Item also als jan willems geheten vanden cruce en(de) henrick vand(er) eect/ beide van wackersele op den dach van heden segge(re)n en(de) mynlike/ yffene(re)n gecoren zijn van henricken en(de) margrieten kijnde(re) henrix/ wilen vanden broecke van alsulken twiste en(de) geschille als tusche(n)/ den selven henr(icke) in deen zijde en(de) m(ar)grieten zijnre zust(er) in dande(re)/ opverstaen en(de) geport was alse van zeke(re)n goeden die d(er) voirs(creven)/ m(ar)grieten in deylingen gevallen wae(re)n en(de) verschenen na de doot/ vanden voirs(creven) wilen henricken hoe(re)n vad(er) in welke goede zeke(re)/ leengoede wae(re)n meynende d(aer)om de voirs(creven) henrick hoe(re) brued(er)/ dat de voirs(creven) m(ar)griete d(aer)inne gheen recht en hadde Ende/ desgelijx oic van allen ande(re)n stoote en(de) geschille tuschen den/ selven p(ar)tien tot op den dach van heden uutstaende om hen/ van alls d(aer)af te verliken en(de) te beslichten So zijn de selve/ segge(re)n hier op delibe(r)acie en(de) advijs te voe(re)n gehadt comen t(er)stont/ voe(r) scepen(en) van loeven hoe(re) uutsprake d(aer)af doende alsoe hier/ na volght Te weten yerst dat de voirs(creven) henrick te hemw(er)t/ ov(er)hebben sal en(de) behouden alle de erfgoede die d(er) voirs(creven) m(ar)griete(n)/ zijnre zust(er) voe(r) hoe(r) kijnsgedeelte in deylingen gevallen zijn/ op te drie hollants gulden(en) die m(ar)griete moed(er) d(er) voirs(creven) kijnde(re)/ d(aer)aen hoe(r) leefdage behouden heeft en(de) de ande(re) lasten d(aer) uut/ gaende en(de) voerts op eenen mottoen xiiii pl(a)c(ken) d(aer) voe(r)/ gerekent erflic en(de) drie hollants gulden(en) erflic alle jae(re) beide/ ts(in)te andriesmisse ap(oste)ls te betalen d(er) voirs(creven) m(ar)grieten zijnre sust(er)/ / en(de) hoe(re)n nacomelingen teeuwigen dagen by alsoe dat de/ betalinge vanden selven iii gulden hollants in gaen sal/ ten naesten s(in)t andriesmisse dat zijn sal na de doot d(er) voirs(creven)/ m(ar)grieten d(er) moed(er) en(de) niet eer Welke [drie] iii hollants guld(en)/ erflic hij sal moegen lossen en(de) afquiten te weten eenen/ hollants guld(en) d(aer) af van s(in)t jansmisse naestcomen(de) ov(er) een/ jaer den ande(re)n hollants gulden(en) ts(in)te andries [jans]misse d(aer)na/ volgende en(de) den derden ts(in)t jansmisse dat dair naest/ volgen sal en(de) elken pe(n)ning d(aer)af met xvi geliken pe(n)ni(n)ge(n)/ en(de) met vollen renten na gelande vand(er) quiti(n)gen Segge(n)/ voirts de voirs(creven) segge(re)n dat de voirs(creven) henrick den voirs(creven)/ mottoen sal moegen desgelijx quiten bynnen den voirs(creven) tide/ te weten van s(in)t jansmisse naestcomen(de) ov(er) drie jaer met/ sesthien geliken mottoene(n) en(de) met vollen renten van eene(n)/ jae(re) Ende dat de voirs(creven) p(ar)tien deen tot des and(er)s maniss(e)/ behoirlike guedinge en(de) vestich(eit) doen zelen van des voirs(creven)/ es alsoe dat elken van hen vast en(de) genoech zijn moeghe/ en(de) altoes op des voirs(creven) henricks cost welke seggen en(de)/ uutsprake de voirs(creven) p(ar)tien aengenome(n) en(de) belieft hebbe(n)/ en(de) geloeft vast en(de) gestentich te houden en(de) deen den ande(re)n/ volcomelic d(aer)af te voldoen sond(er) argelist roelants j(aspar) abs(oloens)/ maii xx