It(em) jan van chatheem van rillair es come(n) in jegenword(icheit) d(er) scepen(en) van lov(en)/ en(de) heeft ghenome(n) ende bekindt dat hi ghenome(n) heeft va(n) vrouwe(n) barbe(re)n/ weduwe h(ere)n jans wile(n) van steinhove(n) ridders de mole(n) der selv(er) vrouwe(n)/ met de(n) huse dair toe horende gelege(n) neve(n) thof te rillaer Te houde(n) en(de)/ te hebbe(n) van kerssavonde naest lede(n) ene(n) t(er)mijn va(n) drie ja(r)en dair/ na sond(er) middel volgende elx jairs dair en bynne(n) o(m)me derthien mudde/ rox goet en(de) paiabel d(er) mate(n) va(n) loeve(n) en(de) twintich placke(n) der voirs(creven)/ vrouwe(n) barbere(n) dair af te betale(n) alle ja(r)e de(n) voirs(creven) t(er)mijn duere(n)de/ te wete(n) telke(n) vierdele vande(n) ja(r)e een vierdel een vier vande(n) voirs(creven)/ roghe en(de) vande(n) voirs(creven) gelde ende telke(n) t(er)mine alse vervolgde schout/ Ende es vorwarde dat de voirs(creven) jan van catheem der voirs(creven) vrouwe(n)/ gheve(n) sal te(n) ynde vande(n) voirs(creven) t(er)mine alse voir slyten vande(n) steene(n)/ te wete(n) van elke(n) dume slitens te wete(n) ii oude schilde ocht die w(er)de/ d(aer) af t(er) goed(er) wairheit Ende de voirs(creven) ja(n) van catheem sal de voirs(creven)/ mole(n) houde(n) va(n) ka(m)me(n) ende va(n) spille(n) de(n) voirs(creven) t(er)mijn duerende/ sonder der voirs(creven) vrouwe(n) barbare(n) cost Ende de voirs(creven) vrouwe barbe(re)
//
salse houde(n) op hore(n) cost van alle(n) ande(re)n werke des d(aer) aen behoeft Oec es / voirwarde so wair die [vors(creven)] mole(n) stille lage bove(n) vierthie(n) nachte(n) dat soude de vors(creven)/ vrouwe de(n) voirs(creven) ja(n)ne afcortte(n) na gelande vande(n) tide mair so wair si stille/ laghe benede(n) die vierthienachte(n) hoe dicke dat dat gheviele dat soude sijn/ op des voirs(creven) jans cost en(de) dair af soude de vors(creven) vrouwe ongehoude(n) sijn/ Welke voirwerde(n) en(de) pointe(n) bove(n) bescreve(n) de voirs(creven) vrouwe in deen side/ en(de) jan in dand(er) hebbe(n) geloeft malic de(n) ande(re)n wail en(de) volcomelic te houde(n)/ en(de) te voldoin in ald(er) voege(n) en(de) maniere(n) bove(n) bescreve(n) en(de) telke(n) t(er)mine/ alse vervolgde schout Ende des sijn borge(n) des voirs(creven) jans van catheem/ alse p(ri)ncipale sculde(re)n ongesund(er)t en(de) ongescheide(n) henric vande(n) male jolijns/ sone jolijns wile(n) vande(n) male van rillair [en(de)] jan woyts de jonghe van rillair/ de welke de voirs(creven) jan van catheem heeft geloeft d(aer) af scadeloes/ tontheffene Hier ware(n) ov(er) borch(oven) oppendorp scepene(n) va(n) loeve(n)/ dit ghesciede en(de) was gedain inde(n) jair ons he(re)n (et)c(etera) julii ix