert thoende hij met goeden knapen dat de voirscr(even)/ vrouwe lijsbet de voirs(creven) goede beseten hadde als hue(r) goede/ en(de) d(aer) af possessie gehadt ov(er) xx of ov(er) xxv jair ende/ dage en(de) hen voirt gemaent op hue(re)n eet oft sij hue(r)/ niet aenverstorven en waren in hue(re)n wedewenstoele vand(er)/ vrouwe(n) van corbais hue(r) wittevrouwe(n) antw(er)den sij dat sij/ d(aer) af niet en wisten ende dede de voirs(creven) raes oec lesen/ inden rechte sijn scepen(en) brieve van bruess(el) d(aer) hij mede inde/ voirs(creven) goede gegoet was P(rese)nteerde voert soe waer de voirscr(even)/ jan of lodewijc hem sijn pe(n)nynge opleggen woude die hij d(aer)/ voe(r) gegeve(n) hadde hij woude hen de goede laten volgen Daer/ op de voirs(creven) jan van lymelet repliceerde en(de) seide dat de/ voirs(creven) raes sijns vermeets niet volcomen en ware want hij/ hem vermeten hadde te thoene(n) dat de voirs(creven) goede der voirs(creven)/ vrouwe lijsb(etten) in hue(re)n wedewen stoele verstorve(n) we(re)n dwelc/ hij nerghens gethoent en hadde en(de) dat wa(r)e oec tprinci/ paelste en(de) dmeeste point vander saken H(ier) nae thoende de/ voirs(creven) jan van lymelet inden yersten met ii goeden ma(n)nen/ die droegen op hue(re)n eet dat hue(r) beste conde wa(r)e dat de/ voirs(creven) vrouwe lijsbet dese voirs(creven) goede van eernage bracht en(de)/ hue(r) gegeve(n) wa(r)en te huwelic vander vrouwen van corbais hue(r)/ wittevrouwe(n) met den voirs(creven) h(e)r(e)n goerde en(de) also hadde sij die/ goede besete(n) Voert kende de voirs(creven) raes inde(n) rechte dat de/ voirs(creven) lod(ewijck) van gipplen wa(r)e wettich soen h(er) gords wilen van/ gipplen en(de) vrouwe lijsbette(n) voirg(enoemt) Voert thoende hij met/ iiii goeden knapen die eygen genoete(n) wa(r)e gelijc sij droegen
//
op hue(re)n eet des abds van gemblourz voirg(enoemt) dat dese goede van/ ernage d(aer) tgedinge om is lagen onder den abt van gemblourz/ en(de) alsmen van dien goeden dingde dat dat voir des selfs/ abds eigen genoete(n) gesciede en(de) dat sij d(aer) af wisers wa(r)en en(de)/ als sijs niet wijs en we(re)n dat sij dan ten hoede toghen / aen de scepen(en) van nyvel ludick en(de) alse ald(aer) e(n)nich man/ of wijf aflivich worde en(de) den stoel schiede dat de ghene/ die lanxte leefde die goede beseete als een tochter ende/ en hadde die goede alsdan niet lang(er) macht te beco(m)me(re)n/ dan sijn leefdage En(de) alse de die ma(n)ne en(de) wijf wettige/ geboerte van hue(re)n live acht(er) lieten dat die gheboirte t(er) stont/ nae des eens doot in terdel van dien goede(n) gericht wa(r)e/ Voert droegen de selve p(er)sone op hue(re)n eet dat de/ voirs(creven) vrouwe lijsb(et) de voirs(creven) goede besete(n) hadde als een/ tocht(er)sse en(de) dat lod(ewijck) hue(r) soen d(aer) af wa(r)e gerecht ov(er) en(de)/ erfman Voert droegen iii goede knapen die scepen(en) wa(r)en te/ gemblourz dat so(m)mige van desen goede(n) ontrent xii boender/ tsijs goede we(re)n en(de) dat dabt van gemblouz d(aer) op tsijs hadde en(de)/ de selve goede h(ier) voirmails voir gebrec van sijnen tsijse uut/ gewonne(n) hadde en(de) dat lod(ewijck) van gipplen doen quam by(n)nen/ jairs en(de) quijtte die goede met coste en(de) met co(m)mer nae/ dier banc recht Voert droegen sij dat dier banc recht/ inne hadde alse also e(n)nige goede voir gebrec van tsijse uutge/ wonnen we(re)n dat derfgenamen die goede bynne(n) jaers met/ cost en(de) co(m)mer quijte(n) mach Daer nae maende/ de meyer de scepen(en) van lov(en) die wijsden voir een vo(n)nisse/ dat den voirs(creven) ja(n)ne van lymelet en(de) sijnen beleide terdel/ inde voirs(creven) goede van ernage also v(er)re sij eygen goede we(re)n/ volgen soude en(de) dat hij vande(n) ii ande(re)n derdendeele(n)/ te vroegh op wae(r) p(rese)nt(ibus) will(elm)o lomb(art) joh(anne) de borch(oven) nych(olao) k(er)smak(ere)/ dyionisio boys (et) andr(ee) de voshem scab(inis) lov(aniensibus) aug(usti) xix a(n)no/ xiiii[c] xxxiiii[to]