It(em) katlijne maselains weduwe jans wile(n) va(n)/ duysborch sone wile(n) arnts cu(m) tuto(r)e t(er) eenre/ ende lijsbeth van ravescote weduwe des voirs(creven)/ wilen arnts ende zwegher der voirs(creven) katlijne(n)
//
met zust(er) berbele(n) ende cecilien van duysborch gesuste(re)n/ wettige kinde(re)n der voirs(creven) lijsbetten van ravescote ende/ zwegeri(n)ne der voirs(creven) katlijnen maselains de selve/ cecilie emancipata met eene(n) vreemden mo(m)boe(r) huer/ hiertoe verleent ende met consente der zelv(er) huer(er)/ moeder in p(rese)ntia hebben gekint ende gelijdt dat/ zij met malcande(re)n veraccordeert ov(er)comen ende/ eens worden sijn der poenten condicien ende vorweerden/ hier nae verclaert die zij malcande(re)n pro se et/ suis successoribus geloeft hebben tonderhouden(e) te/ voldoene ende tacht(er)volgen(e) Ende inden yersten/ aengaen(de) den vive(n)vijftich stuv(er)s lijftochten die de/ voirs(creven) wilen jan van duysborch der voirs(creven) katlijne(n)/ man in zijne(n) leven(e) a(n)no lxxxvii martii l xxvi/ bekinde der voirs(creven) lijsbette(n) van ravescote zijnd(er) moed(er)/ dat die t(er) stont doot versmolten ende te nyeute/ sijn zulle(n) ende dat de selve jan wilen huer sone/ sijn voirs(creven) weduwe ende huer(er) beyder goede d(air)af ende/ van allen acht(er)stelle(n) van dien los quite vry en(de) ongehoude(n)/ sijn sulle(n) Dat voirts de voirs(creven) jan sijn weduwe ende/ hue(r) goede los vry ende quijt sijn zullen ende allessins/ ongehoude(n) nae de doot der voirs(creven) lijsbetten va(n) ravescote/ goet te doene uuyt te reycken oft te betalen de/ hootpe(n)ni(n)gen vanden vivenvijftich stuv(er)s erffelijck die opde(n)/ voirs(creven) xxvi dach marcii a(n)no lxxxvii de voirs(creven) wilen/ jan toech vanden lv stuv(er)s erffelijck die sijn moeder/ als tochtersse ende hij ende sijn zusters als erfliede hadde(n)/ op meest(er)s willems beers huys in sheylichgheets strate/ ende die de erfgenamen vanden selven wile(n) meeste(re)n/ willem(me) hen afqueten ende bevorweert ende alsdoen
//
geloeft wa(r)en bijden selven janne uuyt te reycken ende/ te betalene te voirde(r) want de voirs(creven) moeder des voirs(creven) wile(n)/ jans ende sijn suste(re)n bekint hebbe(n) ende bekynne(n) mits desen/ dat de voirs(creven) katlijne maselains die hootpe(n)ni(n)ge(n) alreede/ zonder de doot vand(en) voirs(creven) huers mans moeder te/ verwachte(n) in gereeden pe(n)ni(n)gen uutgereyct heeft/ huer dairaene alleene afgecort alsulken twintich pet(er)s/ als de voirs(creven) wile(n) jan johanne(n) van duysborch sijnd(er)/ zuster van svaders zijde(n) voir huer part ende deel/ vanden voirs(creven) lv pet(er)s ende van meer ande(re)n goeden/ dair zij meer inne gericht mocht sijn uutgereyct/ gegeven ende betaelt heeft Ter ande(r) zijden heeft/ de voirs(creven) katlijne gekint ende gelijdt dat zij van/ alle tgene dat huer van wile(n) des voirs(creven) huers/ mans wege(n) voirmaels toegecome(n) mach sijn ende/ dair zij enichssins soe van zijnen soe van huers/ selfs wege(n) inne gericht es oft soude moege(n) sijn/ nu oft in toecomen(de) tijden nae de doot huer(er) voirs(creven)/ zweg(er) het zij in have(n) vliegen(de) erve ende erve/ oft oic dat huer te huwelike geloeft mach sijn/ ende van allen ande(re)n toeseggen(en) eyssche(n) geluften/ peticien actien ende aenspraken die huer oft wile(n)/ hue(re)n man e(n)nichssins compete(re)n mochte(n) ten voirs(creven)/ huer(er) zweg(er) ende zwegeri(n)nen wert oft hue(re)n goede(n)/ nu oft in toecomen(de) tijden gehadt heeft volcomen/ voldoeni(n)ge rekeni(n)ge bescheyt uuytreyckinge ende/ betalinge ende dat zij van egheenen stucken/ haeffelijck oft erffelijck nu oft naemaels nietsniet/ te eyssche(n) noch te seggen en heeft totten selven/ Ende aldus heeft zij geheelijck ende al de selve/ hue(r) zweg(er) ende zwegeri(n)ne ende hue(r) goede have/ vliegen(de) erve ende erve van des voirs(creven) steet quijtgescouwe(n)
//
Promitten(s) nullatenus alloqui sed war(andizare) prout ende/ vanden selven goeden actie toeseggen(de) ende rechte/ geheelijck tot behoeff vand(er) selv(er) moeder ende huer(er) dochte(re)n/ renu(n)cie(re)nde ende verthiende cor(am) berghe hermeys/ maii xxvii