Het is wae(r) dat biden rade vander stat and(er)wile en(de) opte(n)/ dach van heden comen is joffr(ouw) lijsbeth vanden broecke diemen/ heet h(er)mans en(de) die wijf is henrics goedenoys na(tuer)lic sone/ jans wilen goedenoy clagende en(de) opdoende dat de selve/ henric hae(re) man se(re) onvueghliken en(de) onredelike(n) met hae(re) leefde/ en(de) omghinc en(de) dat sij bi hem niet gesijn en conste mids/ sine(n) onredelike(n) leven voirs(creven) en(de) dat hi hier en bove(n) gesindt/ soude wese(n) hae(re) goede te v(er)copen en(de) hae(r) en(de) hae(r) kijnt/ te mael vanden hae(re)n bistier te make(n) en(de) dat met scepen(en)/ brieve(n) va(n) loeven des sij [hi] doch ter plaetsen daer hae(re)/ goede gelege(n) wae(re)n sond(er) hae(re)n wille en(de) consent negheen/ macht hebbe(n) en soude Biddende hier om de selve joffr(ouwe)/lijnb lijsbeth den rade vand(er) stat voirs(creven) dat si god en(de)/ recht aensien woude(n) en(de) hae(r) met behoirliker remedien hier/ tot te hulpen te comen Also dat de stat van loeven get(er)mineert/ heeft om gods en(de) bescheids wille dat also langhe als de/ voirs(creven) joffr(ouwe) lijsbeth mette(n) vors(creven) henricke(n) hae(re)n man niet eens/ en is en(de) si te gade(r) niet en sitten in mi(n)nen en(de) vrientscappe(n)/ gelijc man en(de) wijf sculdich sijn te doen datmen dan den/ vors(creven) henricke(n) goedenoy op de goede der voirs(creven) joffr(ouwe) lijsbette(n)/ sijns wijfs en(de) die van haerre side(n) comen sijn met/ scepen(en) brieve(n) va(n) loeven gheen vorderinge noch/ behulp va(n) recht doen en sal mer wilt hi e(n)nich/ recht op sine goede vorde(re)n en(de) die van sijnre siden/ come(n) zijn dat hi dat sal moge(n) doen En(de) of d(er) vors(creven)/ joffr(ouwe) lijsbette(n) geliefde ind(er) stat va(n) loeve(n) te come(n) wonen so/ salmen hae(r) alle dbehulp doen aen hae(re) goede om die/ te gebruyke(n) datme(n) hae(r) als ingeseten d(er) stat van loeven/ van rechts wegen sal connen en(de) moghen doen cor(am) eisde(m)/