Item vanden gedinge dat nu voir meye(r) en(de) scepen(en) van loeve(n)/ geweest es tusschen sandrarde hee(re) tot soy (et)c(etera) in deen zijde/ en(de) janne van bost die in pacht genomen heeft thof des/ voirs(creven) sandrayts gelegen te jandrain Dair af ond(er) veel and(er)/ thoenis die de voirs(creven) sandrart inden rechte leydde de selve(n)/ sand[r]art bethoende met goeden ma(n)nen dat de voirs(creven) jan/ van bost hem voer de voirs(creven) pechtinge in manie(re)n van ond(er)pande/ te pande setten soude viii mudde thiens corens en(de) thienscher/ maten erflik(er) renten op seke(re) pande te wolm(er)shem gelegen/ en(de) hem d(aer) af alsulke vesticheit doen gelijc de clercke der/ stat van loeve(n) seggen souden dat hij vast stonde Oec thoende/ de selve sandrart dat hij el jan van bost elke elc boend(er)/ vanden voirs(creven) lande genomen hadde op xv dossijnen corens/ d(er) maten van jandrain It(em) droegen sij noch dat hij tcoren/ dat hij opt velt in sijne(n) aenbeghinne vant elc boend(er) dair/ af genome(n) heeft om viii mudde corens d(er) maten va(n) jandrain/ dair af hij hem veertich mudde dat yerste jair betalen soude/ en(de) dand(er) soude hij hem beyden tot den lesten jae(r) vand(er)/ welker pechtingen vande(n) principalen hij elx jairs betalen/ veertich mudde tarwen voer xl mudde corens dair/ af hij hem de xxv mudde leve(re)n sal te soy te thienen oft
//
te namen dairt den voirs(creven) sandrarde best genuege(n) sall/ Eest tvonnis dat de voirs(creven) jan van bost den voirs(creven) san/ drarde voldoen sal gelijc de waerheit gedragen heeft/ cor(am) omnib(us) scabinis febr(uarii) ix